المخرج يوسف شاهين يسافر للعلاج على نفقة الدولة

**wawoo** · 17-06-2008 04:04 PM

بصراح انا حزين على التعليقات اللى انا بقرائها , يعنى حتى يا جماعة نتمى لة الشفاء من باب الرحمة كانسان حتى , و بعدين هوة ذنبة اية اذا كانت الحكومة مقصرة فى علاج الناس من عدمة , انا مش فاهم , هوة خلاص الرحمة انتزعت من قلوب الناس , يعنى لو حدة عندة كلمة كويسة يقولها , انما الموضوع يتحول هجوم على الرجل و على الحكومة , دة زيارة المريض واجبة و ليها ثواب كبير, واحنا حتى مش مستكفيين بحال الرجل لاء كمان هجوم و كلمات زى الرصاص ملهاش اى لازمة ,

يا جماعة حرام عليكم كدة و كل واحد يتذكر انة ممكن يوم يكون فى هذا الموقف و يكون محتاج و لو كلمة كويسة .و حديث عن الرسول " من كان يؤمن بالله واليوم الآخر فليقل خيرا أو ليصمت "
و اذا لم تكن من محبين يوسف شاهين خلاص مافيش مشكلة , انما اية لازمتة هذة التعليقات الجارحة و هو فى موقف زى دة.
و الحكومة مقصرتش فى علاج الحالات الحرجة و المستعصية من الشعب على نفقتها , و هناك امثلة كتيرة على الموضوع دة , انما خلينا وقعيين شوية مش ممكن كل مريض حيسافر على نفقة الدولة و انتو عارفين دة كويس , يبقى اية لازمتة الهجوم دة .

**hesham2004** · 17-06-2008 04:19 PM

ده راجل بركه ، مايتعالجش على حساب الدولة ولا حتى على حسابنا ليه
واحنا مستعدين لخصم مصاريف العلاج و ( لزوم الشىء ) من مرتباتنا و علاوتنا و مستعدين لشد الحزام اكتر .

**Ahmed Samy** · 17-06-2008 04:22 PM

المشاركة الأصلية كتبت بواسطة wawoo

و الحكومة مقصرتش فى علاج الحالات الحرجة و المستعصية من الشعب على نفقتها .

لأ مقصره جدا جدا جدا

أنا أعمل بمستشفى للطوارئ يا سيدي الفاضل

و رأيت بأم عيني أفاضل الناس يموتون أمامي و الكل في المستشفى يعلم انهم يموتون لنقص الدواء أو عجز الالات أو استحاله السفر للخارج

و هذا ليس من نقص الموارد بل من سوء التوزيع (لأن في نفس الوقت بتلاقي الباركينج بيترصف للمرة العاشرة و بيتعمل فيه نصب تذكاري "للخيبة اللي احنا فيها")

المشاركة الأصلية كتبت بواسطة wawoo

و هناك امثلة كتيرة على الموضوع دة , .

هل عندك امثلة غير مستقاه من التليفزيون و مجلة الشباب و حريتي ؟؟؟

كل الأمثلة يا صديقي هم مشاهير البلد وزراء فنانين عازفين رسامين قضاه (من اللي جنب الحيط طبعا)

انما هل المعيار هو المواطنة ؟؟؟؟ لأ

هل المعيار هو خطورة الحالة؟؟؟؟ لأ

هل المعيار هو عدم القدرة ؟؟؟؟ لأ

معظم من سافروا يسافرون (كتقدير) من الدولة بالرغم من كون (معظمهم) قادرين على السفر و العلاج بل و الحياة في الخارج بدون حتى عمل

و لهم اموالهم هناك التي لا تمس ......بل تنهب أموالنا نحن (و مالك انت كمان)

تقدير الدولة ممكن يكون بوسام بشهادة انشا الله حتى بقلادة النيل من الدرجة الممتازة المكيفة هما أحرار في قلاداتهم

بس شقانا و تعبنا لأ

و ظلم المرضى اللي في المستشفيات لأ

لأ
لأ
لأ

المشاركة الأصلية كتبت بواسطة wawoo

انما خلينا وقعيين شوية مش ممكن كل مريض حيسافر على نفقة الدولة و انتو عارفين دة كويس , يبقى اية لازمتة الهجوم دة .

انا تعبت

هارد كمان شوية

**محمد عز** · 17-06-2008 04:23 PM

و الحكومة مقصرتش فى علاج الحالات الحرجة و المستعصية من الشعب على نفقتها , و هناك امثلة كتيرة على الموضوع دة

بالله عليك انت بتتكلم على اى حكومة، انا هقلك على حاجة حاول تروح مستشفى حكومى وشوف المرضى اللى هناك عاملين ازاى

انا مستعد احكى على مهازل فى المستشفيات الحكومية

**Ayman_Abdullah** · 17-06-2008 04:26 PM

ياجماعة انا اللى مخوفنى من الموضوع ده ان يصدر امر بتدبير موارد (حقيقية) لتدبير نفقات علاج جو
و اخد بالك من كلمة حقيقية دى اكيد انتو لسسة منستوش امر تدبير العلاوة 30% بان البنزين يغلى
وبالتالى ربنا يستر و الفلوس تقضى المرة دى و مايكونش فيها زيادات تانية فى البنزين عشان انتو عارفين العلاج غلى و ممكن الحكومة تدور على حاجة تبيعها و لو ملقتش ممكن يبيعوا كام مليون مصرى عشان نخلى الفنانين و الفنانات يعيشوا فى تبات و نبات
و ربنا يستر
أدعوا معايا

يارب الفلوس تقضى المرة دى

**wawoo** · 17-06-2008 04:41 PM

المشاركة الأصلية كتبت بواسطة casber

بالله عليك انت بتتكلم على اى حكومة، انا هقلك على حاجة حاول تروح مستشفى حكومى وشوف المرضى اللى هناك عاملين ازاى

انا مستعد احكى على مهازل فى المستشفيات الحكومية

يا اخ محمد ما انا عارف و شوفت المستشفيات الحكومى عملة ازى , و حتى ولدى اتعالج فيها قبل كدة , و شوفت مستشفيات فيها العجب , انا مش معترض على نقدكم للحكومة فى التقصير , ما كلنا عرفين انها مقصرة , انما انا بتكلم عن التوقيت ...يعنى هل احنا مستنيين ان اى شخصية عامة الحكومة قرارت انها تتعلاج على نفقة الدولة عشان نشن كم غضبنا على الحكومة و تقصيرها , مهى دى مش اول مرة فنان يتعالج على نفقة الدولة و مش حتكون الاخير اكيد , يبقى اية لازمتة هذا الهجوم و الرجل بين الحياة و الموت

, ما فى مواقف كتير بتهدر فيها الحكومة فلوسنا و مواردنا و الامثلة كثيرة ,يبقى مجاتش على الكام الف دول اللى الرجل حيتعالج بيهم , يعنى عندك مثلا الغاز اللى حيتباع لاسرائيل بتراب الفلوس دة شوف حيضيع كام على الدول ...مليارات الدولارت ,و احنا هنا بنتكلم فى كام الف , يبقى من باب
اول نشن غضبنا على اللى تسببو فى ضياع هذة الموارد و نحاسبهم . ولا اية رايكو

**Ahmed Samy** · 17-06-2008 04:46 PM

المشاركة الأصلية كتبت بواسطة wawoo

يبقى من باب
اول نشن غضبنا على اللى تسببو فى ضياع هذة الموارد و نحاسبهم . ولا اية رايكو

ما احنا بنعمل كده أهو

و للا دي مش موارد ضايعة ؟؟؟

و للا قصدك مادام كام ((مليون مش الف على فكرة)) يبقى عادي ..نديها طناش

**mokhtar** · 17-06-2008 05:28 PM

ا.احمد سامى ..انت جبت من الاخر ... بالنسبه لموضوع العلاج على نفقه الدوله لازم تجيب تاشيره من السيده الفاضله فيفى عبده ...هتتعالج احسن علاج

**meza** · 17-06-2008 05:34 PM

ولا فيفى عبده ولا غيره

المخرج يوسف شاهين محدش ينكر إن ليه بصمته فى السينما المصرية.
حضراتكم مش بتحبوه دى مش مشكلته ..... أى حد ليه نفس مكانة يوسف شاهين كان هيتعالج على نفقة الدولة
و لا هى جت عليه ...

معلش بلاش نقول كلام و السلام ..... مش عشان يوسف شاهين إتعالج على نفقة الدولة يبقى كل الشعب المصرى يتعالج على نفقة الدولة.
صحيح فى لعب فى الموضوع ده لكن ده مش ذنب الراجل.

سبحان الله

كل مشاكل الفساد اللى فى البلد إتفتحت فى الموضوع ده لمجرد ذكر إن يوسف شاهين إتعالج على نفقة الدولة

كأن الراجل هو اللى نهب فلوس البلد كلها

يا ريت نوزن الأمور بحكمة أكتر من كده

**Ahmed Samy** · 17-06-2008 06:15 PM

المشاركة الأصلية كتبت بواسطة meza

معلش بلاش نقول كلام و السلام ..... مش عشان يوسف شاهين إتعالج على نفقة الدولة يبقى كل الشعب المصرى يتعالج على نفقة الدولة.

لأ مش معلش يا ميزا

مادام في مواطن بيتعالج على نفقة الدولة يبقى كل مواطن ليه نفس الحق

و لو كانت الميزانية لا تسمح بعلاج الجميع يبقى الأولوية للحالات الخطيرة

م يكون الانتقاء أعمى بدون تدخلات

و الا بقى ............ الناس الغلابة (الي مايتعالجوش على نفقة الدولة لأنهم لا طائل من حياتهم) مايدفعوش تأمينات و لا معاشات ولا ضرائب و لا جمارك و لا دمغات ولا تأمين اجباري

يدفع ليه مادام مش هاياخد ؟؟؟؟؟

و مادام مش مهم و مش مؤثر زي المخرج الألمعي العالمي الدولي المش ممكن اللي ماحدش فاهم حاجه منه

يبقى خلاص سيبونا في حالنا نأكل خشاش الأرض و عالجو شاهين و صحبته من ضرايبهم