الموضوع: صيانة 60 الف

الاخوة الاعزاء اعضاء المنتدي
تحية طيبة . وكل عام وانتم بخير
حبيت انقل لكم تجربتي في عمل صيانة ال60 الف في منصور فرع اسيوط وده فرع جديد فتح من كام شهر كده
اولا العربية اوبترا مانيوال 2009 عاملة 64 الف كم كان فيها بعض الملاحظات وهي كالتالي
1- ترشيح زيت اسفل السيارة وده من الفتيس
2- كومبروسر التكييف بيفصل بعد دقيقتين كده من التشغيل
3- معدل استهلاك البنزين في الاواخر اصبح عالي
4- بعض الملاحظات الاخري البسيطة مثل لمبة كشاف واطي يمين, لمبة نور التحديد شمال
المهم استلموا مني العربية الساعة 11 الصبح وبعدها بنص ساعة بعتولي علشان يبلغوني ان ترشيح الزيت ده من اويل سيل الكوبلن يمين ومحتاج يتغير بس للاسف مش موجود هايبعتوا يجيبوه بعد اسبوع المهم
الساعة 5 كانت كل حاجة تمام ولقيتهم بيبلغوني انهم لقيوا الاويل سيل بتاع الكوبلن عندهم وركبوه وزودوا زيت الفتيس والي مش موجود كان الاويل سيل بتاع الاوتو لكن المانيوال موجود وان فصل الكومبروسر بتاع التكييف كان بسبب ان فلتر التكييف مسدود واليكم تفاصيل قطع الغيار والمصنعيات والانطباع العام بعد الصيانة :
1- قطع الغيار
لمبة كشاف امامي 3.19جنية
لمبة كشاف امامي واطي 266.50 جنية
اويل سيل كوبلن عادة 64.53 جنية
فتلر تكييف 104.55 جنية
تيل فرامل امامي 185.45 جنية
فتلر بنزين 40 جنية
فلتر هواء 60.91جنية
بوجيهات اليكتروني 1 شمعة 36.36 جنية
تزويد فريون 200 جرام 35.88جنية
منظف كربارتير ووحدة خنق 22.17 جنية
مواد وخامات مستعملة 7.50 جنية
زيت فالفلين موبيل 1 كيلو 25.76 جنية
2 المصنعيات
صيانة كل 5000 كم 180 جنية
تغيير فلتر التكييف 20 جنية
تغيير اويل سيل كوبلن يمين 90 جنية
تغيير لمبة فانوس امامي يمين 20 جنية
تربيط الدائرة وسحب وشحن فريون 50 جنية
بس الحساب كله في اخر الفاتورة 1327 جنية
طبعا اي حد هايبص في الفاتورة هايلفت نظرة لمبة الكشاف الي ب266+26 ضريبة يعني داخله في 300 جنية قولت للمهندس لمبة ايه الي ب300 جنية دي يعني كده اللمبتين ب600 جنية ده انا اركب بيهم زينون قالي معلش يافندم اصلها اللمبة الاصلية قولتله معلش مع احترامي لو دي عربيتك هاتركب فيها اللمبة دي قالي انا مش معايا اوبترا المهم لقيت اني باضيع وقتي معاه قولتله انا مش عاوز اللمبة دي انا كده كده مش عاجبني نور العربية وهاغير اللمبات كلها قالي خلاص نشيلها حضرتك ونركب لحضرتك القديمة قولتله ماشي بس دخلوا العربية الورشة تاني وشالو اللمبة بتاعتهم وركبوا القديمة وشالو من الفاتورة اللمبة والضريبة بتاعتها بس طبعا المصنعية ماتشالتش مش مشكلة بس المهم ان الواحد حس انه مش كرودية للدرجة دي علشان منصور يضحك علينا بالمنظر ده
الانطباع عن العربية
لغاية الان حاسس ان العربية متكتفة بس المهندس قالي ده من تربيط العفشة لكن حاسس بنعومة عن الاول في السحب غير كده مافيش جديد
معلش طولت عليكم بس حبيت انقل لكم تجربتي مع احد مراكز منصور
نسيت اقولكم انهم بلغوني ان المساعد الامامي يمين بيجيب زيت ومحتاج تغيير وسعره 574 جنية بس قولتهم خليه شوية علشان نبقي نغير الاتنين مع بعض