طلب مساعدة في قطع غيار اللوجان

**mindvision** · 30-07-2012 06:00 PM

السلام عليكم و رحمة الله و بركاته...
أنا كنت عملت حادثة بالعربية و غيرت الإكصدام بالكامل و السربنتينة و الرادياتير، و كان في مشكلتين...
المشكلة الأولى التجويف اللي بيخش فيه الفوج كان راح مع الاكصدام القديم، و المكان ده أنا لقيته في التوكيل ب 250 جنيه الواحد، فحد يعرف ممكن ألاقيه فين أرخص شوية؟ لأن المكانين كده بتمن الاكصدام تقريبا!!! و السمكري لصم لي الفوج يادوبك في الاكصدام نفسه من غير التجويف فمبقاش ثابت كويس، و واحد منهم اتشخشخ شوية فأنا محتاج أعرف لو حد يعرف يساعدني أجيبه منين بتمن كويس.

المشكلة التانية أكبر شوية و لاحظتها بعد أسبوعين من شغل السمكري و مش عارف هي مشكلة كبيرة و لا لأ، و اللي عنده لوجان هيفهم قصدي، الراداياتير طبعا بيبقى باين من ورا الشبكة الأمامية... وده طبيعي، اللي مش طبيعي المواسير اللي على يمين و شمال الراداياتير باينة، ولو شفت لوجان بتلاقي المواسير دي قدامها حتة كدة رمادي غامق بتغطيها عاملة زي ما تكون فلين... السؤال بقى و عذرا للإطالة، الحتة دي مهمة و لا هي جماليا فقط تغطي المواسير؟؟؟ و بعدين أجيبها منين؟ أنا كنت سألت الميكانيكيون العرب و مالقيتهاش، و أنا مقلق لا تكون مهمة.... فبرجاااااااااااااااااء المساعدة، و ياريت لو حد يعرف الحتة دي اسمها إيه أصلا يقول ...

و جزاكم الله خيرا

**dr_mustafa_ali** · 30-07-2012 07:12 PM

حمد لله على سلامتك وان شاء الله الناس تقدر نفيدك ولو تقولنا الحاجات ديه كلفتك كام

**mostafamndy** · 30-07-2012 09:45 PM

اسال فى التوفيقية .. فيه أكثر من واحد هناك متخصصين فى الرينو وعندهم كل حاجة بتركب للوجى ..
منهم جمال البدرى والمركز الهندسى وواحد تانى أمام جمال البدرى لكنى مش فاكر اسمه .. وكمان فى أكثر من واحد فى المول اللى فى مدخل التوفيقية من رمسيس ...
وألف حمدا لله على سلامتك وربنا يحفظك ويحفظ عربيتك ويجعلها أخر الحوادث ...

**karooomy** · 04-08-2012 05:28 PM

بالنسبة للأخ اللي بيسأل عن ثمن قطع الغيار...
على ما أذكر (من شهر 12 اللي فات)
فانوس أمامي 250
فانوس خلفي 170
اكصدام أمامي 400
سربنتينة 900
رادياتير 800
الفوج 50
الأسعالر ممكن تلاقيها أقل شوية في التوفيقية... دي أسعار دمشق