راح خلاص زمن اللعيبة -- وبقينا في زمن الدويسة
تحياتي لأعضاء نايل موتورز - أخواني واخواتي وكل عام وانتم بخير
لو حد يفتكر معايا منتصف و اواخر التسعينيات واوائل الألفينات كان معظم السيارات الموجودة في السوق والمنتشرة بين الشباب هي الفيات بمختلف فئاتها واللادا والبيجو وقليل من التويوتا والنيسان للقادمين من الخليج والسعودية
كان ساعتها السواقة سواقة وكان معظم جيلي (اواخر السبعينيات واوائل الثمانينات) متعلمين السواقة من صغرهم - انا شخصياً اول عربية سوقتها في حياتي كان عندي 10 سنين وكنت مغرم بالعربيات - حتي كان ساعتها في عربيات لعبة حديد صغيرة لا تتخطي حجم الولاعة ومنها الي بابه بينفع يتفتح كانت عندنا كلنا
المهم،
كنا لما بنسوق كنا بنسوق بجد ولما كنا بنطلع علي الطريق كنا بجد عفاريت وعلي رأي المثل الشعبي "الشاطرة تغزل برجل حمار" اعزكم الله
افتكر مرة صديق لي خد غرزة ب27 شرخ فانوس الأشارة من غير مايكسره
وصديق أخر كان ب لادا بيطلع من اتخن عربية غرز مش مواتير ومن اقصي اليمين لآقصي اليسار
وانا مرة بالعربية ال28 خدت غرزة لقيت الموستريك بتاع الرفرق الأمامي اتبري ولف علي بعضه من ضيق الغرزة
ولا صاحبي التاني الي كان بال504 بيقطع شارع الهرم كله
وكان الطبيعي بتاعنا انك بعربية سي سي صغير تقطع عربية سي سي اكبر لأن طبيعة الشد كانت غرز مش مواتير وساعتها ماكنش في لا دائري ولا غيره
وكان اشهر شوارع للشد وعلمنا علي الأسفلت بتاعها طبعا شارع الهرم وجامعة الدول وكوبري اكتوبر وصلاح سالم والأوتوستراد
وكان الشد ساعتها محترم ومش اخلاقنا انك تقفل عليا في غرزة او تلبسني في عربية
تعال بقي نشوف النهاردة في 2012 تحديدا في منتصف العقد الأول من القرن الحادي والعشرين يعني في الفترة بين 2005 - 2010 انتشرت جدا الكوري والياباني بين الشباب ومتعة الشد تحولت الي حرق علي المواتير من غير حرفنة او فن وبقي مفهوم اني قطعتك اني اطلع منك لما الطريق يفتح وماتشوفنيش تاني
ودوول بيبانوا اوي لما الطريق يبقي زحمة - تلاقيه ضارب لخمة ومش عارف يتصرف او يطلع من العربية الي قدامه - لكن اول لما الطريق يفتح تلاقيه داس بنزين وطار - طب كانت فين شطارتك دي وهو الطريق قافل ؟؟؟
اقرب حاجة
كنت اول امبارح نازل شغلي الصبح والدماغ رايق
وقابلت واحد رغم حداثة سنه الا انه يتسم بالطابع القديم
بداية الحكاية اني كنت علي المريوطية وطالع دائري المنيب - قابلت شاب معاه e30 وشكمان وجنوط قولت اما انكشه خدت قدامه غرزة في اتنين بالأشارات وهديت تاني عشان اشوفه هيعمل ايه
لقيته حرق حرقتين وخدت غرزة تعبانة وجري قدامي
طلعنا الدائري سوا - جرينا شوية مع بعض وغرزة في التانية وصلنا لحد قبل نزلة المنيب - الطريق في الحتة دي ساعة الصبحية بيبقي قافل - ولو انت قارئ جيد للطريق هتعرف انه سالك ومفتوح من اقصي اليمين لحد نزلة المنيب وبعدها بيفتح من المنتصف فوق النيل وبيقفل قبل نزلة المعادي وبيفتح من اقصي اليمين تاني بعد نزلة الراجع من المعادي -
وحدث مالم اتوقعه - لقيته هنج والطريق قفل عليه واتزنق في منتصف الطريق الدائري
بس وانا في اقصي اليمين لمحت بطرف المراية أسد فرنساوي مفترس 405 - مفيم العربية وفاتح جزء بسيط يدخله بصيص من الضوء ونسمة هواء صيفي
وفي ديلي غرزة غرزة ونتشاية نتشاية - ببص عليه لقيته شاب صغير وبيتكلم في الموبايل بس لعيب
فكرني بأيام اللعب النظيف
لأنه فتحلي الغرزة كذا مرة لما طلع مني وبيلعب بحرفنة وحرفية شديدة
فضلنا نلعب سوا من اول المنيب لحد نزلة الأوتوستراد - بس الطريق فتح وهو طار وانا للأسف مش بحب اجري فوق ال100 فعشان كدة ماستمتعتش معاه باللعب لحد نزلة القطامية
الغرض من الحكاية اني عايز اقول ان جيل ال2000 مش بيعرف يلعب - هو بيعرف يدوس بنزين والعربية تطير بيه لكن يلعب معاك - للأسف مالوش فيها ولو لعب معاك يعورك
تلاقيه بطة في الزحمة واول لما الطريق يفتح يقلب حمامة ويطير
والكلام دة تلاحظه علي طريق اكتوبر وانت رايح
هتشوف شباب الجامعة الصبح وهما رايحين - عند الهضبة وطريق الفيوم مش عارفين يمشوا - ولحد بنزينة وطنية عند دريم مشيهم يشل ومش عارفين يقروا الطريق لكن الطريق يفتح بعد دريم تلاقيهم طاروا
انا افتكر زمان لما كنت تحب تعبر عن نفسك وتقول للي قدامك انك طاير وبتشد - انك كنت تفتح نورك العالي في عز الظهر
ودة كان ليه دلالة انك بتشد ومعندكش وقت تضيعه
عذراً للأطالة - بس الموضوع لافت انتباهي من فترة طويلة وكنت عايز ابوح بما يدور في خاطري
انتهي زمن اللعيبة - وبدأ زمن الدويسة
انتهي زمن اللعيبة لأن بقي اصغر لعيب النهاردة عنده 32 سنة وعنده التزمات واتقرص مرة واتنين اشي رادار علي كدمة علي بوسة في الرفرف علي علي
بس حاسب منه اذا قابلته - لأن ان دبلت الوردة ريحتها فيها
وابتدي زمن الدويسة - زمن الشباب الصغير الي اكبر واحد فيهم لا يتعدي 25 سنة - الجيل الي طلع لقي العربية بتمشي لوحدها وماجربش عربية 4 غيارات كربراتير 1100 سي سي بتجيب ال100 في زمن 90.5 ثانية
تحياتي للجميع
والموضوع مجرد فضفضة وياريت محدش يزعل من كلامي
والله المستعان
،
،