الموضوع: سؤال بخصوص جراند بونتو مستخدم او لينيا

سلام عليكم...

انا كنت بصدد شراء سيارة اول سيارة خاصة بى فى حياتى كنت بسوق فيورا زمان من 5 سنين ومن كتر القرف من السواقة والبلد بطلت اسوق خالص لمدة خمس سنوات تقريبا المهم نويت اشترى عربية فى حدود 50-60 الف كحد اقصى

نويت اشترى هوندا سيفيك 92-2000 الشكلين بس للاسف العربية ديه فى اسكندرية نادرة جدا جدا مستخدم "مش عارف ليه" بقالى كذا شهر اهوه بدور مفيش حاجة....

ففكرت فى كام حاجة تانية تكون مميزة وانا بحب اتعب عشان حاجة بحبها مش مشكلة وكمان انا مهندس ميكانيكا انتاج فيعنى عادى لما اتبهدل فى صيانة او كدة المهم ابقى معايا حاجة مميزة!


فكرت فى الاتى Audi A4 98~2000
Subarau Impreza 98 او اعلى حتى 2007 حسب اللى الاقيه فى السوق الخ...

وانا بدور شوفت اسعار الجراند بونتو!! مستخدم! لقيت حاجات جديدة 2007 فى اول 60 الف.... واستخدام بسيط وعربية لسة بعمرها

وكمان اللينيا جميلة جدا والمستخدم بتاعها سعره كويس نفس الكلام



السؤال بقى اللى محيرنى وعايز مساعدة الخبراء فيه

ايه الفارق بين اللينيا والبونتو "جراند" والبرافا "اللى شبه البونتو"

وايه الموديلات المختلفة منهم يعنى فيه Full option and half option ولا درجات؟؟ عشان ما اتخدعش بتمن عربية وتطلع فاضية....

وايه متوسط اسعار العربيات ديه مستخدمة 2007؟؟؟ بفرض 100 الف كيلو وحالة شبه فابريكا

انت غاوي تعب ووجع دماغ بص علي قسم الفيات وشوف ماسي الاعضاء من المعاملة الزبالة للتوكيل وندرة قطع الغيار والاسعار اللي عندها سعار وفاقت اسعار اعز اعز الالماني ياراجل دة الواحد بيطلع عين اهلة علشان يشغل العربيات دي وبيستعوض ربنا في فلوسها وكلنا لولا حبنا للفيات ومش عارفين نركب حاجة مكافئة والله انا بفكر في تكتك وسيبك خالص من العربيات ..مش عايز اسد نفسك لكن خش وقيم وشوف رد باقي الاعضاء