الموضوع: ما هو أفضل نوع بطرية جافة للكيا برايد هاتشباك 1999 - العصفورة

بسم الله الرحمن الرحيم

أخواني الكرام وفقني الله لشراء سيارة كيا برايد هاتشباك 1999
منذ حوالي أسبوع وحالتها ممتازة الحقيقة , لكن تعرضت معاها
لثلاث مواقف أكاد أكره النظر إليها بسببهم , خاصة وأنا جديد في القيادة

الموقف الأول ( علي كورنيش المعادي )

حبيت أخرج أنا وزوجتى وأبني لإسعادهم بالسيارة الجديدة
وكانت الساعة 2:30 صباحاً لأني لسه بتعلم عليها القيادة
وبعد أن أنتهينا من الجلسه علي الكورنيش فوجئت أنها لا تدور وحتى التابلوه مش منور
وأنا لسه بقول يا هادي في القيادة فما باللكم بالميكانيكا
المهم , ألهمني ربي أني أشاور لتاكسي وقف وحاول يدورها
وهي مش هنا زقيته وحاول أكثر من مره يدور ولا الدموع
في الأخر بدل البطاريات ودور العربية ببطاريته وبعدين رجعلي بطريتي
وروحت وحمدت ربنا .

الموقف الثاني ( عند مؤمن المعادي )

بردة الساعة حوالي 3:00 صباحاً زي ما قلت لسة بتعلم القيادة
بعد ما خلصنا قعدتنا أجي أدور وكأني في عربية تانيه ولا هي هنا التابلوه بس منور
برده ربنا وقفلي ولاد الحلال ودوروها بس المره دي بالزق ودارت والحمد لله .

قلت مبدهاش رحت لكهربائي كشف علي البطارية وقالي تقريباً البطرية دي بتسقط
ولقي سير الدينمو مش مشدود كويس ولقي أملاح كتير جداً في القشاطين
فقرر يغيرهم ,,, وهو بيغير القشاطين وجد الكابل مليان ملح قام كابب عليه
مياه ساخنه من براد الشاي وشد سير الدينمو .

ورغم ذلك لم تنتهي المشكله دي بقت ألعن ....

الموقف الثالث ( أمام باب العمارة )

طبعاً في نفس الوقت تقريباً حوالي الساعة 2:00
بس المره دي كانت أصيله معايا علي ما دورتها وحركتها 2 متر ورجعت أقفل باب الجراج
لقيتها بطلت جيت أدور مدرتش والتابلوه بس منور ( كتر خيرها مبهدلتنيش المره دي )
علي الأقل متبهدلتش زي كل مره أني أدور علي حد يدورهالي .

أصلي نسيت أقلكم أني كنت كل مره كنت بدور علي حد يدورها وكل مره
أبقي خايف يخدها ويجري علشان كده كنت بقعد معاه في العربية
وكل يوم نفس السؤال المنطقي ,,,, يبصلي ويقولي هو أنت مش هتزق ؟؟؟
وهو ميعرفش أني كنت بدور علي واحد كمان يزق وأفهمه أني خايف أن
اللي بيسوق يجري بيها والحمد لله كله كان بيتفهم الموضوع ده .

السؤال : أنا عايز أغير البطارية الحزينة دي وخبرتي في العربيات ذي خبرتي
في الطب فوجدت أفضل شئ أني أغير البطارية لعل إن شاء الله يكون هذا
هو الحل ... فبأي ماركة بطارية جافة تنصحوني ؟ وسمعت أن مفروض أنها
تتناسب مع السيارة فأرجو مراعاة ذلك !! وثمنها تقريباً ؟؟ وأشتريها منين ؟؟

أسف علي الإطالة

والسلام عليكم ورحمة الله وبركاته

55 امبير acdeleco