الحمد لله استلمت الميجان النهارده شكرا نيل موتورز علي المشورة

عرض للطباعة

15-06-2008, 11:13 PM
Ahmed Aly

الحمد لله استلمت الميجان النهارده شكرا نيل موتورز علي المشورة

الحمد لله استلمت الميجان 2008 النهاردة بفضل الله تعالي و بناء علي متابعي لهذا المنتدى المحترم لمدة سنة متواصلة
شكر كبير لكل من ساعدني على هذا الاختيار بطريقة مباشرة او غير مباشرة وعظيم تقديري للاستاذ شاركي

بالمناسبة يا شاركي باشا هما مجبوليش (شاهدة البيانات وقالوا انا اللي اجبها من مرور بين السرايات علشان كل الاوروبي لازم يطلع من هناك ويوجه الي المرور الخاص بمشتري السيارة ( هل هذا صحيح ) هم صحيح عرضوا اني اسيب لهم الورق وهما يعملوه(مجملة من السيد البيياع) بس قلولي انت هتعملو اسرع احنا ادمنا اسبوع عشان العدد

المهم انا هعملوكو موضوع كويس باذن الله بس لما ارخص وافوق

انا باذن الله امنت عند المجموعة العربية للتامين Amig

احمد علي
15-06-2008, 11:21 PM
aif

الف مبروك يا استاذ احمد
ربنا يعطيك خيرها ويكفيك شرها ويملاهالك بركة
شهادة البيانات حصل معايا نفس الشيء
روح المرور الصبح بدري ومش لازم العربية تكون معاك ... المترو اسهل كتير ... محطة البحوث
الصبح بدري الدنيا بتبقي فاضية جدا ... خد معاك المبايعة وصورة اذن الافراج اللي سلموهالك و بطاقتك
15-06-2008, 11:21 PM
Sharky

الف مبروك يا احمد باشا
و ربنا يبارك لك فيها و مستنين إنطباعاتك عليها

بصراحة معرفش قصة إن شهادة البيانات لازم تطلع من السرايات لإن أنا كنت خدت الورق كله و موجه لمرور مدينة نصر بس أنا إتاخرت 3 أسابيع لحد ما إستلمته من الفرسان و الكلام دا كان قبل ما يقفله بسنه

إن شاء إجراءات الترخيص تخلص بسهولة و يسر و تفوق لتقييمك للعربية
15-06-2008, 11:29 PM
Ahmed Aly

شكرا يا شاركي باشا علي سرعة ردرودك انت والاستاذ Aif

ربنا يسهل وتكون عملية سهلة اصلي بتخنئ من التعامل مع موظفين الحكومة خاصة في الحر اللي احنا فيه ده ومش عارف هل اديهم الجواب بتاع رينو المعادي و هما بيدبسولي فيه شهادة البيانات للمرور اللي انا تبعه بيتهيئلي مفروض متخدشي وقت اصلي شكل العضو المنتدب بتاع الشركة هيطرقعلي لو مروحتش بكره
15-06-2008, 11:31 PM
معاذ الشرباصى

الف مبروك

ربنا يبارك لك فيها و يحفظها لك من كل سوء

عربية اكتر من ممتازة فعلا

بس غريبة جدا انهم مش بيخلصوا الورق

انا فى دايهاتسو, هما اللى عملوا الورق, و استلمته بعد 24 ساعة

----------------------------------------

انت قابلت مين فى فرع المعادى؟
15-06-2008, 11:33 PM
Sharky

إن شاء الله ما تخدش وقت
حاول تروح الصبح بدرى و إن شاء الله تخلص بسرعة و تبدأ تستمتع بالعربية
15-06-2008, 11:34 PM
aif

اقتباس:

المشاركة الأصلية كتبت بواسطة Ahmed Aly

شكرا يا شاركي باشا علي سرعة ردرودك انت والاستاذ Aif

ربنا يسهل وتكون عملية سهلة اصلي بتخنئ من التعامل مع موظفين الحكومة خاصة في الحر اللي احنا فيه ده ومش عارف هل اديهم الجواب بتاع رينو المعادي و هما بيدبسولي فيه شهادة البيانات للمرور اللي انا تبعه بيتهيئلي مفروض متخدشي وقت اصلي شكل العضو المنتدب بتاع الشركة هيطرقعلي لو مروحتش بكره

صورة اذن الافراج وصور المبايعات اللي اعطوهالك ... مع وجود اصل المبايعات ... وبطاقتك ... و 5 جنية رسوم ... و5 جنية اكراميات للراجل العجوز اللي هناك .... الموضوع كلة نص ساعة باذن الله بس روح بدري الساعة 8 ونص او 9 فبل الناس ما تصحي
مبروك مرة اخري
15-06-2008, 11:40 PM
mohamed ibiza

مبروووووووووووووووووووووو وووووووووووووووك:)
16-06-2008, 12:13 AM
Abo_Lina

Alf mabrook
great choice
16-06-2008, 12:31 AM
Ramy_Tantawi

ألف مبروك يا استاذ احمد وربنا يبارك لحضرتك فيها ان شاء الله ويكفيك شرها وفي انتظار تقييمك الكامل والوافي وانطباعك عن العربيه ان شاء الله .

بالنسبه للورق بتاع المرور انا خيروني وقت ما استلمت العربيه انهم يخلصوا الورق ولا أخلص انا بس كان يومها اربعاء وكنت هتأخر كده ليوم الاحد او الاتنين فا قلت اجازف انا واعمل الورق بنفسي بدون مندوب الشركه والكلام ده كله وبالفعل طلعت الخميس الصبح بدري 8 الصبح كنت متحرك والحمد لله وصلت لمرور بين السرايات والموضوع مأخدش اكتر من نص ساعه الحمد لله حضرتك هتطلع الدور التاني في المرور هتلاقي شبابيك كتير الناس هاتدلك على الشباك هاتسلم الجواب اللي مع حضرتك وهو هايدور في دفتر كبير كده على صورة الافراج الجمركي والكلام ده كله وهايدي حضرتك على ما أذكر ورقه كده ملونه فيها بيانات العربيه ان شاء الله وخلاص تطلع بالسلامه بعدها على مرور حضرتك وان شاء الله تمشي في اجراءات الترخيص العاديه ان شاء الله وربنا يوفقك .
16-06-2008, 12:47 AM
akram2025

الف الف مبروك يا باشا و أهلا بيك في الأسرة الميجانوية :party::grouphug:

ربنا يباركلك فيها و يكفيك شرها :018:

رجاء يا أستاذ أحمد ما تنساش تدبح لها وتوزع على الغلابة.... أنا عملت كده و ربنا سترها معايا جدا
و مستنين رأيك في العروسة الجديدة.
16-06-2008, 12:55 AM
Ahmed Samy

الف الف مبروك ويارب يحميها من كل شر

اقتباس:

المشاركة الأصلية كتبت بواسطة akram2025

الف

رجاء يا أستاذ أحمد ما تنساش تدبح لها وتوزع على الغلابة.... أنا عملت كده و ربنا سترها معايا جدا
.

ها ها طبعا ربنا سترها معاك ......مش لما قلبك وقع من عداد البنزين و طلعت خدعة :)
16-06-2008, 12:57 AM
akram2025

اقتباس:

المشاركة الأصلية كتبت بواسطة Ahmed Samy

الف الف مبروك ويارب يحميها من كل شر

ها ها طبعا ربنا سترها معاك ......مش لما قلبك وقع من عداد البنزين و طلعت خدعة :)

ده غير سواقين التاكسي اللي خاربين البلد هنا في الغردقة.... بجد الواحد بيتفادى القتراب من أي تاكسي أقل من 100 متر... دول بقوا فيروس قاتل

وعلى فكرة قلبي موقعش ولا حاجة بس كنت متضايق من العيب الهايف ده :dots:
16-06-2008, 01:02 AM
momo10000

الف مبرووووووووك وربنا يكفيك شرها

واهلا بيك في عالم الميجان وإن شاء الله حتلاقي ان اختيارك كان الافضل

اهم حاجة تدبحلها .....

مبروك يا باشا...............
16-06-2008, 01:25 AM
fahd_628

الف مبروووووووووووووووك
16-06-2008, 05:29 AM
Ahmed Aly

ألف شكر للجميع بصراحة المنتدى ده حكاية و الناس اللي فيه رواية عمري ما كنت اتخيل اني اجيب ميجان ابدا بس والله انتو تقنعوا بلد

بس اقولوا حاجة البيجو في السحبة بتاعتها 2000سي سي حاجة تانية والكيك دون طيارة يا جماعة بس انا ليسة حرام احكم على الميجان دلوقتي

شكرا على رد حضرتك يا استاذ رامي انت طمنتني

ربنا يسترها معانا جميعا ويهدينا دائما لما هو خير لنا في الدنيا و الاخرة ويغفر لنا جميعا ذنوبنا الهم امين

احمد علي
16-06-2008, 03:02 PM
M.Moustafa

الف مبروك يا احمد باشا وربنا يديك خيرها ويكفيك شرها
16-06-2008, 03:27 PM
Karim_Monir

الف مبروك يا استاذ احمد
هيا يمكن تجميعها مش قوي ودي كانت ملحوظتي عليها
لكن ما شاء الله كلها تحفة وثباتها رائع
16-06-2008, 03:30 PM
Ahmed Selim

ألف مبروك يا أحمد باشا

أن شاء الله تخلص التراخيص بسرعة و تبدأ تشوف أمكانيات العربية وتستمتع بيها

ربنا يديك خيرها ويكفيك شرها
16-06-2008, 03:30 PM
medohai510

ألف ألف مبروك يا باشا وربنا يكفيك شرها أن شاء الله ومنتظرين تعليقاتك عل اللوجان في أقرب وقت للأستفادة وربنا يباركهالك.
16-06-2008, 03:41 PM
Migo123

اقتباس:

المشاركة الأصلية كتبت بواسطة Ahmed Aly

الحمد لله استلمت الميجان 2008 النهاردة بفضل الله تعالي و بناء علي متابعي لهذا المنتدى المحترم لمدة سنة متواصلة
شكر كبير لكل من ساعدني على هذا الاختيار بطريقة مباشرة او غير مباشرة وعظيم تقديري للاستاذ شاركي

بالمناسبة يا شاركي باشا هما مجبوليش (شاهدة البيانات وقالوا انا اللي اجبها من مرور بين السرايات علشان كل الاوروبي لازم يطلع من هناك ويوجه الي المرور الخاص بمشتري السيارة ( هل هذا صحيح ) هم صحيح عرضوا اني اسيب لهم الورق وهما يعملوه(مجملة من السيد البيياع) بس قلولي انت هتعملو اسرع احنا ادمنا اسبوع عشان العدد

المهم انا هعملوكو موضوع كويس باذن الله بس لما ارخص وافوق

انا باذن الله امنت عند المجموعة العربية للتامين Amig

احمد علي

حضرتك كنت بتسلم العربيه النبيتي من فرع المعادي
حوالي الساعه 7 كده ......... صح ... انا خدت بالي انك بتسأل على مرور بين السريات :)
الف مبروك على العربيه وربنا يديك خيرها ويكفيك شرها

انا كنت موجود في الفرع .... كلموني عشان انا كنت عايز اعمل تست درايف
بس لازم يوم غير الجمعه والسبت من 10 - 5 يعني لازم اخد يوم اجازه مخصوص

وكمان زعلوني ان الميجان المانيوال شالو منها مثبت السرعة والفوجات :arghh: