تعديل الافيو المانيوال الى اوتوماتك

السلام عليكم ورحمة الله وبركاته
اعضاء المنتدى الكرام
عربيتى افيو 2009 مانيوال تم تعديلها لتصبح اتوماتك
التعديل تم بحمد الله من شهر تقريبا وماكانش فى فى خلال الشهر ده اى مشاكل والحمدلله بس من اسبوع واحد لمبة ال Hold فى التابلوه نورت بشكل متقطع مش مستمر وظهر كمان هبده فى الفتيس مع تعشيق ال d فقط يعنى الr عادى
وعلى فكره اداء العربيه فوق الممتاز يعنى الفتيس بينقل نقلاته كلها وبيأدى أداء عالى مع الكيكايه يعنى مافيش اى مشكله فى اداء العربيه ولا حتى جهاز الأعطال مسجل اى عطل حتى اثناء لمبة ال Hold مابتكون منوره
لو فى حد يقدر يفيدنى فى موضوع لمبة ال Hold
وموضوع الهبده علما بأن الزيت مظبوط والقواعد سليمه
وشكرا

تجربه اكيد مفيده

ممكن تدينا فكره عن اللي تم بلضبط

يعني جبت الفتيس منين

وبكام

ركبته عند مين

غيرت كنترول العربيه معاه ولا لا

استهلاك البنزين والتسارع بتاع العربيه فرق قد ايه

يعني

كلمنا شويه احتما نعرف نحل المشكله مع بعض

وشكرا

متابع بأهتمام ..
موفق

متابع

متابع

متاااااااااااااااابع :D

السلام عليكم
فى البدايه اشكر كل من اهتم بالموضوع
اولا وأهم ما فى الموضوع ان تكون الماكينه اللى انت هتاخد منها الفتيس نفس نوع وتراز الماكينه اللى فى عرابيتك لان فى افيو بتيجى استيراد بيكون فيها ماكينه مختلفه تماما ودى هتعمل مشاكل لدرجة فشل الموضوع من اساسه
ثانيا هتاخد كل تجهيزات وفروقات الاتوماتك زى الريداياتير و خزنة الباكم و السليكتور و ضفيرة الماكينه وكمان لازم تغير كارتة الماكينه والعدادات ومن حظى على فكره ان العدادات طلعت فيها كومبيوتر رحلات و بيحسب متوسطات كمان وطبعا دواسة الفرامل بتكون اختيارى لان دواسة المانيوال تشتغل بس شكلها مش حلو
والافضل انك تحل الحاجات دى من نص عربيه زى مانا عملت ولازم طبعا اللى يحل يكون عارف هو بيعمل ايه يعنى مش حل وخلاص لان الموضوع مش ساهل
اللى نفذلى الموضوع ده من أوله لأخره الباش مهندس \ طارق الخراشى وده اخ عزيز وصديق ومكانه فى دمنهور وعلى فكره هو اللى دور على حد يكون عنده نص عربيه الماكينه اللى فيه نفس طراز اللى فى عرابيتى
واظن انه جابه من الحرفيين فى القاهره
المهم الموضوع كله خلص فى 3 ايام تقريبا نص يوم ميكانيكا والباقى كهربا
لان كمية الاسلاك اللى خارجه من كارتة الفتيس كتيره حوالى 23 او 24 فرده وطبعا زى ماكلنا عارفين كارتة الافيو مت الكارتات اللى بتضرب من الهوا
الحقيقه ان المهندس طارق تعب فيها اوى يعنى مثلا كان بيشتغل بالأفوميتر من غير ما يوصل بطاريه عشان مايبقاش فى احتمالات للخطأ
المهم ربنا وفقه وخلص وجربنا العربيه وكله تمام
ونقلات الفتيس فى مواعيدها و زرار الHold شغال واللمبه بتنور لما تشغله والكيكايه وكله تمام
استلمت العربيه وبدأت التجربه العمليه
استهلاك البنزين كويس جدا لدرجة انى تقريبا مش حاسس بفرق عن الاول
سحب العربيه اختلف عن الاول والغريب انه بقى افضل من الاول يعنى تقريبا 140 كيلو بيكون ال rpm على 3.5 فى حين الاول كان تقريبا بيكون ال rpm على 4
بس للأسف بعد شهر ظهر العيب اللى شرحته قبل كده
مع العلم مافيش اختلاف فى أداء العربيه المهندس طارق قالى ماتشغلش بالك وانا هحللك المشكله دى إن شاء الله بس للأسف هو اليومين دول مشغول كده فى حاجه خاصه بيه وأنا بصراحه مش قادر اصبر فقولت ممكن حد من المنتدى يساعدنى
وأرجو انى اكون وضحت الموضوع
وشكرا

لا طيعا

حضرتك اوضحت نقط كتير

لاكن فاضل الاسعار سواء للاشياء المشتراه او لمصنعيات الفك والتركيب

انا كنت باكد ان حضرتك غيرت كنترول العربيه كمان

اعتقد ان مشكله الهولد ديه ممكن تكون في سلك مش متاكد عليه

انا بخمن لان التركيب اليدوي ده ممكن يظهر مشاكل من مثل هذا القبيل

لاكن تجربه حضرتك تجربه ثريه

لانها الاولي لهذه العربيه علي حد علمي وممكن تكون فكره تشجع الغير علي تنفيذها

عشان كده موضوع التكلفه ده مهم عشان اتخاذ القرار

وشكرا

هل التكلفه تستاهل
اعتقد الافضل العربيه تتباع و تجيب زيها اتوماتيك :)

شوف حضرتك هو العربيه تتباع وتتجاب زيها اتوماتك اكيد لو اتكلف اكتر 1000 جنيه او 2000 هيكون اريح بس الفكره انك تركب عربيه انت اللى معدلها من وجهة نظرى الموضوع مختلف

الف مبروك على التعديل وعقبال ما تغيرها بكروز اوتوماتيك علطول

ههههههههههه كتر خيرك بس شكلى كده هجيب كروز مانيوال واعدلها

اقتباس:

---

المشاركة الأصلية كتبت بواسطة حسام قناوى

ههههههههههه كتر خيرك بس شكلى كده هجيب كروز مانيوال واعدلها

---

دانتا غاوى بقى
ملكش حل بقى غير مرسيدس او بى ام وورينى هتبقى تعدلها ازاى

بردة معرفناش التكلفة كام

تقريبا 6000 جنيه بس اظن ان السعر كان مبالغ فيه شويه عشان التاجر اللى كان عنده العربيه اللى فيها نفس ماكينتى حس واتأكد انى عايز العربيه دى تحديدا واى واحده غيرها ماتنفعش

تمام هو الفرق بين المانوال والأتو بيتراوح ما بين 4-5 ألف جنية بس زي ما إنت قولت بيبقي إحساس تاني لو إنت معدل وألف مبرووك بس إنت عملت أية في الحاجات إللي خارجة من العربية المانوال وهل كان عندك المشكلة الشهيرة rpm وإتحلت ولا أيه.

والله يا باشا الحمدلله المشكله بتاعت ال rpm ماكنتش موجوده عندى اصلا
اما بالنسبه للحاجات اللى خرجت من العربيه ال 6000 جنيه دول الفرق بعد بيعها

طيب يا جماعه احنا اتكلمنا فى التكلفه والطريقه وحاجات كتير
بس ماحدش كلمنى فى مشكلتى الأساسيه اللى انا بشتكيها
ارجو المساعده

اقتباس:

---

المشاركة الأصلية كتبت بواسطة حسام قناوى

طيب يا جماعه احنا اتكلمنا فى التكلفه والطريقه وحاجات كتير
بس ماحدش كلمنى فى مشكلتى الأساسيه اللى انا بشتكيها
ارجو المساعده

---

ياه

فين حب زمايلك الاعضاء :inlove:

همك نفسك بس

فين اخلاق فرسان الشيفورليه :10D5C8w1107:

ماشي :camera2:

بص انت قولت انك غيرت الكنترول بتاع العربيه كمان

طيب نجرب انك تغير زيت الفتيس بنوعيه محترمه

انصحك بفالفولين

ونشوف

وشكرا

لازم تحطها على جهاز كشف الاعطال لأن دا عطل متخزن على الكنترول وغالبا ممكن يتمسح عادى
اما بالنسبة للنتشة فدى حاجه من اتنين يا اما الزيت مش كويس ودا لازم تنزل منه شوية وتبص فيهم على اللون والزوجة وهل عامل رغاوى او كدا
تانى حاجه ممكن يكون العيب فى حساس الtps

السلام عليكم
انا اسف انقطعت فتره بس ده لأن كان عندى شوية ظروف كده
المهم بالنسبه للزيت انا باستخدم موبيل وده اللى موصى بيه الصانع للفتيس
اما حساس ال tps مش المفروض لو فيه عيب لمبة التشيك تنور
وعموما بحط العربيه على جهاز كشف الاعطال مابيطلعش اى حاجه متسجله