الموضوع: بعد غياب (موضوع مهم لمعظم الاعضاء)

السلام عليكم ورحمة الله وبركاته

اخباركوا ايه وحوش هيونداى.اتمنى الجميع يكون بخير بامر الله.

غبت فترة كبيرة عن المنتدى وده لظروف عائلية(دعواتكوا بفرج الازمة).

نخش فى الموضوع :

من حوالى اسبوع قريت فى الوسيط عن شركة بتعالج الخدوش والخبطات من غير سمكرة وبعدين جاللى مع وصل الغاز اعلان عنهم كمان ولقيت عنوانهم مش بعيد عنى.قولت اروح ابص بصة واشوف الدنيا فيها ايه عندهم.

فاكرين الفيديو ده الاول :

Sprayless Scratch Repair - YouTube

كنت بدور على حد يعمل الشغل ده ولقيت الشركة اللى بتكلم عليها شغالة بنفس المنتج والامكانيات روحتلهم بلليل من 3 ايام وقعدت معاهم (شباب زى العسل) ربنا يباركلهم.

واتحدد الشغل اللى عندى والتكلفة وحددت الميعاد.

رحت بعدها بيومين وبداوا الشغل والاول حددوا المناطق اللى فيها الجروح والنقر.وحطوا عليها مادة اساسية سودا زى الفيلر او الBase بتاع الدهان (المعجون).

وبعدين بالBuffer بيفردوا مادة بيضا وديه فايدتها تشيل اى زيادات من الBase وبعدين جابوا عبوة صغيرة فيها لون العربية(هى بتيجى من برا كدة بكود العربية) وبداوا يعملوا المناطق اللى محتاجة دهان والنقر الصغيرة بفرشاة وبعدين يفردها بالBuffer وكانت عندى 3 نقر جابوا جهاز غريب الشكل عامل زى العصاية وسخنوا مسدس شمع ولزقه على راس مسمار بلاستيك شبه الHook اوالهوك ولزقها على الصاج وسابها ثوانى تمسك فى النقرة وجابوا العصاية وبحركة سريعة سحب الهوك بالعصايةو النقرة طلعت لبرا تانى واتظبطت والحمد لله.

وبعد كدة اخر الشغل بيعملوا العربية كلها واكس لو محتاجة او كان فيها شغل كتير بمعنى اصح.

اسيبكوا مع الصور وفى الاخر هكتبلكوا الوقت و التكلفة ومش هقدر اذكر اسم المكان او اى تفاصيل(اعذرونى) لانهم لسة معملوش اعلان مع وعد منهم عمل اعلان هنا وخصومات خاصة للاعضاء وعروض كتير متميزة(بعد اللى سمعوه عن اكبر موقع سيارات مصرى) ولكن لسة هيظبطوا مع كريم منير وربنا يسهل الامور.

اسيبكوا مع الصور:

النقط السوداء ديه اماكن الخدوش ونقر الرمل والنقل على الطرق السريعة:
















وبعد الانتهاء:















الوقت :4 ساعات وده لان العربية عندى كانت مليانة جروح زى ما شوفتوا.

التكلفة : 450 جنيه وحسبتها لقيتها اقل من الرش بكتير وفكرة ان العربية رشة (فكر السوق المصرى).

اللى عجبنى:

تفكيرهم وافكارهم وازاى عاوزين يفيدوا الناس ولو حتى بمعلومة ومش مكسب وخلاص.

مانعين نهائيا الTips الاكرامية لاى عامل وده حفاظا على المصداقية(مش علشان هتدفع تبس هنشتغلك احسن)

المكان نضيف وواسع وبياخد 4 عربيات فى نفس الوقت.

التأنى فى الشغل ومفيش كروتة وبيسالوك كل شوية بص معانا لو فيه حاجة نسيناها.

المراجعة على بعضهم سواء اصحاب المكان على بعض او المشرف على العامل.

تاكيدهم ان الغسيل فى المحطة مش هياثر على الشغل الا لو غسلت العربية قبل 6 ساعات او استخدمت بولش او كومباوند بكثرة.

تحسهم اصحابك من زمان

الخدوش والجروح اختفت بنسبة 85-90%

اللى معجبنيش حاجة واحدة بس : طول المدة مع العلم اننى كان ممكن اسيب العربية ويكلمونى لما يخلصوا زى ما ناس تانية عملت ولكننى كنت مهتم بالتواجد علشان افهم.

اتمنى اكون افدتكم واى سوال اتفضلوا واعذرونى لو مش حرد بسرعة وده بسبب الظروف اللى عندى.