الموضوع: سؤال لملاك الفلوانس

المشاركة الأصلية كتبت بواسطة engtmk

الف مبروك مقدما النتشه ديه مش جامده اوي زي مانت متخيل وبتكون علي السرعات البطيئه اوي
وانا رحت التوكيل واختفي تقريبا تماما

قطع الغيار زيها زي اخواتها الزيرو من نفس الفئه لا هي قمه الغلا ولا الرخص

مثال تيل فرامل خلفي بالتركيب ب 500 جنيه
اكصدام بحوالي 2200 جنيه

يعني في المتوسط

علي فكره لو سالت علي اسعار قطع غيار الجيتز هتلاقيه قريبه منها

عشان انا عندي الاتنين :10d5c8w1107:

متشكر جدا لحضرتك على سرعة الرد

معلش سؤال كمان هو ايه نظام البيع والشراء وسعر اعادة البيع فى الفلوانس؟

انا من وجهة نظرى ان السعر فى تحسن........بالإضافة الى ان السعر بيعلى لما العربية ملاكها ما بيشتكوش منها........لكن لو أى عربية ظهر فيها مشاكل.....دا طبعا بيأثر على سعر اعادة البيع لأن الموضوع ده عرض وطلب
لكن مثلا الميجان 2..........مشاكل الكهربا والحساسات إداها سمعة مش كويس.........عشان كدة سعر إعادة البيع نازل جدا
لكن الفلوانس بقالها 3 سنين فى السوق ...........والحمد لله الشكاوى منها تنحصر فى (عوامة البنزين بتتغير فى الضمان عشان مؤشر البنزين مش بيددى قراية مظبوطة) - (الطارة الجلد بتقشر.........وبرضه التوكيل بيغيرها فى الضمان)
والحمد لله ما فاتكرش ان فى مشاكل تانية
بالنسبة لنتشة الفتيس..........دى طبيعية جدا وموجوجة فى الفانتازيا والسيفك (اللى انا مجربهم بنفسى)
لكن النتشة دى أخف كتير عن نتشة فتيس الميجان 2
وبالتوفيق

المشاركة الأصلية كتبت بواسطة Ahmed_selmy

طيب بالنسبه لاستهلاك البنزين اخباره ايه؟
وهل فعلا لازم احط 95 والا العربيه حيكزن سحبها تعبان وعوامة البنزين بتعطى قرايه غلط
واخبار الاستجابه بتاعة العربيه والكيك داون ايه؟
اسف على الاطاله

هى استهلاكها يعتبر كويس.......بس مش موفرة
يعنى زيها زى الفانتازيا وال a5
يعنى ال 10 لتر يعملوا معاك جوة البلد......فى الزحمة والبهدلة دى حوالى 60 كم
بس فى السفر حاجة تانية..........ال 10 لتر يعملوا معاك حوالى 120 كم
بس من غير حرق وكيك داون
بالنسبة لاستجابة الكيك داون .......يعتبر كويس مش وحش........بس مش فظيع.......بس العربية بتلقط كويس لما تدوس على دواسة البنزين..........بالذات فى السرعات العالية
بالنسبة لعوامة البنزين .............لما بتتغير فى الضمان بتبقى مظوطة ومافيهاش مشاكل
بالنسبة للبنزين 92 كويس على العربية .....مش لازم تحط 95

المشاركة الأصلية كتبت بواسطة ahmed_selmy

هل هى فعلا موتورها هو موتور التيدا
واخبار التكييف ايه فى لالفئه اللى ب142000 ايه حلو ولاعادى ولا كويس والقعده بتاعتها مريحه ولا متعبه
وبالنسبه للسوند سيستم اخباره ايه
معلش انا عندى تساؤلات كتير بس بصراحه ان مش لاقى موضوع متكامل عن مميزات وعيوب العربيه زى اللى كانوا عاملينه فى قسم نيسان

التكييف مش زى اليابانى ........هو مش قوى.....بس ما تعرقش وهو شغال
يعنى لما يكون الجو ولعة زى اليومين دول......العيب ان العربية تاخد وقت من ربع لنص ساعة عشان تسقع العربية..........وطبعا عشان العربية بتبقى مخنزة درجة حرارة عالية والكلام ده لو انت سايبها تحت الشمس بال 3 : 4 ساعات
بس هرجع وأقول ان أغلب الأوروبى تكييفه زى بعضه.....بس الفلوانس بينزل منها الخلييجى تكييفها أقوى.....وده طبعا زكاء من رينو لأن درجات الحرارة عالية جدا فى الخليج......غير مصر
يعنى انا من وجهة نظرى ان التكييف فى الفلوانس مش وحش ومش حلو......بس شغال
لكن فتحتين التكييف اللى ورا حلوة جدا.........لأن ساعات اللى بيبقى قاعد ورا مش بيوصله هواء التكييف اللى قدام.........فا بيفضل حران ........لكن فتحتين التكييف اللى ورا بيخلى اللى قاعد ورا يسقع مع اللى قدام
الساوند سيستم من وجهة نظر واحد مجرب:
أحسن من السيفك .....وأقل من الفانتازيا فى البييز
لكن كمجمل : نقى وصوته نضيف.....وتستمتع بيه وانت مشغل اى أغنية
بالنسبة للقاعدة جوة العربية : بصراحة فوق الوصف........انا رحت شرم بيها وطبقت لليوم التانى بدون أى تعب او وجع فى الضهر او تنميل فى الرجل
انا السيفك كانت بتتعبنى فى قعدتها ....الفلوانس بصراحة مريحة جدا جدا جدا........وبتبقى قاعد كاشف الطريق كويس .....وماتحسش بمطبات الهواء اللى فى الطريق ...,عفشتها جميلة جدا وناعمة
والباور أنعم من باور الالنترا الجديدة اللى الناس كلها موهومة بيه........نااااعم جدا....بس بيتقل على السرعات العالية وده طبعا بيددى احساس بالثبات وتماسك العربية فى السرعات العالية

بالنسبة للنتشة : بصراحة اعتبر ان مافيش نتشة فى الفتيس..........بالعكس ...انا شايف انها قلت كتير جدا عن الميجان 2.........وبقت طبيعية زى اى عربية اوتوماتيك

توكل على الله..........العربية دى بصراحة تمنها يستاهل يعددى ال 160 مستريح.......وقطع غيارها يعتبر أرخص من عربيات فى فئتها
يعنى تيل الفرامل مثلا ب 440 جنيه (كانت فى السيفك ب 660)
فوانيس الشبورة (ب 500 جنيه تقريبا- وكانت فى السيفك ب 2400 جنيه)
فلتر بنزين ب 90 فلتر هوا ب 190 وفلتر الزيت ب 40 والبوجيهات ب 100 جنيه
فلتر التكييف ب 240 تقريبا (مش أكيد)

بالنسبة للتوكيل (من أحسن التوكيلات فى مصر)
انا رحت فرع العبور ............بصراحة نضيف ومنظم جدا
واى شكوى ليك فى العربية .....بيعالجوها ويغير اى قطع غيار لو باظت قبل الضمان (زى الطارة والعوامة )
وفيه وايرلس ومشروبات ساخنة ببلاش
وواسع جدا......
وليه فروع كتير........وقطع الغيار متوفرة برضه لو حبيت تشترى برة التوكيل ....بس ما انصحش خالص (لأن الأصلى أصلى)

وأى خدمة فى اى وقت ....وانا جربت الحيرة دى قبل كدة......وكنت فاكر ان الفلوانس ان فيها مشاكل زى الميجان 2 ..........لكن أتاكدت ان كل المشاكل اللى كنت في الميجان 2 اتصلحت واتعالجت
ولما جبت السيفك......كنت مكتئب وحزين.........لأن بصراحة الميجان 2 ركوبة محترمة ومريحة .....ومالقيتش الموضوع ده فى السيفك..........لكن الحمد لله لقيته فى الفلوانس
وان شاء الله ربنا يوفقك وتجيب التوب لاين او الهاى لاين
بلاش الفئة الاولى الاوتوماتيك........