الموضوع: بفكر اشتري ميجان

ماحدش يفتن عليا في اوبل

المشاركة الأصلية كتبت بواسطة ahmedmaklad

ماحدش يفتن عليا في اوبل

يا باشا ماتخافش ،أصل أنا كمان عميل مزدوج ، هتفتن هفتن :D

ana mesh ha2ool 7aga we enta kaman 2e7na bas nes2al we nemshi 3ala tool we ba3den yemken 2aseeb opel we 2agi hena

شوف يا سيدي ، الميجان مقارنةً بالفيكترا عربية حلوة جداً عشان عدة أسباب :
١- نفس الثبات تقريباً سواء في الطلعة أو على السرعات العالية
٢- العربية وزنها أخف شوية و دة بيخليها تجري أسرع مع انها زي ما قولنا نفس الثبات
٣- تكنولوجيا الموتور أحدث كتير (عربية إتصممت في ٢٠٠٤ مقارنةً بعربية إتصممت في أوائل التسعينات و كنت كامة واحدة و ٨ صبابات و حاجات كتير تانية مش هنتكلم فيها لكن لو تحب تفاصيل فنية أنا معك للصبح )
٤- موتور 115bhp يعني ١١٥ حصان فعلياً على العجلات مقارنةً ب-٧٥ حصان للفيكترا القديم (الموتور الاسود ١٦٠٠ ) أو ١٠٠ حصان للفيكترا الجديد ECOTEC (الموتور الأبيض ١٦٠٠ ٢ كامة )
٥- إستهلاك بنزين أكيد أقل نتيجة للتكنولوجيا الحديثة مع عزم أكتر نتيجة لوجود ال-VVT (تغيير توقيت الصبابات )
٦- نظام تعليق و عفشة ناعمة جداً (فرنساوي بقى ) ، بس عمرها مش طويل زي الفيكترا
٧- شكل خارجي مفيش عليه إختلاف (ولو انها أذواق )
٨- فرامل قوية جداً و فعالة مع وجود ABS و EBD ، و طنابير سكينة ورا و قدام

نيجي بقى للمميزات الداخلية و الكماليات :
طبعاً مش هاتكلم عن التكيف و الزجاج الكهربة الأتوماتيك والكاست والسنتر لأن دي الحاجات العادية اللي في أي عربية دلوقتي .
و لكن هنال الحاجات اللي فارقة فعلاً و مش موجودة حتى في عربيات جديدة في نفس فئة المقارنة دي
١- بور كهرباء ناعم جداً جداً جداً و في نفس الوقت فعال خصوصاً في البطيء و على السرعة العالية ماسك نفسه و مثبت العربية جمد في الأرض
٢- أماكن و مساحات تخزين داخل الصالون كتيرة جداً و مناسبة جداً لحفظ كل حاجة (دة حتى مسند الأبواب فيها أماكن تخزين تنفع تشيت فيها الحاجات الخفيفة اللي في ايدك لحد ما تيجي نازل من العربية بدل ما ترميها على التابلوه )، دة غير المسند اللي في النص ورا و قدام
٣- الصالون واسع جداً و مريح كمان سواء ورا ولا قدام و يعد فيه ٥ مستريحين تماماً
٤- ستاير خلفية و جانبية تحمي من الشمس و شكلها شيك جداً سواء و هي مفتوحة أو مقفولة
٥- ال-٦ وسائد هوائية خصوصاً الجانبية (curtain airbags ) اللي بتحمي اللي ورا و اللي قدام (العربية دي من أكثر العربيات أمناً في الفئة دي و واخدة ٥ نجوم من ال-EuroNcap )
٦- إلفوجات اللي نازلة أساسي في العربية ورا و قدام
٧- كمبيوتر الرحلات الهايل اللي في العربية و اللي بيديك معلومات مفيدة جداً عن إستهلاك البنزين و اعطال العربية إذا كان فيه لا قدر الله و مواعيد الصيانة و المسافات المقطوعة و اللي فاضلة لحد ما تحتاج تمون
٨- مساحة الشنطة إلواااسعة جداً
٩- حساس المساحات اللي بيشغل المساحات أوتوماتيك في حالة المطر
١٠- حساس النور اللي بيشغل النور أوتوماتيك في حالة الظلام و كمان فيه خاصية (follow me home)

كل دي المميزات اللي هتلاقيها زيادة عن الفيكترا و دة كله في أول فئة في الميجان يعني أساسي و لو فكرت بقى كمان في الاعلى من كدة هتلاقي حاجات أكتر :
١- التارة الملتي (multifunction steering wheel ) اللي ممكن تتحكم بيها في مثبت السرعة
٢- مثبت السرعة
٣- الفتيس الستيبترونك (مانوال و أوتوماتيك )
٤- فتحت السقف الرائعة و شكلها المتميز
٥- الجنوط السبور ال-١٦ بوصة و شكلها حكاية زيادة على جمال العربية

ضيف بقى على كل اللي فات دة انك لو عايز تجبها مستعملة هتلاقي سعرها حلو جداً و ممكن يكون قريب من سعر عربيتك الفيكترا يعني مش هتدفع كتير و أسعار قطع غيارها في نفس المستوى بتاع قطع الغيار بتاعتك

دة غير انها هتبقى أحدث من الفيكترا بحوالي ١٠ سنين :)

المشاركة الأصلية كتبت بواسطة ASD peugeot

ايه الحلاوه دي يا فرحات باشا انت هتخلي الراجل يشتري الميجان من بكره
بس العربيه دي بجد جميله بس في المستعمل لازم الحاله تكون كويسه عشان تريح في المصاريف لان قطع الغيار غاليه ويمكن ده اكبر سبب مخلي سعرها نازل جدا

ماهو أي عربية في المستعمل لزم تكون حالتها كويسة و إلا الواحد هيتعب معاها ، و لما بنتكلم عن عربية أولها ٢٠٠٤ أكيد هيلاقي منها حالات كويسة كتير بإذن الله بس هو ينوي و يبتدي يدور .