المخرج يوسف شاهين يسافر للعلاج على نفقة الدولة

**Fouad Ezz** · 17-06-2008 07:18 PM

انا متعجب من أراء بعض الناس التي هي ضد التيار تماما وتشعرنا جميعا اننا مش شايفين حاجه وكانهم يتكلمون عن بلد غير البلد وحكومة غير الحكومة .... في بلد فيها مبدأ (إللي معاه فلوس يتعالج ... وإللي ممعاهوش يغور في داهية يموت) يبقي لازم ده ينطبق علي الكل .....
مش القادر يتعالج علي نفقة الدولة ..... والفقير الغلبان اللي دافع من دمه يموت (إهمالا) .......... حسبنا الله ونعم الوكيل في كل مسئول يتعامل مع الشعب علي أنهم (ليس لهم قيمة فنية!!!!)

**meza** · 17-06-2008 07:33 PM

المشاركة الأصلية كتبت بواسطة Ahmed Samy

لأ مش معلش يا ميزا

مادام في مواطن بيتعالج على نفقة الدولة يبقى كل مواطن ليه نفس الحق

و لو كانت الميزانية لا تسمح بعلاج الجميع يبقى الأولوية للحالات الخطيرة

م يكون الانتقاء أعمى بدون تدخلات

و الا بقى ............ الناس الغلابة (الي مايتعالجوش على نفقة الدولة لأنهم لا طائل من حياتهم) مايدفعوش تأمينات و لا معاشات ولا ضرائب و لا جمارك و لا دمغات ولا تأمين اجباري

يدفع ليه مادام مش هاياخد ؟؟؟؟؟

و مادام مش مهم و مش مؤثر زي المخرج الألمعي العالمي الدولي المش ممكن اللي ماحدش فاهم حاجه منه

يبقى خلاص سيبونا في حالنا نأكل خشاش الأرض و عالجو شاهين و صحبته من ضرايبهم

لو حضرتك ضد مبدأ إن القادرين ميتعالجوش على نفقة الدولة مهما كانت مكانتهم فى البلد ..... يبقى أنا موافقك تماماً.

لكن أنا كان كل قصدى إشمعنى !!! لما المخرج يوسف شاهين إتعالج على نفقة الدولة إتكلمنا و لما غيره (زى دكتور أحمد شفيق و غيره) إتعالج مفتحناش بقنا.

اللى بيحصل مع يوسف شاهين ده و غيره كتييير ... أنا حاسس إنه نوع من المجاملة .... طبعاً على قفا الشعب.

بس أهو خلى اللى يجامل يجامل ... هو حد يقدر يتكلم.

عامة الراجل حالته خطيرة جداً فى فرنسا و ربنا يقومه بالسلامة و يشفيه و يشفى كل مريض.

**OlaOsman** · 17-06-2008 10:55 PM

يوسف شاهين يعتبر فعلا من القادرين.. امبارح كانوا بيسألوا ممدوح الليثي على الإجراءات اللي هاتعمله نقابة السينمائيين عشان يوسف شاهين و سألوا بالتحديد عن المساعدة المادية في العلاج فقال يوسف شاهين مش محتاج مساعدة من أي جهة.. يوسف شاهين مقتدر و الحمد لله مش محتاج مساعدات.

**Ahmed Samy** · 17-06-2008 11:46 PM

المشاركة الأصلية كتبت بواسطة meza

لو حضرتك ضد مبدأ إن القادرين ميتعالجوش على نفقة الدولة مهما كانت مكانتهم فى البلد ..... يبقى أنا موافقك تماماً.

لكن أنا كان كل قصدى إشمعنى !!! لما المخرج يوسف شاهين إتعالج على نفقة الدولة إتكلمنا و لما غيره (زى دكتور أحمد شفيق و غيره) إتعالج مفتحناش بقنا.

اللى بيحصل مع يوسف شاهين ده و غيره كتييير ... أنا حاسس إنه نوع من المجاملة .... طبعاً على قفا الشعب.

بس أهو خلى اللى يجامل يجامل ... هو حد يقدر يتكلم.

عامة الراجل حالته خطيرة جداً فى فرنسا و ربنا يقومه بالسلامة و يشفيه و يشفى كل مريض.

أنا أقصد كده فعلا

و ليس من الصواب علاج المقتدرين على حساب الشعب الغير مقتدر أساسا

اللي قوم الدنيا بقى ان شاهين شخص غير محبوب لعامة الناس فالخبر جه على جرح يعني

اضافة الي الأحوال الاقتصادية المتردي حديثا (حتى الحكومة أعلنت ان مافيش موارد)

بالاضافة الى تفصيل الخبر و كل مابه من استفزاز لكل مواطن بسيط .. التفاصيل من نوع طيارة الماني أصل الفرنساوي هاتتأخر و مدير شركة ايه كان بيخدم على الطيارة و جوز الدكاترة الألمان اللي هيراعوه في الطيارة و كده يعني !!!

**MoToRiZeR** · 18-06-2008 12:56 AM

يا جماعة انتوا زعلانين من ايه .. بيقولولكم علاج علي نفقة الدولة .. هوا في حد فيكم من الدولة ولا تكونوش فاكرين البلد دي بتاعتنا لا سمح الله ؟

في الدول المحترمة .. مفيش مريض بيموت عشان ممعهوش تمن العلاج
انا شفت قبل كدة تقرير عن الضمان الصحي في كندا و انك كدة كدة بتتعالج علي نفقة الدولة .. و المسئول قال " أحط الأخلاق انك تعمل بيزنس علي شخص مريض لأن ذلك أشبه بأن تساومه علي حياته"

عمر حد فيكوا سمع ان اي فنان امريكي مثلا اتعالج بقرار خاص من الحكومة !؟
القرار ده معناه "الراجل ده احنا بنقدره ولا يمكن يتعالج زي الغوغاء التانيين لا عايزين نكرمه و يقوملنا تاني مش يخرج علي نعش!"

بالمناسبة انا بحب يوسف شاهين جدا جدا جدا و بتمناله الشفاء

**Ahmed Samy** · 18-06-2008 01:05 AM

المشاركة الأصلية كتبت بواسطة MoToRiZeR

القرار ده معناه "الراجل ده احنا بنقدره ولا يمكن يتعالج زي الغوغاء التانيين لا عايزين نكرمه و يقوملنا تاني مش يخرج علي نعش!"

انت بتهزر .... قوللي ان دي كانت تريقة

**Goodle** · 18-06-2008 09:35 AM

إلهي يا رب تعوّض عليا عوض الصابرين.. آمين

**M_55** · 18-06-2008 09:40 AM

ربنا لا تؤاخذنا بما فعل السفهاء منا

**AHMED900** · 18-06-2008 10:11 AM

والله حاجه تطلع الواحد من هدومه

هو ناقص فلوس عشان يتعالج على نفقة الدولة

**hesham2004** · 18-06-2008 10:15 AM

الواحد عاوز بس يحس انه لو حصله ازمة صحيه ما يقدرش على تكاليف علاجها ، يحس انه حيلاقى رعاية طبية آدمية عادية و ما يتسبش يطلع فى الروح زى كلب او قطة خبطتها عربية فى الشارع . فى حين انه شايف ان فى شخص تانى انعم الله عليه ( او ابتلاه الله ) بالشهرة او الأهمية بيهتم به من الدولة شخصيا .
والله لو الناس حست انها بتتعامل كويس فى موضوع الرعاية الطبية ده ، مش حتتكلم و لا حتعلق على خبر زى ده حتى و لو كان رايح يتعالج من شوية صداع .