عرض للطباعة
السلام عليكم يا رجالة ,
معايا بسات 2003 ,, التكيف بتاعها مش بيسقع كويس ,روحنا كشفنا علية , الراجل قال ان التلاجة بتسرب و عايزة تتصلح , طيب معنى كدة طبعا انو لازم يفك الطابلوة كلو و حوار اد كدة . لان التلاجة ورا الطابلوة
,, عرفنا انو هيتكلف 2500 جنية !!!!!!!!!!!!!!
يا ريت لو حد يقدر ياكد المعلومة دى و يقولنا على حد فى القاهرة متخصص فى التكييف و حنين شوية الواحد يقدر يروح يعملها , اكون متشكر اوى
روح لكام واحد تاني شوف ايه النتيجه انا شايف ده مبلغ مبالغ فيه اوي على اساس ايه 2500 جنيه كنت هتغير التكييف ولا التلاجه ولا ايه
لو قريب من الهرم قولي اوديك عند واحد استاذ
واسال برضو بتوع الاستيراد كام سعر التكييف والتلاجه والكمبريسور او التكييف كام ل يعمل كام
ممكن الراجل الى فى الهرم دة يا باشا ؟؟؟ عشان عندى مشكلة فى التكيف
نصيحه اوعى اوعى تجيب اى حاجه استيراد للتكيف بالذات عمتا اى حاجه فيها اويل سيل او اى اورنجات ولو الماده حكمت لازم تجيب الحاجه محلوله قدام عنيك من على الماتور علشان الحاجه لما بتكون مركونه على الرف بتلم تراب ومهما اتغسلت هتوسخ دوره الفريون .ده بجانب ان اويل سيل بتنشف من الزيت والهوا ده اللى حصل معاياانا الكومبرسور عندى كان بايظ فى باسات٢٠٠٠ غيرت ٣مرات استيراد
وبرده لحد ماروحت عند توكيل محترم جدا جدا فى حدائق القبه
اسمه فابديا تقريبا الاسم مش متذكره قوى هو فى بن سندر جمب الششينجى بتاع بدل الجيش
شكرا يا رجالة على الردود ,, طيب اللى ايظ عندى التلاجة اللى ورا الطابلوة و دى لازم انك تفك ااطالوة كلو عشان تصلحها
فى راجل تانى قالى هيعملها ب 1700 جنية و دة اخر سعر ,, لو على كدة بقى المفرو انزل اسال عليها بكام استيراد , لانى معتقدتش ان فيها جديد
ولا اية رئيكو
و فين يا هيثم اتوكيل دة ؟ و انت متاكد انو نظيف ؟
بالنسبه للراجل الي في الهرم
ادخل من شارع ومبي اخره خاتم المرسليم هتخش يمين
هيبقى على يمينك صور معهد السينما خده لاخره ولف وامشي سنه هتلاقي الشبراوي على يمينك بعديه شارع يمين صغير فوته وادخل اول يمين كبير بعده وامشي في الشارع ده شويه صغيره هتلاقيه على الشمال
بص يا زعيم انا معرفش انت ساكن فين علشان ققولك تمشى ازاى ققربلك. بص وانت نازل من جسر السويس الاتجاه اللى ينزلك على العباسيه
اول ما هتكون فى ميدان ابن سندر امسك يمينك هتلاقى بنزينه موبيل وبعديه محل مشهور اسمه الشيشنجى هو الفتحه اليمين اللى بعديه علطول اسمه بفاديا تقريبا وعلى نصيه الشارع بنزينه غاز
روح ل أحمد بتاع ارض اللواء المهندسين ورشة في منتهي الإحترام والأمانة والحرص علي عربيات الناس .. ناس كتير هنا في المنتدي بتتعامل ومعاه وانا اتعاملت معاه وهتحس انك مرتاح بدون إشتغالات روح إكشف عنده وهيقولك الخلاصة إكشف مجانا مش هتخسر حاجة ..
يا هيثم لفيت مصر على كويل جيد مفيش , واحد بس عندو كويل صينى ب 550 جنية !!!اقتباس:
المشاركة الأصلية كتبت بواسطة haythammohsen
كدة مفيش غير انى اجيب استيراد و انظفو كويس و اضغطو و ربنا يستر . ولا اية رئيك؟
اقتباس:
المشاركة الأصلية كتبت بواسطة avatar
ممكن تشرحلى العنوان اكتر ؟
انت روحت للراجل اللى قولتلك عليه
انا اللى حصل معايا كالتالى قالى الكومبرسور فى حدود 3000 ووصفلي الراجل اللى كان بيتعامل فى قطع غيار التكيفات كان فى اخر جسرالسويس جمب سوق القنال بس انا مرحتش قولتلوه يبعت حد يجيبوه .ده بجانب نوه هو اصلاا عنده قطع غيار وهيقولك ايه تجيبوه وايه اللى متجبوش بس للعلم هوه اغلى من بره بس شغله نضيف
ملاحظه الشركه ديه بتشحن الفريون بطريقه كويسه قوى مش عارف الغير بيستعملها والا لا اللى رحتلهوم قبل كده ققلب انبوبه وخرطوم وشحن .
ده عنده جهاز بيسحب الفريون اللى فى العربيه الاول وبعد كده ينضف الدوره ويشحن ويضيف مده فسفورى علشان لو فى تسريب يبان بسهوله والجهاز بعد كده بيعمل تست للدوره وكده كده بترحلوه بعديها باسبوع يتاكد ان الشحن تمام
اى حته ترحها اتاكد ان الفريون انجليزى فى مضروب صينى كتير بالذات فى الحرفين كل الاماكن اللى الاعضاء اتكلمت عنها سمعت انها كويسه انا خترت اقربلى وانا اسمع من زمان انو وكيل شركه المانيه وهناك هتلاقى المهندس المسؤل احمد شخصيه زى العسل
انا كده قولتلك كل اللى اعرفه :)
فين يا استاذ هيثم الشركه دي عشان انا بدور علي مكان كويس للتكييف و كله البلدي العادي وفي ميكانكي قاللي علي الجهاز اللي بكمبيوتر ده و شرحلي واحد مش فاكر فين في عين شمس و معرفتش اوصله
يا ريت لو توصفهولنا
عملت التكيف يا جماعة الحمد لله و كلة تمام , بقالى بتاع اسبوعين اهو كويس الحمد لله ..
غيرت كويل جديد ظبط
مبرووووووووووووك
طب ممكن اعرف منك عملته فين و قطع الغيار جبتها منين و استيراد و لا جديد و التكلفة تقريبا كام
معلش اصلي داخل على حوار تكييف فعندي اسئلة كتير
الله يبارك فيك , بس دة للباسات مش الاوبل .
الاوبل هبتدى فيها اخر الاسبوع دة ان شاء الله , هنزل اشترى شجرة و ظهر و سويتشات و هروح اركب و ربنا يستر و الكباس يكون تمام
انا مش معايا اوبل انا غيرت و جبت جيتا عشان كدة كنت بسالك على ظروف الباسات لاني في نفس المشكلة مع تكييف الجيتا و عايز واحد يركب كويس
بص هو لحد دلوقتى الحمد لله تمام . كلفنا توتال 1700 بالكويل جديد اصلى
الراجل شاكلة ابن حلال , احمد بتاع الفولكس اللى عند حديقة بدر لو تعرفو كلمة ووصاة علينا اوى , و فعلا اقل سعر ادهولنا ( اقل سععر لما دوربنا برة كان 2500 )
انا رايح ان شاء الله الجمعة الجية او السبت و لو عايز سالك على حاجة او تيجى مفيش مشكلة