الموضوع: مبعرفش اوقفها

المشاركة الأصلية كتبت بواسطة medozaed

يجماعه انا متشكر جداا لمساعدتكم بس انا عايز اشترى تيل فرامل ورا نظيف لان المشاكل دى ماحصلتش الا لما غيرت التيل الى ورا وبالمره هاجيب طنبورتين علشان انسا الفرامل دى خالص

تاني طنبورتين ما الاخوه قالولك اسمهم طبلتين

يا جماعة انتم دخلتم الراجل فى متاهة لغوية حول الفرق الفيزيقى البيولوجى الكيمائى بين الطنابير والطبلات فى حين ان كلنا عارفين هو يقصد ايه وسؤاله كان بسيط جدا، منين وبكام

بص يا أخى العزيز، لو الطنبورتين الورانيين (الطبل علشان المجمع اللغوى ميزعلش) عندك يستحملوا خراطة، يعنى لسة فيهم لحمية كافية ، ودى الخراط اللى يقدرها، يتخرطو والتيل يتملى وتظبط ريجلاش فرامل اليد على كدة، الشغلانة دى بتتكلف حوالى 100 جنيه تقريبا

لو ما منهمش أمل فأمامك حلين، الجديد من التوفيقية او شاملبيون، هتلاقى الحاجات النضيفة عند هشام لهيطة فى شارع زكى، او الكيلانى فى شامبليون، وهتلاقى انواع ارخص عند ناجى النشوقاتى فى شارع رمسيس (على فكرة ، كلهم جنب بعض والمسافة بينهم تتمشى) ، او انك تجيب استيراد من التوفيقية بس غالبا الطنابير(أقصد الطبل) الاستيراد هتحتاج لمسة حانية من يد الخرط برضه

لكن للأسف اسعار الطنابير والتير الخلفى انا مش ملم بيها ، وان كنت متصور ان الموضوع ممكن يخشله فى 200-300 جنيه مثلا للطنبورتين (اللى هما طبلتين يعنى) والأربع قطع تيل، بس السؤال فى التوفيقية هيفيدك اكتر

المشاركة الأصلية كتبت بواسطة medozaed

المشكله كلها يا سبعاوى باشا ان العربيه مالهاش رجلاش

انا بتكلم عن ريجلاش فرامل اليد ، وده عن طريق مسمار فى تفريعة واير الفرامل تحت العربية، اما ريجلاش فرامل الزيت فبيكون عن طريق تركيب تيل عالى للفرمل، بس عموما فى كل الأحوال الكلام دع كله لو بنتكلم ان الطنابير تنفع تتخرط