السلام عليكم
اطيب الامانى بالصحة و العافية و صباحكم حرية ..
تقرير عن صيانة تكييف اللينيا و تغيير زجاج الشراعة الامامية فى التوكيل
نبدأ على بركة الله
يوم الاربعاء الموافق 27 \6\2012 توكلت على الله و اتحركت من المنصورة الساعة 8 صباحا و بعد معاناة مع الطريق و ازدحام شديد عند بنها بسبب اعمال صيانة للطريق ( الله يسامحه اللى اختار يصلح الطريق فى عز النهار @:
المهم وصلت التوكيل ( اوماترا جسر السويس .. للاسف ) فى تمام الساعة 10:45 صباحا
العربية دخلت التوكيل الساعة 1:30 بعد الظهر ( لانى مكنتش حاجز قبلها و مقدرش اتكلم رغم ضيقى من الاتتظار طول اليوم .. )
طبعا الاستقبال كان فاتر من المهندسين ..بلغتهم بالمطلوب فى العربية ( تكييف + زجاج ) لقيتهم بيخيرونى اعمل حاجة واحدة عشان الاتنين هايخدوا وقت !
قلت اختار التكيف هو الاهم فى الحر ده و قلت طالما هاتاخد وقت يبقى فى كشف على الدورة بقى و حركات ..
العربية نزلت الورشة تحت تقريبا نص ساعة و معرفش اتعمل فيها اية و طلعت فوق الصيانة اتشحنت فريون و بعدين اختفت ساعتين معرفش كانت فين و لقيت المهندس بيبلغنى ان التكييف اتصلح و انه كمان بيركبلى الزجاج طبعا انا كنت مبسوط ان حاجتين كبار اوى زى دول خلصوا بمعجزة فى زمن قدرة 4 ساعات و نصف ! .. بلا وكسة
بس قلت اتقل شوية للاخر و بلاش افرح بالمعجزة دى ..
شوية و لقيت مهندسة الضمان مع واحد من الفنيين واقفين قدام العربية و سحنتهم مقلوبة و مندمجين فى التفكير العميق !
انا قلت بس شكلهم عملولى المفاجئة بتاعت كل زيارة
دخلت للمهندس اللى استلم العربية و قلتله خير العربية فيها حاجة ؟
الاجابة كانت صدمة ليا .. مفيش حاجة يافندم متقلقش
قلتله على مهندسة الضمان و الفنى
رد و قال لا يا فندم دول بس محتارين و مش عارفين الفريون بيسرب منين !!!!!
قلتله طب منين قلتلى التكييف اتصلح ؟! قالى يا فندم احنا دورنا و مالقيناش اى تسريب من بره
و حضرتك تسيبلنا العربية يوم ( و اروح المنصورة ماشى ) نفك التابلوه و نشوف اية المشكلة و طبعا رفضت ..
المهم هاجررى الحوار شوية لحد استلام العربية و تسليم الفاتورة ليا
قبل ما اكمل .. كنت سألت على سعر قطعة الزجاج عندهم اول ما وصلت قالولى 305 و بالضريبة 335 بدون مصنعية قلنا ماشى
و مهندس الاستقبال بلغنى انها بالتركيب هاتقطع 420 قلنا ماشى
و سألته على التكييف قالى لو حاجة تبع الضمان هاتعملها بمصنعيتها علينا و لو حاجة بره هاتبقى عليك .. قلنا ماشى ( على اساس ان المشكلة موجودة اصلا من اول ما اشتريت العربية و اكيد هاتبقى ضمان )
نكمل بقى الحوار
مهندس الاستقبال معلش يا فندم بس مهندسة الضمان مش راضية تدخل صيانة التكييف فى الضمان !
رديت و قلت : انتوا مش كشفتوا عليه و ملقيتوش تسريب خارجى ؟ و العربية عندكوا فيها مشكله من اول ما اشتريتها ؟ ازاى مش ضمان ؟!
و كان الرد المتوقع معرفش و الله يا فندم بس مش بأيدى حاجة اعملها و انا عايز اساعدك و بلا بلابلا كتير كده
قلتله ورينى الفاتورة لقيتها 580 بدون صيانة التكييف !
قلتله انت مش قلت 420 ؟ و اكتشفت بعد كده ان فى مادة اللزق بتاعت الزجاج لواحدها ب 225 جنيه و محدش جاب سيرتها خالص من الاول !
و ان ال 580 من غير المصنعيات 100 ! ده بالاضافة لصيانة التكييف اكتر من 200 جنيه على حسب كلام المهندس
المهم بعد بلا بلابلا كتير طلعنا لمدير الصيانة كتر خيره راجل محترم دخلى التكييف فى الضمان !
و اخيرا المحصلة النهائية التكييف ما اتصلحش يومين و يسرب الفريون و افضل اعانى طول الصيف زى كل سنة
كعيت 700 جنية فى حتت ازازة 10 سم فى 5 سم
و بكده انتهت احداث المسلسل للابد
اسف بشدة على الاطالة
و شكرا لحسن قرائتكم
جمعة مباركة و احب ان اذكركم بساعة اجابة الدعاء فى هذا اليوم العظيم و اترك لكم اختيار ما ترونه مناسبا من الادعية :)
تقبل الله منا و منكم صالح الاعمال و الى اللقاء
و السلام عليكم :)
المفضلات