أنا واحدة أساسا يعني من الأعداء
بص ربنا يكون في عونك طبعا لأن موضوع النكد ده حاجة تفسد الحياه. بس فكرة ان الستات كدة و مفيش فايدة و هي بتنكد عشان عاجبها النكد دي أكيد مش صح. مفيش انسان عايز يبقى تعيس.
مراتك لو فعلا منكدة على طول بالشكل ده تبقى أكيد هي نفسها مش سعيد و ده بينعكس على تعاملها معاك. حاول تتكلم معاها و تقول لها انك حاسس انكوا بقيتوا بعاد و بتتناقروا على اتفه الأسباب و ده مخليك مش سعيد و عايز الوضع ده يتغير. حاول تفهم منها ايه اللي ناقصها و نفسها انت تكون بتتصرف معاها ازاي عشان ده يحصل, و في نفس الوقت قول لها على الحاجات اللي مضايقاك و نفسك تتغير ازاي بس من غير ما تكون هجومي و تحسسها انها كلها عيوب. حاول تفكرها بحاجات كانت بتعملها و بطلت أو فترة الجواز الأولى مثلا كان تعاملكوا عامل ازاي. متتوقعش انها حتكون متقبلة الكلام في الأول وتوقع انها ممكن تكون هجومية شوية و تقول لك انت اللي بتعمل كيت و كيت...بس انت لازم تحاول تمتص ده و تفهمها انك حاسس انكم انتوا الاتنين لازم تغيروا حاجات عشان تكونوا اسعد و أنك فاهم ان هي كمان فيه حاجات مش عاجباها. و لازم يكون عندك استعداد انك فعلا تسمعها و تعرف اللي نفسها فيه و تحاول تعمله مش مجرد كلام. لو ربنا و فقك و قدرتوا فعلا تفتحوا قلبكوا لبعض و تتفاهموا لازم انتوا الاتنين تكونوا فاهمين ان مفيش حاجة بتتغير بين يوم و ليلة و انكوا لازم تستحملوا بعض و تفكروا بعض بالكلام ده بالراحة لو حد ضايق التاني عشان يتحقق بعد فترة. و مش حوصيك طبعا انك تختار الوقت المناسب اللي تفتح فيه الكلام ده.
ربنا معاك
المفضلات