الموضوع: الحمد والشكر لله أخيراً جبت الداستر !

اللهم لك الحمد كما ينبغى لجلال وجهك وعظيم سلطانك وكرم عطائك
توكلت على الله وأقتنعت وأشتريت وأستلمت الداستر 4*4 بعد معاناة سنة تقريباً والمفاضلة بين جميع أنواع السيارات السيدان والهاتشباك والدفع الرباعى العائلية والصغيرة اليابانى والصينى والكورى اللون الأسود والفضى والنبيتى ................ مقارنات للصبح فى كل حاجة! لغاية لما فعلاً حددت أنا إحتياجاتى الفعلية أيه وطبيعة الطريق اللى بمشى فيه والإعتمادية والتوكيل والصيانة والبرستيج !!
وأخيراً جبتها من عند سمير ريان الكاملة 4*4 لونها فضى حجزتها الصبح ووصلت المعرض آخر النهار وأستلمتها تانى يوم !! بس بجد معرض محترم وعند كلمتهم وتحس بالأمان معاهم على عكس معرض القرش جسر السويس تحس بعدم الأمان نهااااااااائى فى الكلام بتاعهم وواحد يقول العربية موجودة وتتفرج عليها والتانى تانى يوم الصبح تتصل بالتليفون علشان تخلص يقولك يافندم أحنا ماعندناش داستر !!! أومال اللى أتفرجت عليها بالليل وركبتها كانت أيه ؟ طبعاً إرتباك وبعدين يقولك تقريباً متباعة وأنا ماأعرفش وكلم الإدارة تكلمهم يقولوا ماعندناش !!! وحوارات غير مريحة بالمرة بمعرض القرش !!
وأخيراً أشتريت من عند سمير ريان
بسم الله ماشاء الله رائعة واللون الفضى فيها تحفة ومديها رونق ومكبر حجمها وظاهر حلاوتها قوى
الإنطباع الأولى عنها أنبهار ليا بمعنى الكلمة من حيث الشكل والهيبة والقوة بتاعتها !
الموتور صوته ناعم جداً والعفشة رائعة وماتحسش بأى مطبات ولا حاجة خالص فى الشارع !
الفتيس لسه مش متعود عليه حكاية النقلات القصيرة قوى دى ، والمارشيدير اللى سوسته لقدام برضه لسه مش متعود عليه ، علشان طبعاً الماروتى حبيبة قلبى كانت العكس وكنت متعود عليها
طبعاً محتاج نصائح الوحوش فى فترة التليين وكيفية المحافظة عليها
وإن شاء الله أستلم الورق يوم الأحد وأرخص
وشكراً جزيلاً على آرائكم وتقاريركم الممتازة اللى كانت المرجع الرئيسى ليا فى دراسة تلك السيارة
ربنا يبارك فيكم جميعاً وجزاكم الله عنا خير الجزاء

الف مليون مبروك يعطيك خيرها ويكفيك شرها وأهلا وسهلا بيك في نادي وحوش الداستر