ربنا كرمني واشتريت مازدا 323

**lotfyonline** · 22-06-2008 11:21 PM

السلام عايكم ورحمة الله وبركاته:arghh:
يا جماعة الحمد لله ربنا كرمني بعد طول حيرة وسؤال إني أشتري مازدا 323 موديل 82 ياباني وعايز أقولكم إن المنتدى ده كان ليه نصيب كبير في قراري وشجعتوني على المازدا .:embarrassed2:
الحمد لله ربنا وقعني في عربية حالتها حلوة قوي لدرجة إن الميكانيكي اللى من طرفي ( وهو راجل كبير وشاطر قوي) فحصلي قبل كده كام عربية كان بياخد على الاقل نص ساعة المرادي بالظبط 5 دقايق ولقيته بيتكلم مع صاحبها في السعر لدرجة إني أستغربت وقولتله مش عاوز ترفعها ولا تمشي بيها راح مميل عليا وقالي متتكلمش خالص دلوقتي دي لقطة ( العربية فابريقة حوض وشنطة ودواخل وبعض الخوارج وموتورها ممتاز)
المهم خلصناها على 25 بالعافية وأنا كنت مستكترهم بس هو قالي لو طلع بيها السوق هتجيب أكتر من كده بحوالي ألف ونص.
المهم يا شباب علشان مطولش عليكم أنا طالب من كل واحد يتصدق عليا
طبعا مش فلوس
أنا عاوز كل واحد يكتبلي معلومة بخصوص العربية وخاصة إني مبتدئ ميكانيكا وسواقة
وعقبالنا كلنا لما نركب مازدا 3 إن شاء الله
وجزاكم الله خيرا

**SEATLOVER** · 23-06-2008 12:26 AM

الف مبروك و ربنا يباركلك فيها و يديك كل خيرها و يكفيك شرها كلة

خد الموضوعين دوول فيهم معلومات حلوة اوى عن العربية و اماكن حاجتها و صيانتها
وادعى لرومانى باشا صاحب المواضيع .. ربنا يباركلة فى عربيتة المازدا ويكفية شر طريقة

ويا سلام لو دعتلى كمان
http://www.nilemotors.net/Nile/showthread.php?t=20883

http://www.nilemotors.net/Nile/showt...577#post269577

**lotfyonline** · 23-06-2008 12:41 PM

ألف شكر وربنا مايحرمنيش من منتداكم
وعلى فكرة دعتلكم والله

**nobody** · 23-06-2008 01:00 PM

الف مبروك على السيارة ربنا يباركلك فيها

**harphosh** · 23-06-2008 01:21 PM

الف مبروك يا باشا ربنا يديلك خيرها ويكفيك شرها
حقيقى عربية ناعمة وجميلة عن تجربه
:party:

**m_waheed** · 28-06-2008 07:02 PM

ربنا يباركلك فيها ويكفيك شرها ان شاء الله

انا كان معايا مازدا وفضلت معايا سنتين
العربية كويسة جدا وقليل اوي الواحد يلاقي عربيات قديمة وناعمة لان لو العربيتك كويسة وعفشتها كويسة الدركسيون بيكون معاك مية وهي فيها مميزات كتيرة سحبها كويس علي الطريق يعني انا كونت برجع من القاهرة لاسكندرية علي 140 وده عادي ومش كل العربيات القديمة تقدر تعمل كده
برده البنزين بتاعها كويس جدا كانت بتعمل معايا في الصفيحة 210 كيلو
قطع غيارها موجودة ومنتشرة في ام المصريين اكتر من 4 تجار فيهم اولاد جمال الدين وهما كويسين وفي برده في الدقي علي ش التحرير
وقطع غيرها مش غاليها يعني كويسة
هقولك علي اسعار بعض الحاجات اللي جيبتها بس ده من حوالي 3 شهور
طقم عافشة اربع مساعدين وطقم بيض وبارات دركسيون وطقم الجلب بحاولي 1150 جنية
فلتر البنزين 6 جنية المصري وهو وحش المستورد احسن
فلتر الهواء 15 جنية
فلتر الزيت 14 جنية
اهم حاجة انك مش تبخل علي العربية عشان بعد كده تستريح

**Hassan Khalil** · 28-06-2008 11:09 PM

الف مليون مبروك
ربنا يبارك لك فيها .. و يحافظ لك عليها .. و تستعملها في الخير دائما

**ENG\AHMED** · 29-06-2008 11:48 AM

العربية دى من العربيات المحترمة بالذات لو حالتها نضيفة وانت حافظت عليها
فى ميكانيكى متخصص فى المازدا الموديل دة فى القلعة اسمة بلبل راجل محترم اوى وامين وحافظ العربية
هى العربية دى لونها اية؟