السلام عليكم ورحمة الله وبركاته

بقالي فترة مش بشتكي من العربية علي غير العادة
ولكن الحمد لله العربية مصرة ماتقطعليش عادة

الحمد لله بفضل الله - العربية جابت فتيس

بداية الموضوع اني كنت بسمع اصوات خبط وانا كاسر يمين وطالع بالعربية
اول حاجة طبعا جت في دماغي انها كوبلن داخلي

فضلت متعايش مع المشكلة وبقيت ماكسرش اوي او لو لزم الأمر فبطلع بالراحة اوي حفاظا علي ماتبقي من الكوبلن

الموضوع تطور وبقت تعمل الصوت علي الطوالي

ساعتها ماكدبتش خبر وروحت للميكانيكي وسمعته الصوت
وبالفعل كان تشخيصه انها بلية الكوبلن الخارجية (بتركب علي الفتيس من برة عشان تمسك الأكس بالفتيس) والأكس طبعا ماسك الناحية التانية راس الكوبلن الخارجية بالطنبورة

ساعتها جابلي بلية استيراد وركبها
والبلية القديمة خرجت متأكلة بشكل رهيب

المهم

بعد ماغيرتها الصوت اختفي وانا كاسر يمين بس بدأت اشعر بصوتها في الجانب الشمال

والوضع تطور بسرعة وبقيت اسمعها علي الطوالي

الوضع تطور اكتر وبدأت اشعر بالخبط تحت رجلي

الوضع تطور اكتر واكتر وبقيت احسها فكل الحالات
في الطلعة - وانا بتسارع بالعربية اول وتاني وثالث ورابع وخامس - اول لما الأر بي ام يعلي عن 2 ار بي ام - لما ادي العربية غيار اعلي من سرعتها

بدأت الاحظ ان الخبط بيمنع لما امور العربية

المهم

أشتريت بلية جديدة - صيني ب 110 جنيه

ركبتها

في نفس اليوم حسيت بالخبط وكأن شيئا لم يكن
يعني كأنك يا ابوزيد ما غزيت

بعد شوية investigation مع المهندس ايهاب بالتليفون والأستاذ فادي قررنا نحن انها فتيس وليس بلية كوبلن

كل الدلائل بتقول انها فتيس

  • الصوت الي بيختفي لما امور
  • بردو الخبط والصوت بيختفي لما اريح رجلي من علي البنزين
  • بردو الخبط والصوت بيختفوا لما ادوس دبرياج
  • مش بحس بمشكلة لما ادور وامشي بالعربية وهي باردة
  • تبدأ المشكلة تظهر لما ارقع مشوار محترم والزيت يسخن جوة الفتيس

المهم
روحت للميكانيكي وطلع جرب معايا
وقالي البلية سليمة و10/10
العربية جابت فتيس

روحنا سوا انا والميكانيكي وزودنا الزيت نص كيلو بزيت تقيل 140
وبردو الصوت مارحش ولا قل

انا بس بنقلكم التجربة عشان نستفاد منها
واحب اقولكم
دايما تشيك علي الزيت بتاع الفتيس مع كل غيار زيت للموتور
حاول قدر المستطاع تحط زيت الفتيس المعتمد من الشركة المصنعة (فولكس)

وادعولي اجيب فتيس حلو قريب
لأني لما سألت عرفت ان صعب اوي اعرف اصلح الفتيس لوجود قطع غيار صيني مضروبة في السوق وبردو الفتيس مش هيرجع زي الأول

لكم مني اطيب التمنيات
وخالص الشكر لحسن المتابعة

والله المستعان
،
،