الموضوع: تقريرى لسيات قرطبه 1997 ؟!

السلام عليكم

أذيكم يا رجالة يارب تكونوا كلكوا بخير وبسلام

اسف عن بعدى عن المنتدى بسبب ظروف شغلى وعائلتى
انا اشتريت سيات قرطبه 97 فى شهر 2 اللى فات لونها نببيتى 1800 سى سى


تقريرى لعربيتى سيات قرطبه 1997


بصراحة العربية ممتازة وجميلة جدا فى السواقة بس
غيرتلها شوية حجات كدة لانى كنت عاوز اشدها كويس

1- لما اشتريتها اشترتلها طرمبة باور استيراد كان فى صوت ونة جامدة فى الدركسيون تكلفتها 300 جنية من سيد سراج فى الحرفيين

2-غيرتلها كوبلن كامل (داخلى وخارجى )شمال استيراد لأنو كان ضايع تكلفته كانت 200 جنية و2 جلب مقصات جديد ب 70 جنية

3-وجبتلها جوز مساعدين امامى ( جولف 3 )استيراد ب 300 جنية وجوز مساعدين خلفى جديد ب 500 جنية ماركة مايلو المانى

4- طقم تيل امامى وخلفى واضحك عليا فيه محدش بيتعلم ببلاش وقاعد يصفر طول مانا ماشى اروح اصنفره يرجع تانى بعد اسبوع + ماستر خلفى يمين ب 300 جنية كلهم

5- كانت صدمة ليا لما عرفت بس اضطريت اغيره وهى طرمبة بنزين ب 450 جديدة من مهندس رشادفى الحرفيين (تنتيش فى الملفات + العربية مخنوقة جدا وطبعا لما شوفت القديم شكله لا حول له ولا قوة )+ وتغير فلتر بنزين ب 60 جنية
6-المفاجاة ليا انا نحس من يوم ماجبت العربية تغيير طقم دبرياج كامل ( بلية + ديسك + اسطوانة )رجة جامدة جدا فى الطلوع والعربية مش بتحسب خالص ب 650 جنية ماركة فاليو اسبانى

والليلة الكبيرة بقه بعديها التكييف وبلاويه

روحت لكول كار اللى فى جسر السويس ماسك توكيل لادا لتركيب التكييف والحجات ديه وعربيات محترمة بتروحله عاملى التكييف جابهولى من اوله لاخر وكشف بالصابون على الخراطيم واقفل البوابة والتكييف مش قد كدة يعنى الاجل قالى عندك الكويل وحش او خلص بيجيب اخره سالت عليه لقيته ب 850 جنية استيراد + سربنتينة بريداتير بمروحتين دول معرفش سعرهم للمصداقية
ولو تلاحظوا معظم الشغل فى العفشة كلها وجبتلى الضغط مع انها عمرها معملت معايا حركة وحشة ع الطريق بس كنت لازم اغير كل الحجات ديه عشان احس انى سايق عربية المانى بجد


ولو تلاحظوا ان كل بلاوى وحرقة الدم للعربية فى العفشة مع ان صاحبها قبليا سواقته هادية جدا جدا لكن المكنة بسم الله ماشاء الله عليها غيرتلها بوجيهات بس مع تغيير الزيت

وحالتى النفسية هاقول حلوة ووحشة فى نفس الوقت

هيا عربية حلوة وجميلة وكاملة ما عدا فتحة سقف
مرايات كهرباء + ازاز كهرباء + نور شبورة + تكييف + كهربة العربية كلها شغالة ومفهاش لعب فيها

والواحد مش عايز يبيعها بعد كل ده لانها عربية تستاهل فعلا الواحد يصرف عليها ويحس بيها

واللى عايز اقوله ان فى حاجة اليومين دول صوت ونة او زى ماتقول نعره على التانى والتالت جاى من المكنة مش عارف ده سير كاتينة عايز يتغير ولا بلية دينامو ولا اية مش فاهم ياريت تفيدونى يا رجالة ارجوكوا


واسف للاطالة عليكوا

اخوكوا محمد