الموضوع: يا اخواني حد يفيدني

العربية لسة جديدة فى السوق يا باشا كلمة معمرة يعنى بقالها فترة من الزمن بس اللى أنا ملاحطه نجاح محترم لشركة إسبيرانزا فى كل العربيات لحد الآن

انا معايا بقالها 8 شهور ياباشا وشايف انها عربية محترمة جدا . اما موضوع معمره او لاء دى مفيدكش فيها بس اعتقد حسب محافظتك وتعاملك معاها , زى اى عربية فى الدنيا يعنى لانها لاتقل عن اى عربية حتى ولو اكثر منها سعرا . وانا شخضيت استخارت ربنا وتوكلت على الله وجيبتها

خدلك لفة في المنتدى عشان تعرف مميزات وعيوب العربية لأننا قتلناها بحثا

بالنسبة لموضوع معمرة انا عربيتي عاملة 55 الف موديل 2010 والحمد لله حالتها تمام حتى الان

آخر مرة سافرت بيها على طريق السخنة الشهر اللي فات رايح جاي في نفس اليوم ... كنا 4 اشخاص في العربية وطفلين والشنطة مليانة على آخرها والتكيف شغال على آخره في عز الحر وماشي 140 - 160 والحمد لله مؤشر الحرارة زي ما هو في الطبيعي وآداء العربية تمام ... بس طبعا كانت بطيئة في السحب عن الطبيعي وده أمر طبيعي عشان الوزن والتكيف

نصيحة ليك قبل ما تاخد القرار
حتلاقي ناس بتشكر جدا في العربية وحتلاقي ناس بتشتم فيها ... لازم تبقى عارف ان موضوع العربيات دي اذواق ... يعني اللي يعجبك ممكن ميعجبش غيرك والعكس وبردوا
و بردو الموضوع هو تجربة شخصية بدرجة كبيرة ... يعني ممكن واحد يتعرض لموقف مش تمام أو اشترى عربية مستعملة من واحد طلعت عينه أو سمع واحد بيشتكي منها واحنا كمصريين بنحب نشتكي على الفاضية والمليانة عشان نخزي العين والحوارات دي ... فخليك موضوعي واستمع لآراء الناس الموضوعيين أصحاب العربية
عشان كده خليك صريح مع نفسك واسئل نفسك انت عايز ايه من العربية عشان تعرف تدور على اللي انت عايزه وتشتري العربية المناسبة ليك
لو انت بتحب الجري والشد يبقى اشتري هيونداي لأن عربياتها خفيفة ومواتيرها جامدة فمثلا الأم 11 جنب فيرنا او جيتز في السحب حيكون النتيجة لصالح الهيونداي
لو انت بتسافر كتير يبقى الأم 11 مناسبة جدا لأنها ثابته على الطريق ثبات العربيات الاغلى منها يعني حتقدر تمشي 180 وانت مستريح وتاخد غرز على الواسع وتغيير الحارة وملفات ومش حتبقى قلقان لأنها عريضة والجنوط بتاعتها 16 ده غير تصميم العفشة اللي بيديها ثبات جميل على الطريق وطبعا دي حاجه مش موجوده في الهيونداي ... لا الفيرنا ولا النيو اكسنت 2008 ولا اللانوس اللي كانت معايا قبلهم
لو انت من النوع اللي حتحب تغيير العربية بعد كام شهر وتجيب عربية تانية يبقى بلاش الام 11 لأن اعادة بيعها مش في سهولة الهيونداي والشيفروليه اللانوس وبالتالي بيأثر على سعرها
لو انت بيفرق معاك قوي شكل العربية من برا ومن جوا فالام 11 مناسبة جدا وصالونها من جوا من وجهة نظري أجمل من عربيات كتير اعلى منها وكذلك شكلها من برا
بالنسبة لأشهر العيوب تزيئ العفشة في الموديلات اللي قبل 2011 وكانت بتتحل في التوكيل بالتربيط والتزييت .... واعتقد انها اتحلت من اول موديلات 2012 ولو مكنتش اتحلت فأعتبرها اجراء طبيعي لازم تقوم بيه وهو تربيط العفشة كل 5 آلاف في التوكيل
وقطع الغيار مش متوفرة بدرجة كبيرة لكن موجوده في التوكيل ولو مش موجوده بتطلبها مخصوص من التوكيل وبيتصلوا بيك لما بتيجي

بس
ياريت اكون افدتك

الله عليك ياباشا .. كفيت ووفيت

بص ياباشا انا كنت محتار زيك كدا والحمد لله جبت الام 11 هيا بقالها 3 شهور معايا والحمد لله كويسة انا لسه شايف امبارح واحد كاتب انه عربية الاوبترا الفتيس باظ خالص ومعتش نافع وهيا لسه ع 60 الف فعادى ممكن اى عربية تتعرض لمواقف من دى ومشاكل بس اهم حاجة تكون صبور ومش تضايق وحتة معمرة دى الله اعلم ممكن تعيش وممكن لا بس برضة اى عربية تانية ممكن تبقى برضة معمرة او لا بس اقولك حاجة الانتشار الرهيب لعربيات اسبرانزا بيدلها فرصة ف توفير قطع الغيار وبكدا هتكون ان شاء الله معمرة وكمان الناس الكتير اللى جابوا العربيات دى اكيد برضة تعبوا ف فلوسهم ومش بيحبوا الندم بس اكيد لان العربيات دى فعلا بدات تثبت نفسها
انا كنت محتار بينها وبين الافيو بس لقيت الافيو ب 81 الف فرق 10 الاف جنية انا حاسس ان الافيو افضل بس رغم ذلك جبت الام 11 والحمد لله مبسوط بيها وسحبها جميل جدا وشياكة وكل الاوبشن موجود فيها

جزاك الله كل الخير علي التوضيح الممتاز
شكر لك

شكرا لكل من اهتم بالرد والافاده
سوال اخر سعر العربيه كام ديلوقتي علشان انا سمعت كلام ان العربية ب70000 ومش عارف ده حقيقي ولا ايه
وعند الوكيل ب 72000