مشورة مطلوبة من خبراء نايل موتورز

**abohagar2001** · 22-06-2008 01:25 PM

السلام عليكم
اخوكم ابو هاجر المصرى
اشتريت لانسر 1300 بس عاوز اسأل شوية حاجات يعنى
ايه الحاجات اللى اعملها احافظ بيها على العربية علما بان انا اسافر بيها يوميا فى حدود 200 كم
برضه الزيوت تتغير كل اد ايه زيت موتور - فرامل -خلافه ياريت تفيدونى لانى خام فى مواضيع صيانة السيارات ومن انصار اركب وامشى
برضه ايه هى الكماليات اللى تتحملها السيارة
معلش اسئلتى كتييرة بس عشمى فيكم كبير يا لانسراوية
ودمتم بخير وشاكر جدا مقدما لمن يتحمل مشقة توجيه النصيحة لوجه الله
والسلام عليكم

**مصراوي جدا** · 22-06-2008 02:21 PM

أهلا بيك يا ابو هاجر ومبروك العربية

هو الحفاظ على العربية يعني المداومة على الصيانات الدورية ليها في مواعيدها

حضرتك كده بتعمل 10 آلاف كيلو كل شهر ونص او شهرين

الصيانات الدورية بتكون عند الألف الأولى (غيار زيت وفلتر)

ثم صيانة الـ 10 آلاف ثم 20 ألف ثم 30 ألف : ودول بيتم فيهم تغيير زيت وفلتر (يفضل زيت موبيل 1 أو ما يماثله من الشركات الأخرى علشان بيقعد 10 آلاف كيلو فيتغير مع الصيانة) وتربيط عفشة ومراجعة على الفلاتر والسيور والعربية عامة
وتغيير تيل فرامل لو احتاجت العربية

ثم صيانة الـ 40 ألف ودي الصيانة التقيلة الأولى للعربية (ثم مضاعفات الأربعين) وبيتم فيها تغيير زيت وفلتر زيت وفلتر هواء وفلتر بنزين وبوجيهات وزيت فتيس

ثم صيانة الـ 50 و 60 و 70 ودول مثل 10 و20 و 30

ثم صيانة الـ 80 ألف ودي مثل الـ 40 ألف لكن بتزيد عنها تغيير سيور الباور والدينامو ومجموعة الكاتينة (سير وبلية وشداد)

اعتقد لو داومت على عمل الصيانات الدورية في مركز خدمة كويس يبقى باذن الله هتحافظ على العربية كويس

بخصوص الكماليات اعتقد السبويلر بيجمل شكل العربية جدا وفيه في المنتدى هنا كذا موضوع عن السبويلر وممكن الاعتاب الجانبية والامامية وبرضه فيه مواضيع عن محل سبير كار عنده كماليات كويسة

**مصراوي جدا** · 25-06-2008 11:26 AM

دي حضرتك مراكز الخدمة الخاصة بالتوكيل والمراكز المعتمدة وانا مكتبي في مركز الخدمة الرئيسي في قليوب لو تحب حضرتك تشرفنا اهلا بيك في اي وقت

**مصراوي جدا** · 01-07-2008 10:23 AM

خلاص لما العربية تكمل 10 آلاف كيلو شرفنا في مركز خدمة قليوب نعمل صيانة العشرة آلاف

**Oushy** · 07-07-2008 08:58 AM

المشاركة الأصلية كتبت بواسطة onsi

سؤال؟
هل كل اللانسر لما تعدى سرعة 120 تدى انذار صفارة دائمة ؟؟ولا صفارة لمدة معينة وتفصل لان عندى لاحظت انها صفارة دائمة

هل حد لاحظ او عندة نفس الشيء؟

لا للأسف بيفضل يزن ما بيسكوتش غير لما يعقلقك

ونفسي أشلها أساسا ياريت يا جماعه لو حد يعرف ليها حل ولا لاء يقول .....

**مصراوي جدا** · 07-07-2008 01:21 PM

المشاركة الأصلية كتبت بواسطة onsi

سؤال؟
هل كل اللانسر لما تعدى سرعة 120 تدى انذار صفارة دائمة ؟؟ولا صفارة لمدة معينة وتفصل لان عندى لاحظت انها صفارة دائمة

هل حد لاحظ او عندة نفس الشيء؟

هي صفارة الانذار دي مواصفة خليجية تعني انك تعديت السرعة القصوى في الخليج 120 كيلو
تفاصيل الموضوع موجودة بالكامل في الموضوع ده :

http://www.nilemotors.net/Nile/showthread.php?t=4145