الموضوع: ما هب مميزات و عيوب اسبيرانزا a113 ؟؟

المشاركة الأصلية كتبت بواسطة bassemali

3 صفحات لغاية دلوقت وماحدش رد ع الراجل ... بص أنا مااعرفش حاجه عن ال 113 أنا معايا 516 وبصراحه عربيه ممتااااااااااازه رغم بعض عيوب التجميع المصري اللي في بعض الحيان بترفع الضغط ... لكن كل العربيات كده أخويا معاه بروتون ساجا ... وبعد ماجابها بشهرين غير 3 مساعدين وبعدين رجع غيرهم تاني وبعدين غيرهم تالث ... وبعدين غير تيل وطنابير ضمان ورجع غيرهم تااااااااااني ... وجوز اخت مراتي معاه نيسان صني وبعد ماجابها غير ضفيره كهربه ... يعني كله وله عيوبه .

اكيد مفيش عربية كلها مميزات و اكيد مفيش عربية كلها عيوب ...بس السؤال .. هل a113 عيوبها تعتبر عيوب رئيسية او هامة ولا لأ !!

علي فكرة املك a113 من سنتين ونصف وعاملة 40 الف كيلو وقبل ما اشتريها سئلت كتير مما اشتروها قبلي وبعد ما ركبتها وتجاربي معها اقدر اقيم هذة العربية بكل موضوعية كما يلي :
1 - اولا شكلها الخارجي من احلي السيارات انسيابية مع اتساع ملحوظ في الصالون الداخلي عن غيرها من نوعية الهاتشباك .
2 - 1300 سي سي بماتور قوي 67 حصان مما اعطاها قوة بالنسبة لهاتشباك .
3 - العربية جراية علي الطريق ثبات قوي علي السرعات العالية يكفي اني سافرت بها علي 160 كيلو وانا مشغل التكييف ومحمل كمان .
4 - العربية يوجد بها كثير من الكماليات التي لا توجد في كل سيارة ثمنها اضعافها وغير انها فتيس يدوي لكانت لا بنقصها شيء .
5 - تقريبا العيب الملحوظ فيها هو المساعدين ناشفين شوية ولكن عن تغيرهم بنوع ياباني كويس او صيني بتكون روعة وانا غيرتهم فعلا .
6 - العربية عائلية الي معاه طفلين حتكون مناسبة جدا لكن شنطتها ضيقة شوية علي حساب الصالون طبعا
لكن بيتم التغلب علي ذلك بالبوكس الي بيتركب علي سقف العربية وقت الاحتياج .
7 - استهلاك البنزين داخلي من 190 الي 250 الصفيحة - سفر من 300 الي 340 وعن تجارب كتيره .
8 - علي فكرة مقاس الجنوط 14 .
9 - انا بعد 40 الف كيلو مشاء الله لم اغير شيء فيها غير مساعدين خلفي فقط .
10 - قطع الغير فعلا في البداية كانت مرتفعة جدا لكن الان رخيصة ومناسبة وارخص من 128 في حاجات كتير مثلا طقم المساعدين الخلفي kyb ياباني جبتهم بـ 240 جنية .
اخير العربية جميلة اواي ممتعة سعرها ممتاز مع ملاحظة ان سعرها زاد اخر سنة 9 الاف جنيه مرة واحدة لاكنها تستهل فعلا عن تجربة وربنا يكفينا شرها .

المشاركة الأصلية كتبت بواسطة drmagieed

لاء يا باشا والله أساتذة كتير في الجامعة معاهم إسبرانزا ... إمكانيات وكماليات عالية بسعر معقول... المشكلة يا جماعة إن كنت في كندا فترة من 2000-2006 والمنتجات الصيني مغرقة الأسواق بس الجودة أية والله عندي لعب أطفال وملابس وأجهزة كهربائية ولاب توب صيني بقالهم معايا 12 سنة والجودة عالية ... الإسبرانزا أول ما بدأت وكانت بتيجي تفقيل صيني كانت ممتازة عن المصري زيها زي الأفيو والفيرنا وغيرها ... المشكلة في الوكيل المصري بيقلل من إمكانيات العربية وجودة التصنيع علشان يحقق أعلي ربح من المستهلك المصري إللي مالوش حد يجيب له حقة ... وفعلا أن راجعت مشاركتي وأنا فعلا أسف لأني كتبت أصلها صيني من اللألف للياء ودي مغالطة كبيرة لما فكرت فيها لقيت حكم غير سليم ومش موضوعي ... وكل سنة وإنتم طيبين ورمضان كريم

كلام جميل وسليم .. تحياتى

انا مركبتش العربية دى و لكن الصينى كله عامل زى البطيخة يا تطلع حمرا و اريحك العمر كله يا تطلع قرعة و تقرفك من اول يوم يعنى انا ليا واحد صاحبى معاه a516
موديل 2007 و بيقولى العربية جميلة جدا و انا ركبتها و فعلا العربية كانت محترمة من حيث عفشة و موتور و فتيس لكن الفرامل تعبانة و واحد صاحبى تانى جاب العربية و كانت موديل 2010 و لما ركبتها حسيت ان العفشة مخلعة من بعضها و كان السحب ضعيف جدا و غربلة على الطريق بعد 100 و كدة يعنى ..

فعلشان كدة ابعد عن العربية و اعتقد ان العربية بقت بـــــ 58 الف دلوقتى فــــ المبلغ دة يجبلك لانوس 2011 محترمة جدا ..

انا معايا a516 من سنتين واشترينا a113 مستعملة من شهر كده ...... طبعا ما ينفعش تقارن اللي اتنين ببعض علشان دي عربية صغيرة والتانية عربية عائلية .... لكن بشكل عام عربية حلوة .. انا شايف مشاكلها في العفشة زي اي عربية اسبيرانزا العربية بتدبدب علشان المساعدين مش كفائة مع انها مساعدين جديدة وده عيب صناعة بشكل عام عند شيري .... انا سقت العربية على 140 واكتر وبصراحة مع انها صغيرة لكن ثابتة زي الكبيرة تقريبا ( بس دي كاوتشها اعرض شوية 185 60 14 بينما المقاس الاصلي بيكون 175 60 14 ) ...
اكتر حاجة خنقاني فيها حاجتين صوت الماتور عالي لحد سرعة 120 وبعد كده صوته بيتغير وبيكون اهدأ تماما ( حاجة غريبة بصراحة المفروض ان صوت الماتور يبقى اعلى)
تاني حاجة دواسة الدبرياج مكانها رخم شوية ومش مريحة زي العربية الكبيرة

اللي عجبني فيها تكيفها حلو بصراحة ... القاعدة مريحة والعربية واسعة رغم حجمها الصغير .. حتى اللي قاعد ورا مش مزنوق ... اتزانها كويس مقارنة بحجمها ... الفرامل ممتازة ..آخر حاجة ممكن تركنها في اي حتة بكل سهولة .... كمان سعرها مستعمل كويس (( اللي اشتريناها كانت موديل 2008 ماشية 76 الف كانت ب 31 الف بس من صاحب اخويا