العروسة طلع عندها تلاتين سنة

**Ghosts** · 12-06-2012 01:55 AM

جرب كدة تروح لوالدتك و قولها أنك عايز تتجوز واحد عندها تلاتين سنة علطول هتلاقى الوش دة
و هيدور بينك و بين الوالدة الحوار اللطيف دة:

الوالدة: أية!!!! 30 سنة؟؟!! دة أنت نهارك مش معدى ...
أنت : أية المشكلة بس يا ماما؟؟!! هو أنا بقولك أنها أطلقت 7 مرات؟؟!!

الوالدة: يابنى يبقى أنت عندك 34 سنة وتروح تتجوز واحدة عندها 30؟؟!!
أنت: بحبها يا ماما ....

الوالدة: حب أية جتك 60 نيلة ... اللى فى سنك يشوف لة واحدة عندها 24, 25 مش تلاتين يا أهبل ....
عارف أن البنت لما تعدى التلاتين فرص الحمل عندها بتقل ولو خلفت هتلاقيه كبرت 10 سنين؟؟!!
أنت : يا ماما الحاجات دى بتاعت ربنا مش بالسن ....

الوالدة: أنا مش عايزة كتر كلام ولو ركبت دماغك مش هحضر لك فرح ولا هدخلك بيت ....
أنت :

أية رأيكم يا جماعة فى الكلام دة؟؟!!
أية هى سلبيات الأرتباط بزوجة تكون عدت التلاتين؟؟!!

هل بيبقى صعب التعامل مع البنت فى السن دة؟؟!!
ولا التعامل مع أى بنت صعب بردوة حتى لو كانت فى أوائل العشرينات؟؟!!

**Raul_7** · 12-06-2012 02:04 AM

ده متزعلش مني فكر تقليدي, أنا مش فاهم ارتبط بواحدة أقل مني ب 10 سنين ازاي!

و بصراحة أنا شايف الجواز ده موضوع شخصي طالما البنت كويسة.

**lad** · 12-06-2012 02:06 AM

السن مجرد رقم

**Ghosts** · 12-06-2012 02:08 AM

المشاركة الأصلية كتبت بواسطة raul_7

ده متزعلش مني فكر تقليدي, أنا مش فاهم ارتبط بواحدة أقل مني ب 10 سنين ازاي!

و بصراحة أنا شايف الجواز ده موضوع شخصي طالما البنت كويسة.

دة فكر كل الأمهات المصريات ....
ومش هينفع تتجوز ضد رغبة والدتك و تقولها دة موضوع شخصى ....

**Ghosts** · 12-06-2012 02:10 AM

المشاركة الأصلية كتبت بواسطة lad

السن مجرد رقم

مفيش أم مصرية بتقتنع بالكلام دة ....

**friendship7897** · 12-06-2012 02:30 AM

بصوا يا شباب - ,والدة ghosts عندها حق - يعني أيه واحد عنده 34 يتجوز واحدة عندها 30 - هو المناسب له 24 أو 25 - هو فرق السن بينهم مش كبير من 30 لـ 34 - لكن المشكلة مش فرق السن - المشكلة إني عايزة أفرح بابني - فزوجته في الوقت دا هتكبر قبله - ومعنى كدة أنه مش هيتهنى مع واحدة كبيرة - أنا بتكلم كدة لأن الزوجة وهي عندها 22 سنة غير الزوجة اللي عندها 30 أو 35 - أنا بتكلم عن تجربة - كان الواحد في الأول يتحرك ويضحك ويخرج ويشتغل ويفرح ويحمل ويخلف بتعب أقل بكتيييير من لما يكبر سنة في سنة في سنة - لما الواحد بيكبر شوية بيأثر في كل دا شوية بشوية - وغصب عن الواحد - لأن السن ليه حكمه - أنا مش بعيب على اللي عندها 30 ا - لأ أنا عايزة بس أفرح بأبني ويكون متهني شوية على ما تكبر سنة بسنة لاغية ما توصل للـ 30 اللي هو عايز يبدأ بيها .

علماً بأن أختي أتجوزت وهي صغيرة وسافرت لتركيا ولكن لصغر سنها وغربتها أطلقت ورجعت أتجوزت مرة أخرى وهي في سن ال30 ومطلقة كمان ، وزوجها 32 والحمد لله حياتهم سعيدة وبدون مشاكل والآن حامل - ربنا يرزقها الذرية الصالحة - وكان أهل جوزها رافضين ولكن جوزها تمسك بها ، فلكل قاعدة إستثناءات والأصل في الإستثاء دا - الراجل المحب

**amr.elsayed** · 12-06-2012 02:47 AM

وانت رايك فين فى كل دة ؟؟؟؟؟؟؟؟؟؟؟؟؟؟؟؟؟؟؟؟؟؟؟؟
................
انا ممكن اتجوز واحدة اكبر منى كمان
دة لازم يكون قرارك انت علشان مافيش حد حيتحمل مسؤولية هذا القرار غيرك
ممكن والدتك تساعدك فى حالة واحدة .. لو حتتجوز صالونات .. ساعتها كدة ماشى لانك عجزت فى انك تلاقى شريكة
حياتك بنفسك فا ممكن تستعين بخبرة والدتك فى البحث والاختيار وطبعا لازم يكون قرارك مش واحدة عجبت الوالدة يبقى خلاص
لازم تكون مقتنع 100 * 100 بالانسانة دى .... غير كدة يبقى فاكس

**Screenplays** · 12-06-2012 02:48 AM

فكر الاهالي المصريه فكر عقيم

فكرتني برضه كنت عايز ارتبط بواحده جارتي اكبر مني ب 5 سنين

امي جرت ورايا بالشبشب ههههههههههههههههههههههههه هه

و دلوقتي عايز اتجوز واحده امريكيه و اكبر مني ب 7 سنين

الحاجه ممكن تقتلني المره دي

فكر الاهالي هنا فكر قديم و عقيم

**hugan** · 12-06-2012 03:02 AM

والدتك معاها حق ياجوست
لو كان الحوار بينك وبينها
في رائي احسن فرق بين الراجل وزوجته 10 سنين
تبقي فل قوي
ليه بقي ولنفترض انك عندك 30 سنه وهي 20 سنه
اولا عقلك فارق عنها مراحل
تقدر تشكلها وتطبعها بطبعك
فسيولوجي
الست بتكبر بسرعه وتعجز قبل الراجل
احساس الست بان زوجهاا يكبرها في السن ومش من دوره
تلغي موضوع النديه
انا من دورك ومن سنك او اكبر منك في السن بيكون في احساس بالنديه او مفيش فرق

انا مش مقتنع ان السن بين الزوجين يكون متقارب