انا مصدوم

**kimo1972** · 27-07-2012 12:32 AM

السلام عليكم ورحمة الله وبركاته الاخوة الميجوية
انا كنت والنية لله اشترى ميجان 2 اول الشهر فقلت انزل اسال على اسعار قطع الغيار
عشان الاشاعات اللى بسمعها
وغعلا نزلت النهاردة فرينش موتورز اللى فى الالف مسكن ووصلونى للباشمهندس محمود المسئول
هناك ولسه بساله عن رايه فى الميجان 2 وكانت الصدمة قلى (متشتريهاش)
اه والله فى وشى كده وانا صايم
قطع غيار غالية /عفشة بتتغير كل شوية / جير بوكس مليان مشاكل والخ الخ.......
المهم كملت على الحرفيين وسالت فى كل محل حاطط علامة رينو ولقيت الكلام متشابه الى حد ما
الاختلاف بس ان فى الحرفيين قطع الغيار ارخص وكذا نوع وبلد منشأ
بس بالنسبة للفنيات الكل اتفق ان الميجان بتاكل فى العفشة غير الحاجات الاستهلاكية
واحد من اصحاب المحلات قلى العربية دى لو جبتها تشيل لها شهريا 500 جنيه عشان اخر السنة تعمل الصيانة اللازمة
واحد تانى قلى متجبش اللى الفرنساوى او المانيوال
ايه رايكم يا اصحاب الميجان انا بحب العربية بس مرعوب وعلى فكرة دى اول عربية لى
ردوا على يا جماعة ومعلش اعذرونى لو طولت عليكم
مستنى الردود يا جماعة
ورمضان كريم

**hossam_elwani** · 27-07-2012 12:39 AM

وانا كمان كنت بحبها جدااااااااااا وانبهرت بيها اول مانزلت فى 2005 لكن اتضح نها عربيه مش عمليه ابدا مهما اعتنيت بيها فيها بس للامانه هيا ركوبه بجد

**AhMeD MeTwAlY** · 27-07-2012 01:57 AM

انا كنت حاسس ان العربيه دي فيها مشاكل كتير

**Land_Cruiser** · 27-07-2012 02:06 AM

اعتقد الفلوانس ممكن تبقى اختيار كويس بدل الميجان

**Kefo_Honda** · 27-07-2012 03:07 AM

المشاركة الأصلية كتبت بواسطة land_cruiser

اعتقد الفلوانس ممكن تبقى اختيار كويس بدل الميجان

الفلوانس نفس الكلام, برضه أنا والدي كان عاوز يجيبها وكل الناس قالت ليه بلاش

**shaddadfalcon1** · 27-07-2012 04:44 AM

حوار العفشه ده قالي عليه صاحب ليا معاه ميجان

قالي هي عربيه تحفه ومفيش عربيه في فئتها هتديك احساس الركوبه بتاعتها بس مش بتاعة مصر دي عايزه طرق نظيفه وناس بتفهم فيها مش الصناعيه بتوعنا

**yalahwy2010** · 27-07-2012 07:07 AM

الميجان مشكلتها أعطالها الاكترونية.........الحساسات والفيوزات والحاجات دى
لكن موضوع العفشة ....هى مش عيب فيها..........العيب فى الطرق بتاعتنا.......لكن مش للدرجادى انك محتاج تغيرها كل شوية
تانى حاجة الفلوانس فعلا فرق كبير جدا جدا...............تقريبا عالجت جميع المشاكل اللى فى الميجان
واللى اشترى الفلوانس ولسة فى الضمان.........لغاية دلوقتى ما سمعناش ان فى حد اشتكى من العفشة او الحساسات والكلام ده
الفرنساوى ما يفرقش غير فى التقفيل بس............لكن نفس نوعسة قطع الغيار

**Land_Cruiser** · 27-07-2012 12:44 PM

المشاركة الأصلية كتبت بواسطة kefohonda

الفلوانس نفس الكلام, برضه أنا والدي كان عاوز يجيبها وكل الناس قالت ليه بلاش

لَا يا فندم اسمح لى اختلف مع حضرتك

لأن الفلوانس حاجه تانيه خالص و يمكن المشكله اللى كانت بتواجه الناس كانت طرمبه البنزين و دى كانت بتتغير فى الضمان و ان تكييفها ضعيف شويه زى معظم الاوروبى لكن محدش اشتكى من حساسات او اى مشاكل تانيه من اللى كانت بتظهر فى الميجان و لا عمرى شفتها مرفوعة على ونش مثلا زى ما كان بيحصل فى الميجان. هى الناس عامه لا تقبل على السيارات الفرنساوى فى مصر علشان جرى العرف انها بتبقى معقده فى صيانتها و مش مناسبه للطرق عندنا لكن الفلوانس بتكسر القاعده دى و الدليل انها اصبحت منتشره فى شوارعنا

**MohammedAladel** · 28-07-2012 03:47 PM

كلام مش سليم الميجان عربية كويسة جدا اشترتها مستعملة وعايزة صيانات ولسة معملتهاش وماشية بقالها 5 آلاف كيلو الحمد لله ما أشتكتش الناس بتكبر المواضيع ع الفاضى