السلام عليكم و رحمة الله و بركاته ...........................

نظرا لدعوة صديقى محمد مصطفى لضرورة القراءة و المشاركة فى هذا الموضوع إلى جانب أهمية عمل هذا الشىء بدون دفع أو توصية من أحد مع حفظ كامل الألقاب و مع كامل الإحترام للجميع لإن هذا سينعكس بالإيجاب على قسمنا العزيز قسم كيا و مع كامل الإعتراف منى بالتقصير فى حق القسم و فى حق أعضاءه الكرام و بالتباعية فى حق نايل موتورز فقد قررت المشاركة مع باقى إخوتى الأفاضل الذين يريدون النهوض بمستوى القسم و إنعاشه مرة أخرى و جعله من الأخر كايدهم كلهم ................. مش عارف أنا بقيت بتكلم كده ليه تقريبا من كتر مشاهدة برامج التوك شو يارب توب علينا بقى .


أنا عندى إقتراح نظرا لحالة الديموقراطية التى تعيشها البلاد و نظرا لما نعيشه من قهر قهرى فى إنتخابات الرئاسة و هذا الإقتراح كالتالى :

1 -الأعضاء الكرام ممن يرون فى أنفسهم المقدرة بفضل الله تعالى لتولى منصب منسق عام القسم فى الفترة القادمة يقدمون أوراق ترشحهم لباقى الأعضاء و يتم الإختيار عن طريق إنتخابات حرة نزيهة و لنجعلها المرة الأولى فى تاريخ مصر لتكون هنا فى نايل موتورز و بالأحرى و بالتحديد فى قسم كيا قسم النمور الضارية

2-نقوم بتكوين لجنة لمباشرة العملية الإنتخبية و أكيد هتكون مكونة من ( أ/ كريم منير ) بصفته الإدارية و الإجتماعية و الإقتصادية وألصيفية و الشتوية ( ماشاء الله لا قوة إلا بالله ) و كذلك ( أ/ وائل أبو ليلى ) بصفته العمدة و المنسق العام السابق و أكيد العبد لله أنا واحد منهم ( علشان أنا صاحب الفكرة هههههههههه دا لو إتوافق على الفكرة من الأساس يعنى (يارب يوافقوا ) ) هذه اللجنة مسئولة عن فرز المرشحين و تنسيق العملية الإنتخابية بكل نزاهة و شرف .

3- يقوم المرشحين بعد إعلان العدد النهائى لهم بعمل الدعاية الخاصة بيهم و أختيار الفريق المعاون و أفراد الحملة المسئولين عن الترويج لهم و يقوموا بعرض برنامجهم الإنتخابى للنهوض بالقسم و زهزهته و فرفشته و إرجعاه لسابق عصره و ليكن شعارنا فى الفترة القادمة ( طويل العمر يزهزه عصره و ينصره على من يعاديه ....... هاى كيا ) ( بس ياريت رجاء خاص للسادة المرشحين بقى مش عايزين نكتشف إن فيه واحد والدته وأو والده و أو زوجته تحمل جنسية غير مصرية أو مزدوجة - أو عليه أقساط و ماضى على نفسه كمبيالات للبنوك على بياض أو مثلا مادفعش الإشتراك السنوى بتاع المنتدى أو مش حاطط إستيكر المنتدى على عربيته أو معندوش عربية أصلا ) على العموم كل الشروط ده هيتم الإعلان عنها فى وقتها .

4 - بعد تحديد موعد الإنتخاب سيتم التنسيق مع أبو ليلى لتنظيم مقابلة كبيرة سوف تكون بإذن الله هى الأكبر فى تاريخ المنتدى و الدعوة عامة و هتبقى قشطة إن شاء الله لبدء العملية الإنتخابية تحت إشراف القرصان محمد شنورى و هو المسئول عن تأمين العملية الإنتخابية تأمينا كاملا ( سامعنى يا عمى شنورى .......... صباح الفل ) ( على فكرة المقابلة غير مختصرة فقط على أعضاء قسم كيا و لكنها لك المصريين قصدى لكل المصريين المشتركين فى نايل موتورز و ممكن كمان يتم التصويت للمغتربين عن طريق ال SMS ( مساء الفل يا حسام باشا يا أوبتراوى مش ناسيك أنا يا حيبى )

5- يتم فرز الأصوات بعد الإنتهاء من التصويت فى نفس اليوم تحت أنظار و أسماع الحضور و كذلك تحت مراقبة عدسات كاميرات موبيلات الناخبيين و كاميراتهم الخاصة سواء كانت بروفيشينال أو سيمى بروفيشينال و كله موثق و هيتم رفعه على اليوتيوب و على المنتدى نفسه .

6- يتم إعلان النتيجة النهائية إما بفوز مرشح واحد بنسبة 50 % أو أكثر أو سنلجأ لمرحلة الإعادة إن لزم الأمر لذلك و هتكون برده فى نفس اليوم .

7- سيتم إعلان الفائز بالمنصب فى نفس اليوم حتى لو إضطررنا للجوء للتزوير و بلا نزاهة بقى بلا ديموقراطية خلينا نخلص بقى إحنا مش فاضيين نعمل مقابلة تانية و كما علشان شنورى يرجع لثكناته قصدى يعنى يرجع للإجتماعى بتاعه بقى الراجل الله يكون فى عونه هيبذل مجهود ضارى لإنجاح هذه العملية
و كان الله بالسر عليم و السلام عليكم و رحمة الله و بركاته .

[bor=#ff0000]منتظر ردود أفعالكم و خليكو فاكرين إننا قمنا بثورة علشان عيش ........ حرية .......... عدالة إجتماعية و ديموقراطية و منسق عام كيا [/bor]