هوه ده عين العقلاقتباس:
عارف يا سامح أنا بعتب عليك جدا
علشان كل مره أنت بتجيب موضوع بيسخن الدنيا جامد جدا و إنت عارف إن الدنيا هاتسخن
تاني حاجه بتفتح الموضوع و مبتسيطرش عليه و تسيب ده يشد من هنا و ده يشد من هنا لغاية أما الحبال بتتقطع بين الأعضاء و بيطلع من موضوعك تلاته جرحي و خمسه مصابين و عشر أعضاء موقوفين
و اللي حزني أكتر إن فيه عضو أحسبه علي خير دخل إتنين تلاته خبطو فيه
و تحول النقاش من تقييم عربيات لتقييم أشخاص زي عربيتك مش عرف مالها قام رادد وقال لو فكيتها مش عارف هاجيب كام عربيه من الفلانيه و زعلت جدا إن العضوين واحد شتم قام التاني رادد و إنضم تالت قام قالب الترابيزه و رابع
بتسيب معلومات غلط تتقال و تعدي قدام عنيك من غير ما تصححها طالما لم تمس الهوندا
و لاحظت إن كل تقييماتك بتعتمد علي حواسك للعربيات غير الهوندا و بتدعم تقييمات الهوندا بالأرقام و المصادر و تضيف عليهم حواسك
و يروح مين جاي في الطريق غريم هونضاي التقليدي فورميوليتور و يروح خابط كلمتين ملونين علي كام إيموشن و كام ضحكه ....
عارف إنت كمنسق قسم أنا مستني منك أيه مستني منك تفيدني و توصلي معلومه لا يشوبها شائبه بالمستندات (حته عكاشه)
يعني مثلا لو هاتقيم تكييف يبقي الترمومتر هو الفيصل
لو تسارع يبقي فيديو جميل
لو تقفيل يبقي صوره حلوه للبلاستيك و لا الجلد و لا و لا ..
لو ثبات يبقي نشوف مكان و نجرب فيه العربيات و ما أكثر المقابلات و الأماكن
لو إعتماديه نجيب عربيتين نفس الفئه و السنه و نقول و نحكي
نبحث و نقول دي مصنوعه من مادة كذا و دي كذا
نقول الإلنترا 93 كان بينزل منها فئات كذا و كذا و مواتير كذا و في المقابل الهوندا البي إم التويوتا المازدا كانت بتنزل كذا كذا
مش مهم مين اللي هانقول عليه الأفضل المهم إننا ندي معطيات للقارئ يقدر يرتب عليها براهين و نتائج
و علي فكره في كمان قسم من الأقسام بقي بعض من أعضاءه المتحمسين لعربياتهم زياده حبتين في أي مقارنه بين عربيتين بغرض الشراء يجو يقولو طب ما تفكر في ...x.....دي واسعه و توكيل و قطع غيار حتي مبيقلوش السعة اللتريه و لا القوه الحصانيه و لا العزم و لا و لا طب دا ينفع
هدفنا الأول إفادة بعض مش نركب الناس عربيات زينا أو نثبت إننا الأفضل كله إلي الفناء
أتمني إن المنتدي يرجع تاني زي ما كان
عضو بيسعي في إبتكار لعربيته و بيفيد الناس
واحد بيعدل علي مشكلة تصميم
واحد بيسعي في ميزه للأعضاء
حد بيزود الأعضاء بأخبار ماركة عربيته و بيفندها
أنا متضايق جدا لأن أول ما عرفت المنتدي مكنش كده فلازم نرجع كما كنا
أتمني إن كلامي ميضايقش حد و لا يضايقك و لو فيه أي كلام شايفه أنا غلطان فيه فأنا مستعد أسحبه
لكن طلباتي منك كراجل ركيب هوندا و بتفهم لا يمكن أسحبها :)
بالتوفيق للجميع