الموضوع: قفشة غريبة في العربية لما ارفع رجلي من البنزين او ادوس مرة واحدة

العربية ايه ؟
بس عامة لو عربيتك قديمة ده العادى والطبيعى .

العربية رينو كليو موديل 2003، لو ده طبيعي طب اعمل ايه عشان اقلل من التأثير ده، لإنه بيديايقني ويدياق اي حد راكب معايا

وما زلت في انتظار رأي الخبراء

هو حضرتك لسة متعلم السواقة قريب ؟

ولا انت شايف ان المشكلة دى جديدة وماكانتش موجودة قبل كدة ..

في عربيات الـ Idle controller بيظبط الموضوع ده فيها لوحده بحيث لما تشيل رجلك ، الار بي ام ينزل بالتدريج و يلحق الموتور قبل ما يكلبش العربية ، وفي عربيات لا

بس الطبيعى ان اي عربية خصوصا لو كربراتير يحصل فيها كدة ..

حل الموضوع ده انك تظبط رجلك دبرياج مع البنزين
يعنى لو ماشى ع التانى لو عاوز تشيل رجلك من على البنزين يا اما بالراحة اوى اوى يا اما تدوس دبرياج وكذلك في الطلعة تسند دبرياج عشان العربية تبقى ناعمة معاك ..

انما رفع الرجل مرة واحدة من على الدواسة هيخلى الموتور حمل على العربية فجأة وهيفرملها .. ودى تبان كل ما كنت على سرعات عالية في غيارات قليلة
يعنى لو كنت جايب اخر الاولانى مثلا او اخر التانى وشلت رجلك مرة واحدة هتحس كأنك دست فرامل بالظبط

بالعكس بقى لو كنت في سرعات قليلة على غيارات عالية ، يعنى اول الرابع او اول الخامس ، ما تحسش بالموضوع ده

والخلاصة زي ما قلت في الاول الحل يكمن في انك تظبط حساسية رجلك وتوازن بين الدبرياج والبنزين على طول عشان سواقتك تبقى مريحة وناعمة ..

الأول لازم أشكرك على ردك الوافي

بالنسبة لتعلم السواقة، أنا فعلاً سواق جديد ولسه متعلم من 3 شهور بس.

بالنسبة لل idle controller، أعرف منين ان العربية عندي فيها الموضوع ده أو مفيهاش؟ طب لو فيها، فيه احتمال انه يكون بايظ مثلا أو عايز يتضبط؟؟

ملحوظة .. العربية انجكشن مش كربيراتير

بالنسبة للحل اللي بتقوله، أنا فعلا باعمل كده بس بالصدفة، وفعلا بلاقي النتشة في العربية قلت، لكن محاولتش اعود نفسي على كده، لإني مش عايز ادوس عالدبرياج كل شوية. اللي علمني قاللي عود نفسك متدوسش عليه غير لما تنقل الغيار او العربية هتقف خالص. الكلام ده صح؟ ولا اعمل زي ماقلتلي؟

المشاركة الأصلية كتبت بواسطة amrelsaqqa

هو حضرتك لسة متعلم السواقة قريب ؟

ولا انت شايف ان المشكلة دى جديدة وماكانتش موجودة قبل كدة ..

في عربيات الـ Idle controller بيظبط الموضوع ده فيها لوحده بحيث لما تشيل رجلك ، الار بي ام ينزل بالتدريج و يلحق الموتور قبل ما يكلبش العربية ، وفي عربيات لا

بس الطبيعى ان اي عربية خصوصا لو كربراتير يحصل فيها كدة ..

حل الموضوع ده انك تظبط رجلك دبرياج مع البنزين
يعنى لو ماشى ع التانى لو عاوز تشيل رجلك من على البنزين يا اما بالراحة اوى اوى يا اما تدوس دبرياج وكذلك في الطلعة تسند دبرياج عشان العربية تبقى ناعمة معاك ..

انما رفع الرجل مرة واحدة من على الدواسة هيخلى الموتور حمل على العربية فجأة وهيفرملها .. ودى تبان كل ما كنت على سرعات عالية في غيارات قليلة
يعنى لو كنت جايب اخر الاولانى مثلا او اخر التانى وشلت رجلك مرة واحدة هتحس كأنك دست فرامل بالظبط

بالعكس بقى لو كنت في سرعات قليلة على غيارات عالية ، يعنى اول الرابع او اول الخامس ، ما تحسش بالموضوع ده

والخلاصة زي ما قلت في الاول الحل يكمن في انك تظبط حساسية رجلك وتوازن بين الدبرياج والبنزين على طول عشان سواقتك تبقى مريحة وناعمة ..

المشاركة الأصلية كتبت بواسطة dandashx

الأول لازم أشكرك على ردك الوافي
بالنسبة لتعلم السواقة، أنا فعلاً سواق جديد ولسه متعلم من 3 شهور بس.

العفو يا باشا :)

المشاركة الأصلية كتبت بواسطة dandashx

بالنسبة لل idle controller، أعرف منين ان العربية عندي فيها الموضوع ده أو مفيهاش؟ طب لو فيها، فيه احتمال انه يكون بايظ مثلا أو عايز يتضبط؟؟

ملحوظة .. العربية انجكشن مش كربيراتير

والله مش عارف بالظبط عربيتك تحديدا نظامها ايه ، بس طالما انجكشن يبقى اسأل حد معاه نفس العربية ، ممكن تسأل هنا في قسم رينو ..

المشاركة الأصلية كتبت بواسطة dandashx

بالنسبة للحل اللي بتقوله، أنا فعلا باعمل كده بس بالصدفة، وفعلا بلاقي النتشة في العربية قلت، لكن محاولتش اعود نفسي على كده، لإني مش عايز ادوس عالدبرياج كل شوية. اللي علمني قاللي عود نفسك متدوسش عليه غير لما تنقل الغيار او العربية هتقف خالص. الكلام ده صح؟ ولا اعمل زي ماقلتلي؟

اللى علمك ، علمك صح
وده مش ضد الكلام اللى قلتهولك ، يعنى انا مش معنى كلامى خالص انك تدوس دبرياج عمال على بطال ، يعنى مجرد انك تظبط رجلك على الدواسات ويبقى في سلاسة في الحركة مش اكتر

وطبعا لما تفضل دايس دبرياج كتير ، ده غلط ويبوظ الاسطوانة والبلية ..

ولو ما استخدمتش الدبرياج خالص ، غلط برضه ، لان النتشة اللى بتحس بيها دى بتحط حمل فجائى على الاسطوانة والات الجر ودى حاجة مش مرغوب فيها وضد الهدف اللى اتعمل عشانه الدبرياج والفتيس وهتأثر برضه على الدبرياج في الاخر
-------

فلما اللى علمك قاللك ما تدوسش دبرياج كتير معناها ما ابقاش ماشى مثلا على 40 على التانى بعدين ادوس دبرياج وارفع من على البنزين ، وافضل على كدة 400 متر مثلا ، واخلى ده نمط سواقتى ، واعمل كدة على طول وعلى كل الغياارات ، واجى اقف في اشارة ادوس دبرياج وافضل دايس من غير ما امور ، طبعا ده كله غلط جدا .. وخصوصا وانت واقف في الاشارة دى ..

في نفس الوقت ما بقاش برضه على سرعة 40 على التانى مثلا وصوت الموتور عالى ، واقوم رافع رجلى من ع البنزين مرة واحدة ، لازم العربية هتنتش منى وابقى عامل زي سواقين الميكروباص والاوتوبيس لما بيسوقوا بعنف وينطوا بالعربية فجأة ويقفوا فجأة ويصدعوا الناس معاهم

الحل هنا هيكون في رفع رجلك من على البنزين تزامنا مع دوسة دبرياج وتجيب التالت او حتى الرابع حسب انت عايز تعمل ايه وسرعتك كام ،
ف لما ترفع رجلك من على الدبرياج مش هتلاقى اي نتشة وهتلاقى الموتور صوته هدي والعربية هدت وفي نفس الوقت تقدر تدوس بنزين بالراحة وتشيل رجلك بالراحة ، بدون ما يحصل نتشة ، او نطة جامدة لانك دلوقتى بقيت في اول التالت او الرابع ، مش في اخر التانى .. واستجابة العربية وقابليتها انها تجري او تكلبش بقت اقل

بعد كدة مجرد تحس انك عايز تدوس بنزين جامد وتنط بالعربية وتخلى استجابتها اعلى تقوم بسرعة نازل للتانى ، وقبل ما تكون رافع رجلك من على الدبرياج تكون مجهز نفسك لدوسة بنزين محترمة عشان التانى يخلى العربية تجري بدل ما يشدها لورا


من الاخر كدة وخدها قاعدة ::
عند سرعة معينة ولتكن مثلا 40 ( سرعة ممكن تجيبها بكل الغيارات )

كل ما الغيار قل ، كل ما كانت العربية حساسة جدا ، يعنى دوسة بنزين تنططها ورفعة تفرملها ودى تلاحظها اوى في الغيار الاول والتانى ، وتلاحظها وانت نازل من غيار اعلى لغيار اقل ، لو ما دستش بنزين العربية تفرمل ولو دست العربية تجري ..

وكل ما الغيار علي كل ما حساسية العربية قلت ، يعنى لو دست بنزين استجابتها اقل ولو رفعت رجلك من على البنزين تأثير فرملة الموتور اقل برضه ودى تلاحظها في الرابع والخامس او لو نقلت من غيار اقل لغيار اعلى بدري شوية


من الاخر خالص بقى عشان انا طولت عليك :
ما ترفعش رجلك من على البنزين فجأة الا اذا كان الار بي ام اقل من 2000 مثلا ، ودى ما تحصلش في اغلب الاحوال الا لو جبت غيار اعلى من اللى انت عليه حاليا


واسف جدا للاطالة وطبعا مع الخبرة والممارسة هتتعلم الاساليب دى واكتر منها لوحدك