الموضوع: تجربه زيت فالفولين فى الهوندا سيفيك 93

اخوانى الهونداويه

اخر تغير زيت كان شل الترا 10000 و لحد 8000 حسيت العربيه تقيله جدا جدا قلت كفايه كده اغير زيت وفعلا غيرت الزيت وغيرت فلتر الزيت ومش عاوز اقولك الصراحه كان متسخ جدااااا وكثر خير العربيه بجد وعشان كده انا قررت اغير زيت بعد كده على 5000-6000 بالكثير حتى لو الزيت 10000

المهم قبل ما اغير كلمت اخويا العالمى سمسم وطلبت نصيحته كنت ناوى احط شل 5000 لان واحد صاحبى معاه هوندا 93 قالى احط الشل 5000 واغير على 3000 المهم اخويا سامح اشار عليا اجرب الفالفولين لان فى اعضاء فى المنتدى جربته وبتشكر فيه المهم كلمتهم ملقتش الزيت فى اسكندريه فطلبته dhl وبعتوه ( عاوز اقولك بجد ان تجربه انك تشترى الحاجه وتجيلك لحد البيت او المكتب ده جامده وحلوه قوى ومريحه ) عشان كده باذن الله هجرب اجيب قطع غيار م بره للعربيه وهقولك على التجربه فى موضوع منفصل باذن الله

المهم وانا بكلم الموظف بتاع فالفولين قلتله على الزيت الى بستخدمه وقالى هو كويس بس ممكن يكون عالى شويه على الموتور بتاعى وعرض عليا الاقل درجه مش فاكر اسمه ايه وبعد كده قالى ولا اقولك خليك على نفس الدرجه بتاع شل الترا 40w وبيقعد لغايه 15000كم وفعلا الزيت وصل ونزلت القديم وحطيت الجديد بس فيه ملحوظه :

- اى زيت بجيبه سواء موبيل او شل دائما بيكون فيه باقى فى العلبه بتشيله احتياطى لو الزيت نقص فالفولين بقه مفيش نقطه اتبقت مش عارف ليه بس المقاس مظبوط وبرضه بكره ناوى اقيس الزيت والعربيه بارده وهقولكم على نتيجه المقاس

- واخويا فى التوكيل بيشترى فلتر زيت موظف قطع الغيار ساله جبت زيت ايه قاله فالفولين قاله ليه !! ده تقيل قوى على العربيه ومش كويس فى 93 وقاله ان فيه زيت التوكيل بيبيعه مخصوص للهوندا افضل من الفالفولين
فبصراحه قلقنى وانا عارف ان الموظف ده محترم جدا كعاده كل الهونداويه يعنى ملوش مصلحه انى اشترى منه ولا من غيره
وعن تجربه الزيت بصراحه العربيه بقت طياره وخفيفه وبتسحب جامد بس برده مش قادر احكم عشان مع اى تغيره زيت العربيه بتكون سريعه وبتسحب عشان كده كنت حابب من الاخوه الخبراء يقوللنا ازاى نعرف ان مثلا فالفولين كويس هو او غيره يعنى ايه الاماره هل مثلا بعد عدد كيلومترات معين يبان جوده الزيت