الكاوتش بدأ ينمل... تنصحونى بإيه

**mmh666** · 10-06-2012 02:32 PM

السلام عليكم

الكاوتش اللى قدام يمين كان على طول بيهوى فرحت أشوفه لقيت فيه خرمين صغيرين و الراجل وهوا بيعملهم قالى الكاوتش بدأ ينمل و ورانى فى الكاوتش....
طبعا قالى المفروض كنت تعمل روتيشن للكاوتش كل عشر الاف كيلو !!!! لما كنت فى التوكيل قلتلهم نعمل روتيشن للكاوتش (صيانة العشر الاف) قالولى يفضل انك متعملش روتيشن

عايز رايكو دلوقتى أغير الفردة دى بس و لا لازم الاتنين اللى قدام و لا الاربعة كلهم
و ايه أفضل الانواع اللى موجودة فى السوق دلوقتى لاستخدام جوه البلد الاسكندرية و سفر مرة واحدة فى الشهر .... مش مهم الاسعار المهم الكفاءة و يكون بنفس مقاس الكاوتش القديم

جزاكم الله خيرا

**mmh666** · 11-06-2012 12:40 PM

شكرا ليكو يا جماعة على الردود المفيدة دى .... اه نسيت اقول ان العربية عاملة 23 الف كيلو بس

**akerima** · 11-06-2012 01:47 PM

لو العربية عاملة 23000 بس يبقي موضوع تنميل الكاوتش دا حاجة غريبة شوية ياريت تاخد راي حد تاني غير بتاع الكاوتش دا ويا ريت تروح اي فرع من فروع بريدجستون وتشييك علي الكاوتش وتعمل اللي يشوروا عليك بيه لاني مستبعد كتير موضوع تنميل الكاوتش وانت لسه يعتبر مامشتش عليه

**mmh666** · 11-06-2012 02:59 PM

المشاركة الأصلية كتبت بواسطة akerima

لو العربية عاملة 23000 بس يبقي موضوع تنميل الكاوتش دا حاجة غريبة شوية ياريت تاخد راي حد تاني غير بتاع الكاوتش دا ويا ريت تروح اي فرع من فروع بريدجستون وتشييك علي الكاوتش وتعمل اللي يشوروا عليك بيه لاني مستبعد كتير موضوع تنميل الكاوتش وانت لسه يعتبر مامشتش عليه

على فكرة انا كنت الاول فى بريدجستون لوران اللى عندنا هنا فى اسكندرية و لما شافوا الاخرام قالولى مش هينفع نعملها تيب توب عشان صغيرة فدلونى على واحد كويس يعرفوه عشان يعملهولى فعمل اللحام العادى و قالى على الموضوع ده ..... و قالى كمان انا ممكن اعملك الخرم بتاع النتميل ده بس هيطلع فى اماكن تانية حتى قالى ممكن اخليلك الكاوتش داخلى قلتله لأ سيبه تيوبلس زى ما هوا فقالى خلاص تستحمل انك تزود الكاوتش كل 3 ايام عشان موضوع التنميل ده!!!

طب يا جماعة ممكن ان الكاوتش عشان متعملوش روتيشن قبل كده فأثر على على الكاوتش اللى قدام؟؟
و لو هيتغير ايه الأنواع الكويسة اللى موجودة فى السوق واللى مقاسها نفس مقاس اللوجان ؟؟
ياريت لو حد عنده تجربة مع تغيير كاوتش اللوجان يقولى عليها.....

**amr.elsayed** · 11-06-2012 03:17 PM

انا مش فاهم يعنى ايه ينمل

**mmh666** · 11-06-2012 03:42 PM

المشاركة الأصلية كتبت بواسطة amr.elsayed

انا مش فاهم يعنى ايه ينمل

على حد فهمى اللى فهمته من الراجل بيطلع فيه اخرام صغيرة اوى و دا بيدل على ان عمره الافتراضى بدا ينتهى

**amr.elsayed** · 11-06-2012 06:51 PM

المشاركة الأصلية كتبت بواسطة mmh666

على حد فهمى اللى فهمته من الراجل بيطلع فيه اخرام صغيرة اوى و دا بيدل على ان عمره الافتراضى بدا ينتهى

بص انت تفك العجلة المنملة دى وتصلحها كويس وتعملها استبن وتركب الاستبن مكانها
يقولك منمل يقولك مصرصر ماتغيرش الكوتش قبل 40 الف كيلو ... قبل كدة يبقى بدرى جدا

**akerima** · 12-06-2012 09:58 AM

المشاركة الأصلية كتبت بواسطة amr.elsayed

بص انت تفك العجلة المنملة دى وتصلحها كويس وتعملها استبن وتركب الاستبن مكانها
يقولك منمل يقولك مصرصر ماتغيرش الكوتش قبل 40 الف كيلو ... قبل كدة يبقى بدرى جدا

دا اللي بحاول اقولة من الصبح - صعب اوي الكاوتش ينمل بعد 23000 كيلو بدري اوي

عموما لصاحب الموضوع انا فعلا غيرت ال 4 كاوتش عند بريدجستون لوران لما عملت ال 40000 وجبتهم مقاس مختلف شوية عن اللي فيها 195/60/15

وفعلا المقاس دا طلع ممتاز مكلبش العربية في الارض ماشاء الله وموضوع انها كانت بتهيس منك وانت ماشي لما يبقي الهوا جاي في وشك دا انتهي تماما دا غير ان بريدجستون انعم واخف بكتير من اللي كان راكب فيها فالاحساس بالعربية بيبقي شئ مختلف تماما والمفاجاءه بقي الباور بقي ممتاز واخف بكتير من الاول بسم الله ماشاء الله

فلو تستحما فعلا تقعد بالكاوتش بالمنظر دا لغاية ال 40000 يبقي احسن وعشان كمان تتاكد من موضوع التنميل انصحك تروح عند بتاع الكاوتش اللي في سموحة بعد زهران وانت طالع علي النزهة في محطة بنزين التعاون اللي علي الشمال - دا راجل ممتاز وامين جدا وممكن تلاقي عنده حل كويس

او الراجل اللي في اسكندر ابراهيم وانت طالع علي البحر علي اليمين ادام سوبر ماركت ميامي

الاتنين ممتازين وامناء وحيجبولك من الاخر

**mmh666** · 12-06-2012 09:59 AM

المشاركة الأصلية كتبت بواسطة amr.elsayed

بص انت تفك العجلة المنملة دى وتصلحها كويس وتعملها استبن وتركب الاستبن مكانها
يقولك منمل يقولك مصرصر ماتغيرش الكوتش قبل 40 الف كيلو ... قبل كدة يبقى بدرى جدا

شكرا ليك على الفكرة...
طب ايه رايكو اصلح الفردة دى و بعدين اعمل روتيشن و ارجعها ورا و اسيب الاستبن زى ما هوا

**amr.elsayed** · 12-06-2012 04:24 PM

المشاركة الأصلية كتبت بواسطة mmh666

شكرا ليك على الفكرة...
طب ايه رايكو اصلح الفردة دى و بعدين اعمل روتيشن و ارجعها ورا و اسيب الاستبن زى ما هوا

هو موضوع الروتيشن دة بيختلف من واحد للتانى .. زى ما تقول موضوع محير التوكيل والكتالوج مش بينصحوا بعمل الروتيشن
لكن لما تفكر فيها تلاقى ان الروتيشن دة حاجة درورية علشان الكاوتش يتاكل بصورة متساوية فى الاربع عجلات على مدار عمره
.............
انا عن نفسى بعتبر انى بعمل نص روتيشن ... ببدل العجلتين اللى ورا بالعجلتين اللى فى الامام
الخلف يمين بالامام يمين
والخلف شمال بالامام شمال
وطالما حضرتك عملت 20 الف كيلو على نفس الوضع ممكن تكمل ال 20 الف تانين بنفس الاسلوب اللى بقول عليه
بحيث العجلتين اللى فى الخلف يركبوا فى الامام تقريبا نفس الفترة اللى ركبوا فى الخلف والعكس طبعا للعجلتين اللى فى الامام
................
ورصص بالمرة وانت فاكك الاربع عجلات علشان ماتفكش تانى لفترة محترمة