المشاركة الأصلية كتبت بواسطة abuhusam
واحدة واحدة يا جماعة.. الحكاية فعلاً عرض وطلب.. هما بيعملوا كدة علشان حجوزات العربية أكتر من المتاح حالياً.. طيب ها هايرتبهم إزاي؟ بأسبقية الحجز؟ ها تدخل الواسطة والمعارف والأسبقية هاتتغير.. ده غير إن فيه ناس هاتبقى حاجزة في الأول لكنها مش مستعجلة أو مش فارقة معاها في شهرين أو ثلاثة.. وواحد تاني مستعجل أو مستعد يدفع أكتر ويستلم فوراً.. مع الاثنين بالتأكيد معاهم عربيات وعربيات كويسة كمان يعني مش ماشيين حافيين!
ببساطة التوكيل بيقول ليه يضيع على نفسه فرصة مكسب أعلى..فبيعطي أولوية للي مستعجل ومستعد لدفع مبلغ أكبر.. والمشكلة فعلاً مش عندهم المشكلة عندنا احنا.. ما دام فيه مشترين يدفعوا أكتر بس ياخدوا قبل غيرهم..
في أروبا والدول المتقدمة بيعملوا العكس تماماً.. لما تبقى الحاجة لسة نازلة جديد وعاوزين يبيعوا منها بيعملوا تخفيض على السعر لمدة معينة ويقولك لو اشتريت النهاردة أو خلال أسبوع ها تاخد خصم 25 % مثلاً.. ولو جيت بعد أسبوع ها تاخد 10 % بس ولمدة شهر وبعده هاتشتري بالسعر الأصلي.. يعني هو اللي بيدور على العميل وبيحاول يجذبه وده علشان المعروض كتير ومتنوع وتنافسي.. وفي نفس الوقت المشتري مش ملهوف على السلعة وبيفكر بعقل وبشكل عملي.. يا ترى هو محتاج القميص أو الموبايل أو العربية دي بسرعة قوي فيروح يحط الفلوس اللي معاه فيها دلوقتي؟ ولا ينتظر لما يبقى محتاجها فعلاً ويكون معاه تمنها وقتها؟