الموضوع: أسباب سوء سمعة الميجان (الحلقة الأولى : ثقافة المشترى)

[/quote]

المشاركة الأصلية كتبت بواسطة farahat

بص يا أحمد باشا ، أسعار العربية دي النضيفة فيها تبتدي من ٧٥ ألف (و طبعاً حسب الحالة إنت فاهم نظام السوق بقى )

موضوع السمعة ده بقى حكاية طويلة متهيألي فرصة نفتحها دلوقتي لأن ده وقتها و مكانها المناسب

الفكرة أولاً الثقافة ، يعني احنا في طبعنا مش الموضوعية هي الأساس ، بمعنى كلنا بنقول البلد زحمة و خلاص بس مش بنحدد فين ، يعني لو حد مقيم دايماً في ٦ أكتوبر ولا حاجة هيقول زحمة بس ميقصدش نفس المعنى أو مش هيكون شايفها زي ما اللي سكن في مدينة نصر شايفها ، و يمكن كمان ميحسش بيها خالص .
بنفس المفهوم محدش بيقول العربية دي وحشة في إيه ، محدش بيحدد مشكلة معينة ، أهي وحشة و خلاص ،قطع غير غالية .. طيب مقارنةً بإيه ؟ صيانة كتير؟ .. طيب ماهو حسب الإستعمال ، اعطال كتير ؟ .. طيب في أي جزء بالتحديد ، تركي ولا فرنساوي ؟ .. طيب ماحنا زمان من ١٠ سنين كنا بنقول كدة على الكوري (فاكرين الهيونداي أول ما نزلت بالاكسيل و كان وقتها السكودا لسة برضه نازلة مصر بالفافوريت )

حاجة تانية بقى مهمة جداً جداً ، كم واحد في مصر بيشتري العربية جديدة ولا مستعملة بعد ما يكون قرأ المنوال أو حتى البرشور بتاع العربية و فهم إيه الحاجات اللي فيها ؟ كم واحد بيعمل أكتر من إنه يركبها و يدور و يشد بيها شوية و يجرب التكيف و البور و يلاقيها بتسحب و جراية أو طلقة زي ما بيقولوا و يكون شكلها حلو يقول كدة تمام هي دي ؟؟ كم واحد ؟؟

الشراء بالطريقة دي بيخلي العربيات الحلوة شكلاً تتباع كتير و بالتالي يشتريها التجار كتير ، و ييجي بقى صاحبنا بعد شهرين تلاتة عايز يبيعها يقولك أظبطها ينزل يلاقي مثلاً عايز إكصدام ولا حاجة يلاقيه ب-٢٠٠٠ لحلوح يقولك العربية بنت إلتييييييت دي ، حتة إكصيدام عامله الشيء الفولاني تقوم تطلع عليها سمعة من كلامه إن كل حاجة فيها غالية (مخدش باله سعادته إن الأكصدام بتاعها ده أغلى من اللي زيه عشان حجمه عشان في كمية بلاستيك أكتر من غيره و لو فيه إكصدام زيه كوري أو ياباني بنفس الحجم هيبقى نفس التمن ) ، و مش بس كدة دا كمان هيستخسر يغيره عشان يكسب في العربية قدر المستطاع تؤم يبقى شكلها مش أد كدة و تمنها ينزل كمان و كمان ، و قيس على كدة بقى كل حاجة .

حاجة كمان مهمة إن النوع ده من الملاك (التجار يعني ) ماعندهمش ثقافة التوكيل و بصراحة أغلب المصريين مش بس التجار ، و دي في الحقيقة مشكلة ليه بقى ... ؟
لأن هنا في مصر الرينو من زمان مش موجودة كتير و بالتالي مفيش محلات قطع غيار كتير (طبيعي طالما مفيش عربيات كتير تكون مفيش محلات كتير ، هتبيع لمين يعني ؟ ) ، يبقى المكان الوحيد غير التوكيل هو الحرفيين و الوكالة و بور سعيد بس المشكلة بقى فعلاً إن حتى دول مفيش فيهم حاجات كتير للرينو (الحرفيين كلها مفيهاش غير ٣ محلات للرينو أنا لفيت عليهم محل محل مفيش غير عصام بشطر و حمادة رينو و كم محل مش متخصصين في الرينو بس عندهم حاجات كدة بالصدفة جت معاهم و هما بيجيبوا حاجة بيجو ولا حاجة ) ،
الخلاصة في النقطة دي إن لو حاجات عادية هتلاقيها بسهولة في المحلات ، لو قطع تقيلة يا إما في التوكيل يا إما هتتعب شوية على ما تلاقيها بس هتلاقيها إن شاء الله أو تستنى لما تجيلك (و ده حال كل الأوروبي بصراحة )

أما بخصوص الكماليات الزيادة دي بقى مش بتفرق مع كل الناس ، خصوصاً لو ليها تمن ، يعني التاجر أو السائق العادي اللي مش غاوي يعني مش فارقة معاه العربية بتدور بمفتاح ولا بكارت ولا فيها ستاير ولا لأ المهم شكلها إيه و بتجري ولا لأ و لما أجي أبيعها تكسب ولا لأ (مع إن الكارت دة ميزة جامدة جداً جداً جداً طب لييه ؟ ... عشان العربية مفيهاش ولا مكان لمفتاح يعني مفيش حرامي هيعرف يفتحها و لو كسر الزجاج و دخل عافية مع إن مفيش سقاطات للباب برضه مش هيعرف يدورها لأن الكارت ده هو اللي عليه شفرة الموتور بتاعة ال-imobilizer يعني العربية واقفة مكانها مهما حصل

اتمنى بعد الكلام ده أكون وضحت إيه المشاكل والعيوب و ليه الإشاعات دي طلعت و إيه مدى صحتها ، ولو إن في كلام كتير أوي لسة عايز أقوله بس أنا كدة طولت عليكم ، أسف على الإطالة

لا فض فوك يا فرحات باشا والله كلام متزن وحيادي ودي شهادة حق ربنا يجازيك خير ويكرمك.

رأيي يا استاذ احمد مش هايختلف ابداً عن رأي الاخوه الكرام هنا العربيه والله محترمه جداً وعن تجارب كتير وموضوع الاشاعات ده موجود كتير على العربيات دي لكن الحمد لله الموضوع بدأ يتفهم عند الناس وسعر المستعمل من العربيات دي بدأ يرتفع ولو العربيه كل الاشاعات اللي عليها دي واحده منها بس صحيحه ازاي مبيعاتها بالشكل ده والاقبال عليها ماشاء الله بيزيد والارقام هي اللي بتتكلم في الجزئيه دي والشوارع واكيد حضرتك شايف بنفسك انتشار الرينو عموماً مش بس الميجان في السنوات الاخيره مع ملاحظة ان دعايه رينو في نظري من اقل حملات الدعايه الموجوده .

الجانب الاخر جانب الامان في العربيات دي لو حضرتك مهتم بيه فالعربيه دي عن تجربه شخصيه مؤلمه صحيح لكن واقع والله على ما اقول شهيد قمة الامان والفيبر اللي مش عاجب الناس والكلام ده كله بيبان في الاوقات دي.

ضيف على كده كلام التجار وبرضه عن تجربه التجار( أكيد مش كل التجار ) لايحترموا اي عربيه محترمه للأسف وليها وكيل محترم محافظ على نفسه وعلى سمعته وعلى العملاء لديه لئن كده دور التاجر محدود جداً وعن تجربه برضه من كام سنه كان من ضمن الاشاعات اللي طلعت وانا عاصرتها ان شركات التأمين ترفض التأمين تماما للميجان !! ليه عشان في الحوادث الايرباجز بتضرب ( بتفتح ) ده كان كلام التجار من كام سنه وانا شخصياً لفيت على اكتر من شركه تأمين محترمه ولم يكن لهذا الكلام اي اساس من الصحه.

اتمنى يكون كلامي فيه اضافه وتقبل اخي الكريم تحياتي واي استفسار احنا موجودين هنا ان شاء الله جميعاً وربنا ييسر لك امورك ان شاء الله .

شكرااااااااااا

يارب الناس تفهم معنى الكلام دة!!!!!!!!!!!!!!