الموضوع: انتكاسة الفيكترا b1

السلام عليكم,, ازيكم يا اوبلاوية

انا عندى العربية جاتهلا انتكاسة مره واحدة مع انها كانت شغالة زى الساعة (سبحان الله) انا كنت مسافر وركنت العربية 3 اسابيع من غير ما اشيل كابلات البطارية (سهوا) ولما رجعت ادور مفيش كهربا فى العربية خالص فاصلة خالص المهم روحت لبتاع البطاريات علشان البطارية لسه جديدة (شاريها من 6 شهور بس) ادانى بطارية تانية وقالى مشى نفسك بيها كام يوم لحد ما اشحنلك بتاعتك ,ماشى ياعم تشكر
المهم مشيت بالعربية لاقيت الحرارة بتعلى اوى مع العلم ان المراوح شغالة (مع ان الطبيعى بتاعها عمرها ما طلعت عن 92 درجة) المهم شغلت التكييف قولت يمكن يبرد شوية التكييف اشتغل تمام لكن الحرارة بدأت تعلى لحد ما وصلت 100 ؟؟؟؟؟؟ وبعدين احمر على طول ولمبة التشك نورت,, وقفت شوية لحد ما بردت وبعدين دورت من غير تكييف الاقى العربية بتسخن 98 او 100 من غير تكييف المهم بقيت امشى بيها من غير تكييف يومين كدة ولاقيت الحرارة رجعت للطبيعى بتاعها تانى 89 - 91 ماشى زى الفل قولت الحمد لله الدنيا ظبطت واشغل الكييف بقى وكانت الفاجعة , التكييف مش شغال, هو بيشتغل وصوتة شغال والكمبريسور لكن بيطلع هوا سخن نااار بصيت على مواسير التكييف لاقتها سخنة اوى مع ان قبل كدة كانت بتبقى تلج فهل ده معناه ان الفريون اتسرب؟؟؟ وايه سبب كدة اصلا؟؟؟

كمان قبل 4 ايام فولت من بنزينة التعاون (منه لله) قالوا مفيش غير بنزين 92 قولت ماشى فول ياعم فولت وياريتنى ما فولت لاقيت العربية عمالة تقطع وتفصل (يدوب امشى 500 متر وتفصل ) واشغل تانى تشتغل وتفصل وادوس بنزلن على الاخر مش عايزة تتحرك والاقى مره واحدة زى صوت قنبلة خرج من الشكمان,, وده معناه ان البنزين مخلوط بمية او فيه رواسب كتيييييييييييييير جدااااااااااا وغير كدة ان ده مستحيل يكون 92 زى ما قالو منه لله
اسف على الاطالة وياريت تفيدونى فى موضوع التكييف ده وهل اشحنة ولا اعمل ايه فيه؟؟؟؟