عملت اختبارقيادة (تيست درايف) لسيات ليون وده انطباعي .



في البدايه بعت من الموقع بتاع سيات مصر إن عايز أعمل تيست درايف
فكلموني بعدها بيوم تقريبا علشان نحجز ميعاد
اللي كلمني الأستاذ أسامة ناشد مدير فرع غمره.
رحت في الميعاد كان يوم السبت الساعة 4 العصر.
استقبلني في مكتبه وهوشخص محترم جدا ,
وطبعا مضيت على شوية ورق علشان لوحصل حاجة للعربية أثناء اليتست درايف تبقى مسئوليتي .

بدأنا التيست …..ركبنا العربية و شغلنا التكيف على طول لإن الجو كان حر
التكيف اوتوماتيك و ممكن تظبط درجة الحرارة للسائق وأخرى للراكب

وطبعا قافلين الإزاز كله
العزل ممتاز فعلا ... مع التكييف الاوتوماتيك الجو كان ظريف جدا و إنت سايق.

شغلناالراديو ..صوته كويس مع 6 سماعات وفيه MP3 و AUX و iPOD يعني فيه كل حاجة إنت عايزها

كمبيوترالرحلات مليان اختيارات و بتتحكم فيه من الدراعات بسهوله وبيحسبلك كذا حاجة مفيدة زي..
  1. البنزين المتبقي
  2. وتقطع بيه مسافة قد إيه
  3. وعملت كام KM من آخر reset

وهكذا،،







الميزات الخاصة

  • العربية مريحة في الجلوس
  • شنطتها مش كبيرة قوي بس تكفي الحاجات الطبيعية …قصدي تشيل شنطتين كبار تقريبا
  • أماكن تخزين كتير و سهلة الوصول
  • فيه sun roof يفتح ويقفل بالكهربا مش يدوي
  • فيها برده كروز كنترول ومحدد سرعة بس ماجربتهمش ..عايزين طريق مفتوح
  • عجلة القيادة ملمسها جلد و ظريف …وفيها multifunction للكاسيت و البلوتوث
  • فيها paddle shifters في الدركسيون جامدين جدا لما تعمل steptronic واللي عجبني كمان إنك ممكن تستخدمهم في أي وقت

يعني مش لازم تكون جايب الجير بوكس على el-steptronic

انما ممكن وإنت على normal تشغل el-paddle shifters علشان تنقل فوق أو تحت حتى و إنت على D
وده لازمته لوعايز تسقط نقلة مرة واحدة علشان تعدي عربية قدامك أو تفادي حد ... أوكبرت في دماغك وقررت تجري ورا واحد مثلا
  • فيها كمان بلوتوث توصلها عالموبيل علشان ترد وإنت سايق

وكمان ممكن تشوف الرسايل (SMS) والأرقام اللي على الموبيل على الشاشة اللي قدامك وتطلب الرقم اللي إنت عايزه

بصراحة الموضوع ده ناس كتير بتشوفه رفاهية زيادة ملهاش لازمة …بس أنا علشان بتكلم كتير و أنا سايق فـالبلوتوث بالنسبالي مهم جدا.


نخش بقى على الموتور




موتور VW اللي موجود في الجيتا (القديمة) ... 1600CC و 150نيوتن متر عند 3800 rpm

علشان كده سحبها مش وحش …لماجبت el-sport الموضوع طبعا اختلف خالص …el-RPM تلاقيه عند 3000 فما فوق طول ماإنت حارق ودايس بنزين والسحب بقى لذيذ و جامد

الجيربوكس


طبعا DSG وطلعنا الاول على normal مش el-sport.
على normal mode بيبقى السحب كويس بس كده كده el-DSG بيريح الموتور خالص
وبيخلي عدد لفات الموتور متعديش 2000 rpm وده طبعا بيوفر في استهلاك البنزين

بس اللي معجبنيش إن كل ماتدوس جامد وعايز تجري يعني كنت بأحس إنها بتنط مرة واحدة
حسيت إن فيه تأخير شوية بتاع ثانيه كده …أناعارف أنتم بتقوله إيه دلوقتي (يعني هم الثانية هيعملوا الفرق ده !)
بس أنا حساس شوية للمواضيع ده

أنا طلعت بالعربية لحد محور الشهيد وجبت لحد 130KM والثبات جامد جامد ... مجبتش أكتر من كده

بصراحة الأستاذ أسامة سابني براحتي خالص …لا قاللي روح يمين و لا شمال …هوقال لي اعمل اللي إنت عايزه

وأنا كنت باشد جامد على Sport علشان اشوف أداؤه إيه وبصرحة جميل جدا ماعدا موضوع الثانيه تأخير


العربية فيها عوامل أمان كتيرة





  1. عدد 6 وسائد هوائية (AirBags)
  2. نظام ABS - Automatic Brake Ssytem
  3. EBD - Electronic Brakeforce Distribution
  4. ESP كمان ...

اللي مش عارفESP …هوبإختصار Electronic Stability Program اللي بيشوف اتزان العربية ككل ويظبط فرامل وحركة كل عجلة لما يحس إن العربية هتعوم علشان يحافظ على الاتزان






"استاذ أسامة قالي إن في واحد كان بيعمل تيست درايف وكان سايق على 150KM على الدائري وراح جاب الدركسيون جامد يمين والعربية ولا الهوا ولا عوميت و لا حاجه ... أنا بصراحه خفت أعمل كده"

  • سعرالعربية 168ألف جنيه

من وجهة نظري سعر مناسب جدا لكل الإمكانيات ديه والأداء الكويس ده …والتقفيل والخامات ممتازة
  • هي تقفيل اسباني طبعا

أنا اعطيها 8 من 10 من حيث قيمة مقابل سعر
العربية ده مظلومة في بلدنا للأسف




ده تليفون الأستاذ أسامة ناشد اللي يحب يكلمه 01273302086


أعذروني لو كلامي مش مظبط شوية لأني بأستعمل مايكروسوفتMaren واتمنا يكون التقرير عاجبكم و مفيد لكم إن شاء الله

تم تنسيق الموضوع بواسطه
ا/syd منسق قسم سيات
وتم تعديل المشاركات بواسطني
مشرف عام 1