مشكلة في عداد الحرارة ،، والبنزين

**cartooch** · 29-07-2012 02:28 AM

السلام عليكم ورحمة الله وبركاته

انا لسه شاري لانوس 1 من كام يوم بفضل الله، اول ما اخدتها عملت السيرفس كله تغيير زيت وفلاتر وبتاع المهم عداد البنزين اول ما اخدتها كان على الشرطة اللي تحت الـ Full وفوق النص مباشرة ،، رحت فولت بنزين على الاخر العداد رفع تمام

الغريب اني مشيت عليها حوالي 30 كيلو النهاردة داخل المدينة ومش حاسس ان المؤشر بتاع البنزين بينزل عن الشرطة بتاعة F

حد عنده فكره العداد ده شغال ولا لأ استنى عليه ولا اعمل ايه بالظبط ياريت حد يفيدني

تاني حاجة عايز اعرف الحرارة الطبيعية في اللانوس بتبقى كام لأن عداد الحرارة ما كانش شغال رحت اشتريت ساعة وركبتها بنفسي فالعداد اشتغل عادي بس بيطلع فوق الشرطة الاولانية بشوية

المشكلتين دول ياريت لو حد يقدر يفدني فيهم

وشكرا

**m.farouk** · 29-07-2012 03:44 AM

عداد البنزين لو مبينزلش مع كل الاستخدام ده يبقى البورد الموجوده على طرمبة البنزين باظت والحل تغير الطرمبة او فى بورده بعوامة بتتباع عند النجار فى شارع دمشق عداد الحراره بيبقى تحت الشرطة التانية بحاجة بسيطة

**Dawns_Mist** · 29-07-2012 04:46 AM

30 كيلو مش مسافة ممكن تظهر بسهولة على عداد البنزين .. 30 كيلو مع اللانوس يعني في حدود 2 لتر بنزين يعني ماتخافش أوي كده من إن العداد مش قاري كويس .... مدام كده كده لما فولت العداد رفع يبقى شغال تمام ... ولو بعد كده قصر معاك أو استهبل فده هيبان برضه و انت بتفول مش هيوصل معاك للآخر و هينزل بسرعة و يثبت في مكان معين طول الوقت .. و ده معناه إن عوامة البنزين عايزه تتغير و دي حاجة تافهه جدا بـ 50 جنيه تقريبا بتخلص الموضوع ده و ممكن تركبها بنفسك كمان مش محتاجه كهربائي ... طيب افرض غريت العوامة و برضه حسيت بمشكلة في قراية عداد البنزين .. ده معناه إن توصيلة السلوك اللي ماشيه تحت الفرش بتاع العربية بتاعت العوامة و العداد فيها مشكلة .. كهربائي شاطر بيفك الفرش بتاع العتب اللي جنب باب السواق و بيشيك على السلوكي دي كلها و ممكن يفك السلكين بتوع العداد دول و يركب بدالهم سلكين محترمين تانيين و يطمن إن مافيش أي قفله ولا حاجة من دي ، و كل ده برضه بسيط جدا ماتخافش منه في ساعة زمن بيخلص .

بالنسبة للحرارة ... بما إنك شاري العربية جديد ، و كمان إحنا في الصيف و تراب و هوا و حر .. فيستحسن تروح عند أي حد بتاع ردياتيرات تقوله كده ( فك الردياتير و نضفه ) و هو هيقوم بالواجب .. هيفك الردياتير خالص و ينفضه تنضيفه تمام و يشيك على دورة التكييف كمان و يشغلك كل حاجة و يطمن على المراوح و كل حاجة كل ده برضه بـ 50 جنيه في نص ساعة و انت واقف .. لو الردياتير أو المراوح أو أي حاجة فيها مشكلة هيقولك عليها ... ولو مافيش أي مشاكل في الليلة دي يبقى كله تمام .. هتمشي بعربيتك كده و انت بالك مرتاح .. طيب لو مسكت معاك حرارة مثلا بعد تنضيف الردياتير بفترة كده .. يبقى ده معناه إن الثرموستات فيه مشكلة ، و ده ممكن ميكانيكي حريف يخلصهالك في دقايق برضه .. لكن طول ماهي مش بتمسك حرارة و انت مطمن إن الردياتير و المراوح و التكييف تمام .. يبقى ماتقلقش أبدا .

و مبروك عليك العربية ، و ربنا يباركلك فيها و يكفيك شرها

**egyptiandiver** · 29-07-2012 05:14 AM

أولاً ألف مبروك، ثانياً أنا ساكن في أكتوبر و سواقتي هادية عامةً و ممكن لو العربية مظبوطة موتور و سيور و شكمان و بوجهات و فلاتر و و ، و تفول العربية للزور و تمشي من غير تكييف ممكن مؤشر البزين ميتحركش معاك إلا بعد مرور ما لا يقل عن 150 كم لو الدنيا فضية و الماشية بمزاج و مش سواقة عصبية... عداد الحرارة مفروض يفضل ثابت لحد قبل العلامة الثانية بشوية و مفروض ما يتحركش... حتى لو مشي تاتا تاتا في عز الصيف أو طاير على الطريق الصحراوي في عز الشتا لو في مشكلة في الحرارة بص على نضافة الرادياتير أو المية الخضرة ناقصة أو طلمبة المية سليمة .... لحد ما مؤشر الحرارة يثبت ذي ما قلت لحضرتك. و مبروك تاني مرة - أخوك أحمد سامي

**tarek_2005** · 29-07-2012 11:31 AM

عداد البنزين عند التفويل للزور لايبداء في النزول الا بعد استهلاك 10 لتر اي مايعادل 100 كم في المتوسط سيبه لغاية ماتمشي 200 كم وشوفه هينزل ولا لاء
مؤشر الحرارة لو ثابت تحت المنتصف بشرطة يبقي تمام ومتلعبش في حاجة لو مش ثابت وبيقل يبقي الثرموستات الميكانيكي متشال لو بيزيد يبقي عندك تسريب في دورة التبريد او سدد