بس انا العربية اللى قدامى 2005 اتوماتيك عاملة 93 كيلو و مطلوب فيها 67الف تقريبا فا انت اية رايك
انا خايف من الفتيس الاتومايتك لحسن يكون سحبة ضغيف علشان خاطر موديل قديم فا مما تفيدنا بدل انت معاك العربية دية
و اية كماليات اللى انت حطتها فيها
عرض للطباعة
بص ياباشا اولا تفرق لو كانت خليجى او غبور او مستورده من بره اللى بيقولوا عليها هنا اوروبى راجع مشاركتى وهتشوف عربيتى اللى معايا اوروبى الخليجى اقل كماليات بس راديتير اقوى ويستحمل الاوروبى زى غبور فرق التقفيل
بالنسبه للفتيس جرب العربيه وشوف السحب عامل ازاى لو فى نتشه او عضه بلاش احسن
الفتيس كله على بعضه ل 1500 او 2000 بالكتييير اوي
العريبه دي عربيه ممتازه
عموما الحاجات الي تكشف عليها الكبالن الداخليه ودي الميكانيكي الشاطر بيعرفها وانت ممكن تعرفها لما تلاقي هبده جامده وانت بتنقل من r to d او العكس واحيانا بين النقلات الاماميه خصوصا لو في نقله مفاجئه كيك داون او دوست مرتين بنزين ورا بعض
طبعا غير زيت الفتيس والفلتر الفلتر عامل حدوج 150 جنيه هات الاصلي او الموبيس في حاجه كده اسمها موبيس دي شركه قطع غيار هيونداي بتنزل ياماا الاصلي يا اما موبيس والاتنين قريبين من بعض جدا وممتازين يستحسن تجيب زيت فتيس فالفولين ماكس لايف التر ب 80 جنيه تقريبا بس ممتاز جدا جدا جدا وهتاخد في حدود 5لتر او 4ونص
محلات قطع الغيار الي اعرفها كلها في شارع دمشق بس مدام البنا بتاع التوفيقيه ملك الهيونداي خلاص بقى هات من عنده
مثلا تيل الفرامل الامامي في التوكيل معدي 300 وفي السوق مابين 230 ل 270 حسب المكان الي بتشتري منه
المتور بتاعها جميل جدا عموما لازم تحس انها بطئيه سنه لان متورها متواضع وفتيسها قديم مش جديد بس ممتازه في الثبات والعفشه بتاعتها جميله اوي اوي اوي ما شاء الله عليها
اسعارها بتتراوح حسب النضافه يعني الي معاك دي لو مالهاش حل فعلا 70 الف مش كتير عليها بس حلالها 67 او 68
انا بعت بتاعتي فبريكه برا وجوه ومحتاجه وش نضافه والي فيها تكييف تاتش ب 66 الف لتاجر والفتيس بتاعها تعبان وقولتله والله اعلم بقى لبسها لحد بالفتيس ولا قاله وليا صديق بتاعته تحفه فعلا باعها ب 70 الف جنيه فبريكه بالكامل اعلى فئه حساسات وتاتش
استاذ حمادة ايه المشكلة طب انا عربيتى جايبة كبالن داخليه ؟
متعرفش حد بيبيع قطع غيار استيراد بس يكون محترم ؟
شكرا جدا
أنا معايا العربية دي من الزيرو و عاملة دلوقتي حوالي 170 ألف كيلو
تصدق لو قلت لك أني متردد أغيرها علشان مش لاقي أفضل منها أو بالأصح حادفع فرق كبير (فوق ال60 ألف جنيه) و الفرق بينها و بين الجديدة بسيط جدا
العربية في كلمة واحدة - ممتازة - و مافيش مثيل ليها يعني ثبات و صالون و تكييف حكاية و عفشة حمالة قاسية و قطع غيار رخيصة جدا جدا (مقارنة بأي موديل أحدث)
يمكن هي مش شبابية ( هي عائلية جدا) و برضه الأداء أقل من الموديلات الأحدث بس مش بفرق كبير
الفتيس الأوتوماتيك رائع و ليس به أي مشاكل و متوافر جدا لأنه نفس الماتريكس و الفرنا أهم حاجة أنك تعمل الصيانة في وقتها و بخامات أصلية
أنا الحقيقة مهتم بيها و بأعمل الصيانة في وقتها و بقطع غيار أصلية 100% من غبور بس بأركب بره التوكيل و الأمانة عمرها ما عملت أي فصل بارد (نمسك الخشب)
و للأمانة حتي لو حاشتري عربية جديدة مش حابيع العربية دي
أستهلاك قطع الغيار قليل جدا و برضه علي حسب الأستعمال يعني مثلا أنا بأغير تيل الفرامل علي 50 ألف كيلو و عمري ما غيرت كبالن و مش بتعمل أي صوت و عمري ما غيرت أي حاجة في العفشة (170 ألف كيلو) و عمري حتي ما ضبطت الزوايا (مرة واحدة كشفت عليهم بعد تغيير الكاوتش)
بأغير السيور و كل الفلاتر كل 60 ألف كيلو (ماعدا فلتر الهواء كل 30 ألف و فلتر الزيت مع كل غيار)
البوجيهات كل 20 ألف و بأستعمل زيت كاسترول ماجنيتك
شكرا جزيلا علي كل الردود بالنسبه لقطع الغيار الاستيراد انا لقيت حجات كتيره ليها عند ال عبد الحميد شارع احمد ممدوح في الحرفيين وبرده عندك رزق في نفس الشارع وفاصل معاهم ولو تحب ابعتلك ارقام معنديش مانع
ياريت تبعتلى على الخاص الارقام و العناوين بالضبط و وشكرا جدا لمساعدك حضرتك
سوال اخير ايه رايك فى الكبالن و المساعد الاستيراد( الكبالن داخلى و خارجى )
وايه اخبار التكييف فى الحر انا عندى و حش خالص وبحس برجه فى الدريكسيون وهوه شغال بس بليل بيجيب ثلج بصراحة متعرفش مركز صيانة ممتاز للتكييف
الحرفيين مليانه من اول 250 ل 500 جنيه انا عموما روحت لواحد بثق فيه هو اسمه كاظم في شارع الاستيراد اداهوملي والله مافااكر ب 600 او 500
عموما الميكانيكي هو الي بيشكف على الكبالن وممكن يكشف عليها وهي راكبه وانا كنت بحس بيها لما انقل من ار لي دي واحيانا لما العربيه بتنقل الغيارات عادي او لما ادوس بنزين جامد بسمع هبده جامده والميكانيكي قالي كبالن ولما فكها كان الكلبن يمسكه يلف معاه جامد الجديد طبعا يدوب بياخد سنتي خلوص يلف في ناحيه او العكس
المساعد الاستيراد بطيخه يا حمرا يا قرعا وغالبا كلهم بيبيعوا المساعد كامل بالسوسته والبطاحه وطبعا هيضربوا رقم خيالي فيه لانه كامل بالاضافه الى انك مش هتقدر تشكف عليها لازم عشان تكشف عليه يبقى المساعد لوحده تدوس عليه للاخر لو طلع بسرعه يبقى تمام بالاضافه الي ان الميكاينكي له حس مش موجود عندنا حتى لو طلع بسرعه في حته ممكن يبقى فيها بوش تقريبا الميكانيكي بيحس بيها
هاتوا جديد الجوز موبيس او اصلي في محلات معينه من 600 ل 750 في دمشق عند نافع او عاصم
معلش ردي متاخر
الاسعار دي اسعار الاتنين كوبلن كامليين والكوبلن الكامل في التوكيل الواحد يعمل 3000 او 2500
الكوبلن كامل يعنى داخلى و خارجى
اصل انا عندى رجه بعد 110 وعملت كل حاجة كاوتش جديد و بلى عجل سليم و ترصيص يجى 6 مرات اماكن مختلفة و الجنوط سليمة الاصلية واحد قالى ده كوبلن داخلى ايه رايك ؟