السلام عليكم ورحمه الله
اكتب اليكم بعد عودتي من رحلتي الى الساحل الشمالي لقضاء اجازتي السنوية بدري بدري قبل الزحمه لانها افضل الاوقات لقضاء اجازة هادئة انت وزوجتك واولادك
بلا زحمه ولا دوشة والكل بيمتحن وحمامات السباحة فاضية والجو رايق وجميع الخدمات انت اول من يستخدمها خلال الموسم

وطبعا كانت فرصة رائعة لتليين الكرولا وان كنت اشك انها بحاجة الي تلييين
انطباعي عن السيارة :
انا سوقتها كتير خاصة ان نفس الموديل مع زوج اختي بس سيارتك حاجة تانية
العربية واسعة جدا من جوة-ولما اقول واسعة تعتبر من اوسع السيارات في فئتها (اوسع من الاوكتافيا والفوكاس والمرسيدس 200 والصني والسيراتو والالنترا الجديدة والقديمة )
بجد ما يضاهيهاش في الوسع غير الماتيرا والماتريكس
النعومة حدث ولا حرج مفيش حاجة اسمها تحس بمطب وان كان ده بياثر علي ثباتها(بس ليها حل زي ما عرفت)
العزل فوق الممتاز ما تسمعش صوت الموتور نهائي جوة العربية ولا تحس انها دايرة لو واقف بيها لدرجة ان زوجتي بتقولي مش هاتدور عشان تسخن ونمشي والعربية دايرة بقالها 3 دقايق
الشنطة الخلفية خرافية
نيجي للسلبيات
الكبوت مش كل حاجة متقفلة فيه ومش عارف ليه فكرني بمنظر كبوت الفيرنا وكل سلك رايح في حتة وجاي من حتة شكل مش منظم كدة زي الريو
كاوتش صغير قوي علي عربية بالحجم ده وده احد اهم عوامل عدم الثبات في السرعات وده لسه ماجربتوش في عربيتي عشان ماعدتش ال 100 بيها
مقاس الكاوتش 14/185/70
وان كان في ناس اصحابي ركبوا لحد جنوط 17 وماعملهومش مشاكل خالص علي نفس العفشة بس انا شايفه مبالغ فيها شوية
التبلوة والزراير حاسسهم قديم شوية مش موديل 2007 بس التابلوة مبطن كلة جلد ودي ميزة تحفة
خامات السيارة كلها فوق الممتازة
التسارع مش اد كدة ماتحسش بعافية الموتور ولا الاغراء بالجري زي اليرو
تحس انك عايز تسوق بالرحة خاصة ان ابعاد العربية كبيرة نسبيا مما لا يشجع علي المناورات والغرز والشنطة مرتفعة قوي ومش سهل تركن
وضعية القيادة تحسسك بالاسترخاء مش باقعدة الرياضية
الكاسيت الغبي بتاع تويوتا اللي مش مخليني عارف اركب السي دي بتاعي عشان حجمة الكبير ولو شلتة هايفضل مكان فاضي ومقضيها بامبثري وشريط من اللي ب 8 جنية
تخيلو بعد السي دي ال ALPIN اسمع امبثري بلاير

ارجع لسبب اختياري الكرولا بعد الايعاز الشديد من محمود حفناوي وجد له ميل وهوي في نفسي ان اللانسر مش عاجباني فعلا لان الريو كانت احلي منها شكلا وسواقة وتجميع وكله
اما الالنترا كانت عاجباني جدا بس مش عايز اكرر تجربتي واحط رقبتي تحت سكينة غبور مرة تانية خاصة اني مجربه كتير وعارف حركاتة النص كم
ومكنتش متخيل اني عشان اخد عربية في اير باج وايه بي اس لازم تكون اتوماتيك وتمنها معدي 120 الف جنة وسعر اعادة البيع هايكون منخفض طبقا لافكار شعبنا العظيم ان دي كوري يا باشا
وانا لا اطيق السيارات الاتوماتيك نهائيا
وكذلك الحال لدي سوبارو عشان محطش رقبتي في ايد ابو غالي الي الابد لاني لا اظن اني ساجد بلية يقدر يحط ايده في عربية سوبارو ولو قدر انا مش هارضي :lol: :lol:
الكرو عمر افتراضي-برستيج-اعدة بيع-وسع-استهلاك بنزين-توكيل محترم-شوية افكار قديمة مترسخة بان فاتك الياباني متاصلة في دماغ شعبنا
مبقاش قدامي غير الكرولا ولما رحت احجز مالقتيش غير الفاضي اللي بزجاج عادي ومن غير سنتر والكاملة كانت بعد 3 شهور
يعني اقعد 3 شهور من غير عربية !!!!
جبت دي واتفقت مع التوكيل علي تركيب الزجاج الكهربائي بعد صيانة اللاف وهاكون وفرت حوالي 5 الالاف جنيه
وركبت السنتر قبل ما اسافر وزي الفل والحمد لله
اما عن الثبات فسالت وعرفت ان فيه سوست اصلية كوني بتركب مكان الموجودين ودي بتخلي ثبات العربية جامد لحد 190 وعن تجربة وتمن الاتنين 1600 جنية
بس عيبهم انهم بيخلو العربية انشف شوية
قولنا نمش شوية بدول لحد مانشوف اللازاز الكهرباء الاول-مش متخيل راكب عربية باكتر من 100 الف وازاز عادي
مش عارف توكيل ايه ده
نسيت اقولكم ان النهاردة بعد ما ععديت اللاف وانا راجع وفولت بنزين العربية عملت 740 كيلو ب 40 لتر 92 اوكتين علي طرق طوالي بحمولة متوسطة 3 انفار وشنط كتير قوي
ومشغل التكييف نص المسافة والسرعة لم تزيد عن 100 ومنهم حوالي 50 كيلو جوة 6 اكتوبر والنخيل يعني مش بالرحة
شايفة استهلاك ممتاز للبنزين يارب ادم علينا نعمك

كريم منير
تويتاوي جديد
كياوي منشق :lol: