الموضوع: ALL ABOUT HONDA CITY 2010

[frame="7 80"]

السلام عليكم ورحمة الله وبركاته
مبدئيا أعرفكم بنفسي أنا طبيب أسنان أحمد الفيومي.

لاحظت إن مافيش ولا موضوع مثبت عن الرائعة هوندا سيتي. ولقيت فعلا إن مافيش تقرير مفصل عن العربية دي موجود يصلح إنه يبقى مثبت. وطبعا عيب قوي إن عربية من عربيات الهوندا ما يبقاش ليها موضوع مثبت. ولقيت إن كل الناس اللي بتدخل تدور على معلومات عن العربية ما بتلاقيش موضوع كافي عنها. فقررت والإستعانة بالله عمل الموضوع ده. عل وعسى إنه يثبت ويكون مرجع لكل الناس اللي بتسأل عن العربية دي اللي للأسف مش واخدة حقها صح.

منذ عام ونصف تقريبا بدأت رحلة البحث عن سيارة وكان ليا عدة مواصفات في السيارة اللي حشتريها. وكانت المقارنة تتركز في اللانسر البومة و السيراتو والإلنترا والأوكتافيا الإيه فور وكنت متحير جدا. فجأة بتكلم مع مريض عندي في العيادة وقال لي ما تشوف هوندا. وفورا قررت هوندا سيتي وعملت إستخارة وربنا سهل وكرم بيها.

أنا كنت بأجر عربيات كتير قوي لحد ما ربنا كرمني واشتريت السيتي من سنة ونصف بالظبط. عشان كده حقارن عربيتي بالعربيات اللي ركبتها من غير أي تحيز إطلاقا. مع العلم إني كنت بأجر العربيات اللي لسه زيرو يعني لسه ما إتهانتشي.

دلوقتي عملت بيها تقريبا 15 الف كيلوا وده حيكون تقرير عملي مش نظري. يعني مش حشرح الحاجات اللي في الكتالوج والأرقام اللي بتوجع الدماغ. أنا حقول تقرير موضوعي عملي بحت عن العربية دي عملت معايا إيه وإيه ظروفها في السنة ونص اللي قعدتها معايا.

　

مبدئا هي مش متصنعة في اليابان زي السيفيك. هي هوندا بس متصنعة في تايلاندا تحت إشراف من هوندا. ودي نقطة كتير قوي بياخدوها ضد العربية دي. رغم إنها زي ما حنشوف تنافس كل العربيات الياباني اللي في فئتها زي الانسر مثلا. واضح جدا إشراف هوندا الصارم عليها في كافة تفاصيلها.

مش عارف ليه في ناس مخنوقة من النقطة دي رغم إن الكورولا الجديدة في جنوب إفريقيا والباسات في البرازيل والسي كلاس والإي كلاس في مصر.

بالنسبة للشكل لا يختلف عليه إثنان أبدا. شكل قوي شرس مميز (وعدم إنتشارها بيخلي الواحد مميز في رأيي).

　

بس لما تيجي تبص لها من ورا........ بصراحة مش لايق على الشكل من الأمام (والظاهر إني دي سياسة هوندا الجديدة في العربيات).

　

من الداخل فهي مقصورة رياضية أساسا بطابع فخامة. واسعة ورحبة ومريحة وبترحب بيك بعد يوم متعب في الشغل.

　

　

أول ما تركب العربية تحس برحابة المقصورة الداخلية ووسعها. أوسع من أي عربية في فئتها (على حد علمي).

بعد ما أقعد وأظبط الكرسي بتاع السواق (أنا طولي 185سم) برجع أقعد ورا مرتاح تماما. هي أوسع من الكورولا الجديدة ومن الكروز ومن اللانسر البومة ومن السيراتو.

بالنسبة للوحة العدادات فهي واضحة جدا بإضاءة برتقالية اللون مريحة للعين.

بالنسبة لدرج الطابلوه فكتير قالوا عليه صغير، رغم إنه ياجماعة درج قفازات أساسا مش درج مكتب. ورغم ذلك أنا حاطط فيه عدد 2 زجاجة برفان من الحجم المتوسط، مصحف متوسط الحجم، عدد 2 نظارة شمسية كبيرة الحجم وفاضل أماكن صغيرة ممكن تزنق فيها ورق أو أقلام أو أي حاجة خفيفة.

　

　

الزجاج الأمامي مساحته واسعة (أوسع من السيراتو). والزجاج الخلفي بيبين الطريق من ورا وإنت سايق وواضح العربيات اللي جاية ورا ولكن لما تيجي تركن وترجع لورا بيبقى رخم و بتحتاج وقت عقبال ما تتعود على أبعادها.

بالنسبة للشنطة فأرجو إنك لا تخدع بحجهما من الخارج. صغيرة من برة وكبيرة وواسعة من جوا.

خامات تقفيل الأبواب (يعني كسوة الباب من الداخل) ليست سيئة ولكن كان ممكن تكون أحسن من كده. وفي جيب جانبي حاطط فيه فوطة قطيفة لتنظيف الطابلوه وملمع أحذية وصاعق كهربائي.أ

تيجي بقى تركب العربية وتدور
صوت موتور حلو في الدوارة الأولى بعد كده بيختفي وبتبقى العربية هادية ومافيهاش أي إهتزاز وصعب قوي تعرف هي دايرة ولا مبطلة. بعتمد على عداد ال RPM عشان أعرف. كتير قوي بتحدى اللي بيركبوا معايا إذا كانت العربية دايرة ولا لأ. وكلهم يقولوا إن العربية مبطلة وأقول لهم إنها دايرة وما يصدقوش غير لما يبصوا على الRBM.

تدوس بنزين وتمشي صوت الموتور يطلع تاني وتسمع زنته. هو صوت حلو على فكرة ودائما يغريك إنك تدوس عشان يعلى وتحس بقوته.

هو موتور 1500 سي سي i-VTEC (لمزيد من المعلومات عن ال i-VTEC برجاء مراجعة باقي المواضيع في قسم الهوندا) عموما الآي في تيك هي تكنولوجيا تستقل بها هوندا فقط وهو تهدف إلى زيادة قوة الموتور مع زيادة عدد لفات الموتور وهو نظام بيشتغل بعد 4500 لفة وبتسمع صوته الجميل وبتحس بيه بينطر العربية لقدام. رغم إن هو 1500 لكن قوي تحسه 1600.

بالنسبة لإستهلاك البنزين فهو موتور إقتصادي جدا ,أنا سواقتي شوية رياضية وبشغل التكييف كتير وأغلب سواقتي داخل المدينة وبستهلك حوالي220 كيلوا لكل 20 لتر. والمتوقع إنه يتحسن بعد ما كملت بيها ال10 آلاف.

التكييف مش قوي في البداية زي الإلنترا أو الأفيو وبتحتاج تخليه على 3 وساعات 4 في الأول عقبال ما يسقع العربية وبعدين بترجع ل 2 أو 1. وفي أيام الصيف الشديدة ما بنزلوش عن 2.

طبعا بتحس لما بتشغل التكييف بفرق بسيط في أداء الموتور. هو بسيط جدا ولكن بتلاحظه. بتحس إن العربية محتاجة سنة بنزين (حلوة سنة دي، ماشية مع مهنتي) زيادة عشان تبقى زي ما إنت متعود عليها من غير تكييف. وطبعا ياجماعة أي تكييف بيأثر على قوة الموتور ( إحنا بنتكلم في عربيات أقل من 2000 سي سي) وبضايق قوي لما بسمع واحد بتاخده الجلالة وبيقول التكيف ما بيأثرشي على موتور عربيتي خالص.

الفيتيس
هو فتيس ذكي أوتوماتيك من 7 سرعات (لوكان الهاي لاين يبقى ستبترونك من 5 سرعات). والظريف في الموضوع إن الفيتيس ده بيطبع بأسلوب القيادة بتاعك. يعني مثلا لو جيت في مرة تشد بالعربية وقعدت فترة متهيأ لي أكتر من 5 دقايق بتسوق بأسلوب رياضي، الفتيس بيظبط نفسه إنه ينقل على أر بي إم عالي. ودي حتحسها أول ما ترجع تاني تسوق بالراحة تلاقي الفتيس ما بينقلشي بدري وينقل متأخر.

　
　

العزل
عزل رائع أحسن من أي عربية في نفس الفئة. هدووووووووووء تام وإنت راكب وقافل الإزاز. مهما كانت الزحمة والدوشة اللي برة إنت في عزلة عن العالم الخارجي. يادوب سامع كلاكسات العربيات على خفيف.

بس في مشكلة ضوضاء الطريق الشهيرة بتاعة الهوندا. يعني بعد ما تعدي بالعربية ال 120 تسمع صوت ضوضاء الكاوتش على الطريق واضحة جوا العربية. طبعا دي من أشهر المشكلات حتى في السيفيك.

ولكن أنا جربت عربيات كتير بعد ال 120 وأقول بكل جدارة إنها من أهدى العربيات على السرعات العالية. يعني أهدى من اللانسر والإلنترا.

نظام التعليق
العربية أنعم من السيراتو ومن اللانسر لكن أخشن من الإلنترا والفيرنا. وده طبعا عشان يزود ثبات العربية. فأنا أعتقد إن هوندا سيتي حققت معادلة صعبة. نعومة جميلة على الطريق وثبات راااااائع على السرعات العالية.

الثبات
أنا كنت عملت موضوع كده الصيف اللي فات إسمه تجربة قياة هوندا سيتي 2010 على طريق العين السخنة، وقلت فيه إن العربية بعد ال 160 كانت بتحدف مني شوية يمين وشوية شمال. بس اللي نسيت أقوله خالص إني بعد ما رجعت بقيس الكاوتش لقيت العجلة اللي قدام يمين ناقصة 10 والعجلة اللي ورا شمال زايدة 10 وطبعا لما كنت في العين السخنة ماكانشي في أي مراكز خدمة كاوتش عشان كده ما عرفتش المعلومة دي غير بعد ما رجعت.

بعد كده غيرت الهوا بينتروجين وطبعا معروف فرق الهوا عن النيتروجين.

المهم إن كان عندي مشوار في فايد من حوالي شهر، وأنا على طريق الإسماعيلية الصحراوي وأول ما جبت ال 160 كنت متوقع نفس الحدفة. ولكن الحدفة إياها إختفت تماما والعربية راااااااااااااائعة في الثبات. وده اللي شجعني جدا ومشيت مسافة طويلة على 170 و 180 بدون أي قلق أو خوف أو إحساس إن العربية خفيفة أو بتعوم مني.

وفي مرة كنت على ال 140 ولقيت أوبترا جاي من ورا وبيعديني وأول ما عداني رحت دايس آخر دواسة البنزين وطبعا مافيش ثواني وكنت جايبه وجايب ال 190 وبسم الله ماشاء الله ولا كإني ماشي على 190 لدرجة إن كان في حتة ضيقة على قدي بالظبط بين الأوبترا وبين رمل الطريق. الحمد لله إتحكمت في العربية عادي جدا ولا كإني على سرعة عالية.

أنا ساعتها اللي جه في بالي حاجة واحدة بس. إذا كان ده ثبات السيتي اللي يتفوق على أي ثبات في أي عربية ركبتها في نفس الفئة, أمال ثبات السيفيك عامل إزاي؟؟؟؟؟؟؟؟؟؟ ومن ساعتها وأنا نفسي أسوق السيفيك.

　

　

الفرامل
طبعا فرامل قوية وبتسعف عند السرعات العالية. في مرة كنت ماشي على المحور وكنت في الحارة الوسط وماشي على 80 بالظبط ولقيت عربية إسعاف جاية بسرعة من ورايا فأخذت الحارة اليمين وسيبته يعدي من على شمالي وإذا بيه أول ما عداني وبدون أي مقدمات ضرب فرامل وكسر على اليمين. ضغطت آخر دواسة الفرامل ووجهت العربية على ناحية اليمين وقبل ما أخبط في الحاجز اللي على اليمين رجعت تاني شمال(وأنا ضاغط آخر الفرامل). الإيه بي إس إشتغل الحمد لله واتحكمت في العربية وربنا ستر والإسعاف أخد باله وراح لامم نفسه تاني على ناحية الشمال. أنا طبعا أعصابي باظت ولكن أنا عاذره لأن هو كان مركز إن في حادثة على الناحية التانية من الطريق وما أخدشي باله إن في حد على يمينه.

اللي عجبني جدا في فرامل الإيه بي إس. في أي عربية تانية تركبها ويجي الإيه بي إس يشتغل تحس إن الفرامل بتخبط في رجلك جامد وبيطلع صوت تخبيط من العربية ( خصوصا اللانسر، تحس إن في حد بيزق رجلك من على دواسة الفرامل وكل اللي في العربية بيسمعوا صوت خبط) لكن في السيتي يادوب تحس بخبطة خفيفة في الدواسة وصوت بسيط لو إنت مشغل الراديو مش حتسمع الصوت ده. واللي خلاني آخد بالي من النقطة دي واحد قريبي معاه عربية لانسر هو اللي حس بالفرق ده وقال لي عليه.

قفل الأطفال

أول ما إستملت العربية وقبل صيانة الألف. أخدت بالي إن الباب اللي ورا شمال ما بيفتحشي من جوا، يعني لازم حد يفتح الباب من برة عشان يفتح. قلت مش مشكلة، حبقى أقول لهم في صيانة الألف. ولما روحت وقلت للمهندس على المشكلة، لقيته فتح البيت وشاور لي على زرار صغير أبيض مستخبي في جسم الباب رفعه لفوق وقال لي ده قفل الأطفال. طبعا ضحكت جدا لأني أول مرة أشوف قفل أطفال مخفي قوي كده.

طبعا ده فايدته إنك لو في عربية تانية (فيها قفل الأطفال في المكان المعتاد جنب مفاتيح الإزاز) وقافل قفل الأطفال ومعاك الأولاد ونزلت تجيب حاجة من الشارع مثلا، ممكن الأولاد يلعبوا في الزراير ويفتحوا القفل وإنت مش واخد بالك. وترجع تكمل تاني المشورا وإنت معتقد إن القفل شغال في حين إن هو مش شغال.

لكن في السيتي القفل مستحيل يتفتح غير لما الباب يتفتح من برة يعني إنت اللي تفتحه بنفسك.

　
　

الكماليات

كتير قالوا على العربية فقيرة في الكماليات. ولكن حتى وأنا معايا الفئة الأساسية مش الهاي لاين وما أعتقدشي إني محتاج حاجة زيادة عن اللي موجود معايا. سي دي وراديو وإمبي ثري ووصلة آي بود ووصلة إيه يو إكس وسنتر لوك وإزاز كهربي للاربع ابواب, حامل اكواب ,سخان خلفى وتحكم كهربي في المرايات (مش ضم) وفتيس أوتوماتيك ذكي ومتطور وفرامل إيه بي إس و2 إيرباج وقفل أطفال مبتكر جدا وتحكم في مستوى إرتفاع إضاءة المصابيح الأمامية ( يعني فوق وتحت على 3 مستويات مش موجود الأوبشن ده في أي عربية في نفس الفئة) عجلة قيادة تلسكوبية يمكن تعديلها فى 4 اتجاهات ححتاج إيه تاني؟؟؟؟؟

لكن أنا بفكر حاليا أركب جهاز الجي بي أر إس اللي في التوكيل. وهو مش شاشة بتتعلق على الإزاز أو على التابلوه. دا بيركب مكان الراديو بتاع العربية وبيزود على الكماليات اللي قلتها زائد ساتالايت نافيجيشن و دي في دي وبلوتوث وشاشة تاتش وكاميرا خلفية أثناء الركن.

　

طبعا ما قدرشي أقارنها بكماليات السيراتو مثلا..... السيراتو تكسب بجدارة في منطقة الكماليات

وطبعا دي مش مشكلة العربية دي مشكلة التوكيل حسبي الله ونعم الوكيل فيه. المراية ما فيهاش تعتيم (يعني مراية 128) ومافيش سماعات خلفية ولا في إنذار. ولو حبيت تركب ريموت يبقى حيكلفك 2600 جنيه عشان حيركبوا لك مفتاح سيفيك.

سعر إعادة البيع

طبعا الهوندا عموما في مصر مشكلتها في سعر إعادة البيع. بس أنا أتوقع إن السيتي الشكل الحالي حتبقى أحسن شوية من السيتي القديمة عشان فرق الجودة والكفاءة.

الصيانة وقطع الغيار

بصراحة ما أعرفشي عن قطع الغيار أي حاجة. بس أنا بروح التوكيل اللي في التجمع الخامس بعمل صيانة العربية هناك. روحت هناك 4 مرات فقط.

مرة لإستلام العربية
ومرة لصيانة الألف ودي مجانية
ومرة لصيانة ال5 آلاف وتغير زيت وفلتر زيت وفحص شامل للعربية ودي تكلفتها 440

ومرة لصيانة ال10 آلاف وتغير زيت وفلتر زيت وفحص شامل للعربية ودي تكلفتها 440

هما بيغيروا الزيت في الألف وال5 آلاف و10 آلاف عشان العربية لسه جديدة لكن بعد كده كل 10 آلاف كيلوا حيغيروا الزيت

بعد كده صيانة ال 15 ألف ودي حتبقى تكلفتها بسيطة جدا عشان مش حيغيروا حاجة. مجرد فحص للسيارة وتربيط عفشة

　

أرجو من الله إني أكون قدرت أشرح اللي قدرت عليه وما أكونشي نسيت حاجة. وفي إنتظار الرد على أي أسئلة.

[/frame]

موضوع ممتاز يستحق التقدير

^_^