مياه القربة بتنقص بسرعة فأرجو الافادة ؟!!

**Amr_Azab** · 11-07-2012 03:00 PM

عربيتي فابيا 2002
المشكلة عندي ان مياه القربة بتنقص بأستمرار
في الاول كنت كل يوم الصبح اول مدور لمبة المياه بتاعت القربة تنور وتدي انذار ان المياه نقصت اروح مزودها والكلام ده كان تقريبا كل يوم او يومين بالكتير خلال فترة الشتاء وفي الصيف
غيرت كوع الترموستات بالترموستات لانها كانت فعلا بايظة وغيرت غطاء القربة الموضوع قل وبقيت بزود المياه كل اسبوع تقريبا
من كام يوم كده وانا بدور الصبح اللمبة نورت وادت انذار فزودت عادي ومشيت بتاع 40 كم لقيت اللمبة نورت تاني وادت انذار روحت مزود تاني وخدت مياه كتير بتاع كوبايتين او تلاتة ونفس الكلام حصل بعديها برده بـ 30 كم ولا حاجة
المهم اعدت ازود مياه في اليوم ده بتاع 4 مرات وكل مرة في حدود كوبايتين فانا مش فاهم في ايه ولا ايه اللي حصل فارجوا من الاخوة الخبراء الآفادة لو تكرمتم
ومع العلم ان مؤشر الحرارة مزدش ابدا عن النص اللي هو الطبيعي

**Amr_Azab** · 11-07-2012 05:19 PM

معقولة 12 مشاهدة ومحدش عنده اي فكرة عن الموضوع ده !!!!

**ahmed** · 12-07-2012 02:21 AM

حصل عندى فى الافيو حاجه زى كده كانت بتنقص وكنت بزودها برده بنفس الطريقة وكنت لما افتح الكبوت اشم ريحة الماية لما تيجى على الموتور وهو سخن كده المهم فى الاخر طلع تآكل فى الاربه من الاسفل وتم تغييرها "كانت الاربه بتنقط من تحت نتيجة التآكل من السخونه من الاخر "فشوف الفرض ده جايز يطلع هو

**elhelawy** · 12-07-2012 02:41 AM

بص على غطا الريداتير ممكن يبقى فيه تسريب ولازم حد بتاع ريداتيرات يبص على العربيه

**Amr_Azab** · 12-07-2012 10:04 AM

المشاركة الأصلية كتبت بواسطة amaamas

بص يا سيدى هاحكيلك مشكلتى يمكن تفيدك
انا عربيتى تويوتا ترسيل موديل 1994
يوميا كنت بزود ماية
لغاية ماروحت لواحد يتاع ردياتيريات
عشان اغير افيزان الخراطيم و فحص اى تسريب فى دورة المياة
الخراطيم
الرديداتير
قربة المياة
و بعد نفخ وضغط الريداتير بالمياة التسريب طلع فى قميص الرديداتير
و على حظى الحلو كان معايا ريداتير تانى اخدت منه القميص
وركبته فى الريداتير القديم
و من ساعتها التسريب اختفى

كشفت علي الردياتير وطلع سليم الحمدلله وشكرا للرد يا باشا

**Amr_Azab** · 12-07-2012 10:06 AM

المشاركة الأصلية كتبت بواسطة ahsd2000

دوره تبريد او جوان وش السلندر .... حاول تعرف ايه المشكله لان الحراره العاليه زي السرطان بالنسبه للموتور .

الحمدلله مفيش وش سلندر ولا حاجة الموتور كويس والزيت كويس مش مطحن وعلي فكرة الحرارة عمرها ما عدت النص ابدا عشان كل مل لمبة المياه بتدي انذار انا بزود علطول في ساعته عشان طبعا موضوع الحرارة ده زي ماحضرتك قولت مشكلة كبيرة وشكرا لردك

**Amr_Azab** · 12-07-2012 10:11 AM

المشاركة الأصلية كتبت بواسطة ahmed

حصل عندى فى الافيو حاجه زى كده كانت بتنقص وكنت بزودها برده بنفس الطريقة وكنت لما افتح الكبوت اشم ريحة الماية لما تيجى على الموتور وهو سخن كده المهم فى الاخر طلع تآكل فى الاربه من الاسفل وتم تغييرها "كانت الاربه بتنقط من تحت نتيجة التآكل من السخونه من الاخر "فشوف الفرض ده جايز يطلع هو

والله هي فكرة فعلا ومجتش في دماغي خالص موضوع القربة انها تكون مخرومة من تحت حكشف علي الموضوع ده ان شاء الله واتأكد منه وشكرا ليك يا باشا

**Amr_Azab** · 12-07-2012 10:15 AM

المشاركة الأصلية كتبت بواسطة elhelawy

بص على غطا الريداتير ممكن يبقى فيه تسريب ولازم حد بتاع ريداتيرات يبص على العربيه

الردياتير ملوش غطاء يا باشا التزويد بيبقي في القربة بس (نظام تبريد الالماني كده) وانا فعلا شكيت في غطاء القربة وغيرته ومازالت المشكلة مستمرة وكشفت علي الردياتير سليم
وشكرا للرد