تيدا 1800 و نيسان صنى الجديدة ( تجربة )
السلام عليكم يا صقور نيسان.
من كام يوم كنت عاوز عربية أيجار لمدة أسبوعين.............على شرط أنها تكون بشنطة.
المهم حصل مشكلة عندهم و أدولى تيدا 1800 لمدة 3 أيام لحد الصنى ما ترجع.
أستلمت التيدا ماشية 1650 كيلو و رجعتها النهاردة ماشية 2250 كيلو تقريباً.........يعنى مشيت بيها 600 كيلو.
التيدا كان فيها أيرباج للسواق بس.
النهاردة أستلمت الصنى ماشية 1250 كيلو و لحد دلوقتى مشيت بيها حوالى 120 كيلو ( علشان شغلى فيه سفر كتير شوية )
الصنى 2 أيرباج للسواق و الراكب الأمامى
العربيتين مفيهمش abs............جربت العربيتين على رمل فوق الأسفلت و فرامل جامدة و مفيش abs اشتغل
أنطباعاتى الأولية عن الصنى
1- أثبت سنة بسيطة من التيدا
2- تسارع كويس رغم أنها مش 1800
3- الشنطة بتفتح بزرار فى الريموت ( بيفتح الشنطة لفوق..........مش مجرد لوك الشنطة )
4- تكييف التيدا أحسن بشوية كويسين مش عارف ليه.
5- التيدا من جوة و برة أحلى كتير من الصنى ( و دى أزواق )
6- حاسس أن العزل فى الصنى أحسن من التيدا.......يعنى التيدا كنت بسمع صوت الموتور من جوة المقصورة و فى الصنى تقريباً مفيش صوت.
7- الفرامل فى الأتنين كويسة بس حاسس الصنى على الفرامل على السرعات العالية ماسكة نفسها أكتر من التيدا شوية صغيرة..........الأتنين مع الفرامل على 100 أو 120 بيلعبو شوية.......و ده غالباً بسبب عدم وجود أنظمة فرامل مساعدة.
دى أنطباعات أولية لحد ما أفضى و أعمل موضوع عن كل واحدة فيهم إن شاء الله
