أسباب سوء سمعة الميجان (الحلقة الأولى : ثقافة المشترى)
موضوع السمعة ده بقى حكاية طويلة متهيألي فرصة نفتحها دلوقتي لأن ده وقتها و مكانها المناسب
الفكرة أولاً الثقافة ، يعني احنا في طبعنا مش الموضوعية هي الأساس ، بمعنى كلنا بنقول البلد زحمة و خلاص بس مش بنحدد فين ، يعني لو حد مقيم دايماً في ٦ أكتوبر ولا حاجة هيقول زحمة بس ميقصدش نفس المعنى أو مش هيكون شايفها زي ما اللي سكن في مدينة نصر شايفها ، و يمكن كمان ميحسش بيها خالص .
بنفس المفهوم محدش بيقول العربية دي وحشة في إيه ، محدش بيحدد مشكلة معينة ، أهي وحشة و خلاص ،قطع غير غالية .. طيب مقارنةً بإيه ؟ صيانة كتير؟ .. طيب ماهو حسب الإستعمال ، اعطال كتير ؟ .. طيب في أي جزء بالتحديد ، تركي ولا فرنساوي ؟ .. طيب ماحنا زمان من ١٠ سنين كنا بنقول كدة على الكوري (فاكرين الهيونداي أول ما نزلت بالاكسيل و كان وقتها السكودا لسة برضه نازلة مصر بالفافوريت )
حاجة تانية بقى مهمة جداً جداً ، كم واحد في مصر بيشتري العربية جديدة ولا مستعملة بعد ما يكون قرأ المنوال أو حتى البرشور بتاع العربية و فهم إيه الحاجات اللي فيها ؟ كم واحد بيعمل أكتر من إنه يركبها و يدور و يشد بيها شوية و يجرب التكيف و البور و يلاقيها بتسحب و جراية أو طلقة زي ما بيقولوا و يكون شكلها حلو يقول كدة تمام هي دي ؟؟ كم واحد ؟؟
الشراء بالطريقة دي بيخلي العربيات الحلوة شكلاً تتباع كتير و بالتالي يشتريها التجار كتير ، و ييجي بقى صاحبنا بعد شهرين تلاتة عايز يبيعها يقولك أظبطها ينزل يلاقي مثلاً عايز إكصدام ولا حاجة يلاقيه ب-٢٠٠٠ لحلوح يقولك العربية بنت إلتييييييت دي ، حتة إكصيدام عامله الشيء الفولاني تقوم تطلع عليها سمعة من كلامه إن كل حاجة فيها غالية (مخدش باله سعادته إن الأكصدام بتاعها ده أغلى من اللي زيه عشان حجمه عشان في كمية بلاستيك أكتر من غيره و لو فيه إكصدام زيه كوري أو ياباني بنفس الحجم هيبقى نفس التمن ) ، و مش بس كدة دا كمان هيستخسر يغيره عشان يكسب في العربية قدر المستطاع تؤم يبقى شكلها مش أد كدة و تمنها ينزل كمان و كمان ، و قيس على كدة بقى كل حاجة .
حاجة كمان مهمة إن النوع ده من الملاك (التجار يعني ) ماعندهمش ثقافة التوكيل و بصراحة أغلب المصريين مش بس التجار ، و دي في الحقيقة مشكلة ليه بقى ... ؟
لأن هنا في مصر الرينو من زمان مش موجودة كتير و بالتالي مفيش محلات قطع غيار كتير (طبيعي طالما مفيش عربيات كتير تكون مفيش محلات كتير ، هتبيع لمين يعني ؟ ) ، يبقى المكان الوحيد غير التوكيل هو الحرفيين و الوكالة و بور سعيد بس المشكلة بقى فعلاً إن حتى دول مفيش فيهم حاجات كتير للرينو (الحرفيين كلها مفيهاش غير ٣ محلات للرينو أنا لفيت عليهم محل محل مفيش غير عصام بشطر و حمادة رينو و كم محل مش متخصصين في الرينو بس عندهم حاجات كدة بالصدفة جت معاهم و هما بيجيبوا حاجة بيجو ولا حاجة ) ،
الخلاصة في النقطة دي إن لو حاجات عادية هتلاقيها بسهولة في المحلات ، لو قطع تقيلة يا إما في التوكيل يا إما هتتعب شوية على ما تلاقيها بس هتلاقيها إن شاء الله أو تستنى لما تجيلك (و ده حال كل الأوروبي بصراحة )
أما بخصوص الكماليات الزيادة دي بقى مش بتفرق مع كل الناس ، خصوصاً لو ليها تمن ، يعني التاجر أو السائق العادي اللي مش غاوي يعني مش فارقة معاه العربية بتدور بمفتاح ولا بكارت ولا فيها ستاير ولا لأ المهم شكلها إيه و بتجري ولا لأ و لما أجي أبيعها تكسب ولا لأ (مع إن الكارت دة ميزة جامدة جداً جداً جداً طب لييه ؟ ... عشان العربية مفيهاش ولا مكان لمفتاح يعني مفيش حرامي هيعرف يفتحها و لو كسر الزجاج و دخل عافية مع إن مفيش سقاطات للباب برضه مش هيعرف يدورها لأن الكارت ده هو اللي عليه شفرة الموتور بتاعة ال-imobilizer يعني العربية واقفة مكانها مهما حصل
اتمنى بعد الكلام ده أكون وضحت إيه المشاكل والعيوب و ليه الإشاعات دي طلعت و إيه مدى صحتها ، ولو إن في كلام كتير أوي لسة عايز أقوله بس أنا كدة طولت عليكم ، أسف على الإطالة
