يا ترى هاتعمل أيه في الموقف ده ؟ 1

**PAYOO** · 28-04-2007 09:16 AM

عفوا يا بايو-تم نقل موضوعك للمنتدي الاجتماعي بعد افتتاحة
كريم منير-30-4-2007- الساعة 12:27 ظهرا

عندي أكتر من حاله لموضوع الخبط والأحتكاك (الحوادث البسيطه)إللي بتحصل لنا أحيانا في الطريق
وعاوزك وأنت بترد عليا تبقى مـُتخيل الوضع عشان تبقى أجابتك واقعيه

الحاله الأولى
أنت ماشي في أمان الله ومشغل الراديو على محطة نجوم أف أم ومزاجك عال العال
ومره واحده طلعلك شاب خونفس شعره كنيش وقد دماغه سبع مرات (الله يمسيك بالخير يا شطه) راكب عربية ماما والكاوتش والموتور بيصرخوا منه ومن سواقته المجنونه
قوم الواد الفرفور جه من ناحية اليمين وقام معديك زي الصاروخ
قوووووم أيه ؟
قوم أنت أتخضيت وضربت كف على كف وكبرت دماغك وقولت أنا مش هاعمل عقلي بعقل العيال وآثرت السلامه
قووووووم الواد الخونفس بعد شويه ظهر لك تاني عشان كان الطريق قـُدام مقفول والدنيا واقفه خالص
قوم أنت بصيت له بقرف كده وهو أخد باله وبصتك له ماعجبتوش
قوووووم هوه حطك في دماغه وراح مزنق عليك وانت طالع خلاك تحـُك في العربيه إللي على شمالك وسابك وجري
أنت طبعا نزلت تشوف الخساير لقيت الراجل إللي على شمالك إللي أنت حكِتله عربيته طوله مترين إلا خمسه سنتي وعرضه محتاج توب قماش عشان يتفصله قميص
والراجل نازل من عربيته والشرار بيطق من عنيه وبينفخ لدرجة أنك حسيت أنه هايطلع نار من بـُقه
وقابل ما تتكلم رزعلك بأديه الأتنين على كبوت العربيه وقالك "أنا عاوز أشوف إللي أداك رخصه وقالك أمشي في الشارع مع البني أدمين عشان أديله بالجزمه على دماغه ودماغ إللي خلفوه"
((دي كانت أول القصيده)) ههههههههههه
قولنا بقى هاتصرف أزاي مع العملاق الأسمر ده ؟؟؟ (الله يمسيك بالخير يا بروسلي)
وياترى هاتفهمه أنك كنت بتفادي الواد الفرفور إللى كان بيزنق عليك ؟؟؟ ولا هاتعمل أيه؟؟؟؟

**PRO-DRIVE** · 28-04-2007 12:03 PM

الحمد لله عندنا فى حالة زى دى تكلم الشرطة و يجيلك و يقول كام % خطأك و كام % خطأه هو و لو مد ايدة :mrgreen: حتبقى 100% غلطتة و يصلخ عربيتى ببلاش :mrgreen:

**megane_man** · 28-04-2007 01:00 PM

الحمد لله عندنا فى حالة زى دى تكلم الشرطة و يجيلك و يقول كام % خطأك و كام % خطأه هو و لو مد ايدة حتبقى 100% غلطتة و يصلخ عربيتى ببلاش

لو سمحت عندك فين

**megane_man** · 28-04-2007 01:04 PM

قولنا بقى هاتصرف أزاي مع العملاق الأسمر ده ؟؟؟ (الله يمسيك بالخير يا بروسلي)
وياترى هاتفهمه أنك كنت بتفادي الواد الفرفور إللى كان بيزنق عليك ؟؟؟ ولا هاتعمل أيه؟؟؟؟

هاضرب تحت الحزام مفيش غير كده
أو يكون معاك سلسة بروسلي وتخبطه علي دماغه
بس الكلام ده بعد ماتحاول تفهمه ولو مفهمش أتصرف بالطريقة السابقة
يأم الواحد يركب من الأول عربية جيب علشان محدش يقرب منه أو عربية فولفو

**PAYOO** · 28-04-2007 01:08 PM

صديقنا قصده عنده في عـُمان

صديقنا Turbo 911 هو صديقنا "أحمد هيرو" وهو مصري عايش في عـُمان

وأنا واخد منه وعد بعد مايخلص أمتحاناته هايكون متواجد باستمرار ويتحفنا بمعلوماته عن السيارات والتعديلات التي تنفذ عليها

بس أنا عاوز أقولك حاجه يا أبو حميد هو بعد كده هايصلح العربيه على حسابه صح ؟؟؟
طب علاجك هايبقى على حسابه برضه ؟

**memo_hefnawy** · 28-04-2007 01:11 PM

إيه يا عم هانى :) ههه إنت عملتها و لا دى تصورات :) و تخيلات :)

على العموم إنت لو الواد الفرفور ده ذنقك و إنت حكيت فمتزعلش منى تبقى غلتطك إنك لما ذنق عليك موقفتش

و فرضا إنك خلاص حكيت و إللى حصل حصل ...لو غلتطك أولا حاجة تقدم إعتذار و بالتالى تمتص غضب الشخص الآخر

لو غلطت الآخر إتكلم براحه لأن الخناق مش هايقدم ولا يأخر ...أنا أول ما إستلمت الويرا بعد إسبوع واحد ربنا يكرمه خبط فى الباب بتاعى فى الجزأ إللى بين الباب و الرفرف ......العربية لسه جديدة و أنا بسوق بقالى حوالى 9 سنين و عمرى ما خبط العربية حتى و أنا بتعلم الحمد لله فيوم لما أشترى زيرو تتخبط .......................... مقولكش أنا كنت هاتجنن أد إيه

بس الحمد لله نزلت بهدوأ و تملكت أعصابى و قولتله حرام عليك إنت لسه نايم ؟ كان الكلام ده الصبح الساعه 7 تقريبا الراجل قالى آسف و الله غصب عنى مخدتش بالى ....أنا كل إللى عملته قولتله توكل على الله و مشيت لآن الحمد لله مأمن فأذيت الراجل مالهاش لازمه و العوض على الله هو صحيح أنا العربية فضلت مركونه فى التوكيل حوالى 18 يوم إستهبال بس تقول إيه عين العربية الجديده و الحمد لله على أد كده :)

**monuir** · 28-04-2007 01:17 PM

وقابل ما تتكلم رزعلك بأديه الأتنين على كبوت العربيه

أجرى وسيبه يكمل ضرب فى العربيه

**PAYOO** · 28-04-2007 01:25 PM

يا حفناوي بقول تخيل تخيل

وأنت يا منير الحل بتاعك 100 100

أنا عن نفسي هاديله الرخصه بتاعتي وأدله على وحدة مرور السلام إللي طلعت منها الرخصه عشان يروح يدي إللي أداني الرخصه بالجزمه على دماغه زي ما قال وأبقى كده أنتقمت من الناس بتوع مرور السلام إللي جايبن لي النقطه دول وابقى خلصت من العملاق ده برضه عشان هايخدلوا 3 شهور حبس لاعتدائه على موظف في مرور السلام اثناء تأدية عمله

**hemma** · 28-04-2007 01:29 PM

انا لو مكانك افضل مركز ف نجوم اف ام والطريق ومبصش لحد من الاول :lol:

**Nader** · 28-04-2007 01:29 PM

يا جماعة لو دة حصل هيبقي الغلطة غلطتي برضة لاني كان -- واة من كلمة كان -- ممكن اصبر لحد ميعدي الخنفوس الصغنون دة. ثم بالنسبة للراجل دة فانت تقريبا انت بتتكلم عن قريني هحاول اهدية وبعدين نتفق علي كيفية التصليح. اما بقى لو مهديش فهتبقى مصيبة. خناقات الوزن التقيل الطويل العريض دية بيروح فيها رقاب واحنا عرفين الشعب المصري وجمالة الهيجي يحوش هيتهرس في النص وفي ناس ولاد حلال بقى تيجي فالزحمة وتضرب وهما مش بينين من الارض اصلا -- حقد بقى-- بس بيبقوا معتمدين انك مش شايفهم فيضربك فالزحمة ويبعد وفالزحمة برضة يلف على التاني-- العدو يعني-- ويديلو -- شلوت-- في قصبة رجلة -- الهيطولها بقى-- ويبعد. ومن جهة اخرى يجيلك واحد ابن .... يقلب الموبيل من العربية ويخلع. اما الناس بتوع اليجي فالريش بقشيش دول فانا مش هتكلم عليهم