الموضوع: عايز عنوان حماده غزي اللي في القاهره

لسه النهارده قلت اروح اسال كدة اخد فكرة عشان بفكر اما في السوست الايباخ او الفوانيس المعدلة

عديت على ارابكوم لقيته قفل للاسف فقلت اما اعدي على محمد عثمان لانه قريب من هناك

رحت هو ماكنش موجود تقريبا فكان موجود اتنين كدة شغالين واضح انهم مش فاهمين اي حاجة في اي حتة !!

بقوله عندك الفوانيس المعدلة للياريس ؟؟

بيقولي اه راح موريني كدة فانوس امامي وبيقولي هو ده

امسك الفانوس !! الله ؟ هو فانوس عربيتي كبر مرة واحدة كدة ليه

وصاحبي يقولي ياعم ده كبير ده مش فانوس الياريس !! وانا اقوله ازاي ياخي الراجل بيقول ان هو ده بتاعها يمكن كبير واحنا مش واخدين بالنا او يمكن عشان بس التاني راكب في العربية فاحنا حاسينيه صغير !! ههههههه

قلتله طب استنى ورحنا سايبنين المحل وطلعنا نبص على العربية <<< طبعا في الاثناء دي هو كان بيتصل بمحمد عثمان يساله على سعر الفانوس

ابص على العربية !! ؟ الفانوس صغير

قلتله يا باشا ده مش فانوس الياريس قالي اه ماهو ده مش بتاعها <<< وسايبني بقالي ساعة بتفرج عليه !!

سالته بعدها على الفانوس الخلفي المعدل

شاورلي على واحد قلتله بس انا شفتلها فانوس خلفي غير ده وعامل شبه فانوس الفئة الخامسة كدة بالظبط قالي اه ماده سخانات وده ليدات ! قلتله مش عارف بس هو شبه فانوس الفئة الخامسة قالي اه ماهو سخانات ! وانا اصلا مش فاهم يعني ايه سخانات وهو مصر على الكلمة !! يعني اللى اعرفه في التجارة انك المفروض تخاطب المشتري باللغة اللى هو يفهمها مش اللغة اللى انت فاهمها !!

المهم ماعلينا سالته على السوست قلتله عندك سوست للياريس ؟ قالي انت فاكرها جولف !!؟ بصتله كدة وسكت لقيته بيقولي هي حاجتها قليلة اوي

قلتله طب متشكر وخرجت من المحل وانا مقفول منه ومافتكرش اني ممكن اروحله تاني