الموضوع: اشتريت فيليشيا ومحتاج ارائكم

المشاركة الأصلية كتبت بواسطة medo_msa

السلام عليكم ورحمه الله وبركاته ..اولا كل سنه وحضراتكم طيبين
كل سنة وانت طيب وبافضل حال
وانا سعيد جدا لان دى اول موضوع ليا ف المنتدى من زمان وانا متابعكم وبقرا مواضيعكم ومشاركاتكم بس اول مره اكون انا المتحدث ..انا اسمى محمد واشتريت اسكودا فيليشيا كومبى موديل 97 .. العربيه كشكل جميله جدا ونضيفه وحبيتها اوى بس من يوم ماشتريتها وفى شويه مشاكل بتقابلنى فيها
اولا الف مبروك واهلا بيك اسكوداوى جديد ينضم لينا وان شاء الله معانا كل المشاكل هتعرف حلولها ومتخافش هنا اللى عنده معلومة بيقولها والحمد لله الناس هنا بتحب الخير لبعضها
..اول حاجه :تانى يوم بعد مااشتريتها طلعت راس البر وانا راجع لقيت الدركسيون قفش ع الاخر وبيرج جامد اوى كان فى فرده ضربت ..فضلت ماشى ع سرعه 20 حوالى 50 كيلو وطبعا مفيش ولا حد فاتح لان الكلام ده كان بليل ..وصلت الحمد لله وتانى يوم رحت لعفشجى وطلع ف بلى فارط وجلد الكبالن غيرها وشحم الكبالن وظبط العمل ..
اهم حاجة فى اجزئية الكبالن انك تتابعها بعد كده لو فيه صوت طقطة فالملفات يبقي لازم تغير الكبالن

تانى حاجه :الحراراه الى تقريبا علطول العربيه بتوحوح وسخنه بس مش بتعدى فوق اوى يعنى ممكن اخرها 100 ورحه لميكانيكى قالى هيا كده والجو حر المهم تريحها لما تسخن اوى.
الحرارة حلها هتلاقيه فى موضوع انا عامله هنا فالمنتدى وانسي الحرارة بعد كده وهتدعيلي http://www.nilemotors.net/nile/278242-a.html

تالت حاجه بقى الكهربا : بحس ان العربيه كهربتها ضعيفه حتى الكلكس صوته بيشحر بس لما بزود بنزين بيتظبط فلو حد يعرف ده بيكون من ايه ياريت تفيدونى
كهربة العربية اول حاجة تعملها قيس شحن البطارية وشحن الدينامو وبعدين لقيت الشحن بتاعهم مظبوط راجع على سير الدينامو زى ما الاعضاء هنا قالولك

فى النهايه تقبلو تحيااااااتى ليكم كلكم وانا سعيد جدا انى ان شاء الله هبقى واحد منكم

انت خلاص بقيت واحد مننا وياريت اى مشكلة تقابلك وتحلها تقولنا علشان الكل يستفاد ونعرف عملت ايه مع تحياتى