اخوانى واخواتى باركولى وساعدونى

**م/محمد صلاح** · 26-06-2008 03:58 AM

ان شاء الله وبرحمته وارادته موعدى يوم الجمعه مع ولادة زوجتى التى ستضع مولودنا الاول باذن الله وبعدها باسبوع باذن الله السبوع وهنا المشكله
اولا انا مش عارف اعمل ايه خالص فى السبوع ولا حتى اجيب ايه ولا اى حاجه

عايزكم بقى تساعدونى فى الاتى
1) اغانى السبوع اجيبها منين ولا انزلها منين
2) حاجات السبوع اعملها فين ولا منين ولا بكام
3)حكاية تسجيل المولود فى الصحه واستخراج شهادة الميلاد
4)لو حد يعرف دكتور اطفال حديثى ولاده فى الهرم او فيصل

وشكرا ليكم
والسلام عليكم ورحمة الله وبركاته

**OlaOsman** · 26-06-2008 08:09 AM

انا داخلة أبارك بس عشان ماعنديش أي إجابة لأي سؤال من أسئلتك :)

ربنا يقومها بالسلامة يا رب و يجعل المولود ذرية صالحة بإذن الله :)

**إسلام شاهين** · 26-06-2008 08:35 AM

ألف مبروك يا ميمو وعقبال ما تخاويه إن شاء الله

1- حاجة السبوع أنا جبتها من درب البرابرة في العتبة كل حاجه هناك وفيه لجميع المستويات رخيص وغالي
2- تسجيل المولود حضرتك بتاخد معاك جواب المستشفى اللي المدام وضعت فيه وتكون كاتب الاسم (بتاع المولود) والشهادة مختومة من المستشفى وتروح على أقرب مركز صحه تابع لسكنك (خلي بالك علشان لو رحت لمكان تاني واستجل فيه ساعة المدارس هتغلب) ومعاك بطاقتك الشخصية
3- أغاني السبوع إعمل سيرش على جوجل هتلاقيه منزلك كل الأغاني اللي انت عايزها (عندي سي دي والله فيه كل الأغاني ديه) لو تحب أخلي أي حد من عندي يبعتهولك أنا تحت أمرك
4- الدكاتره للأسف أنا ماعرفش حد في فيصل أو الهرم

ألف مبروك ويتربى في عزك

**aliabutaleb** · 26-06-2008 08:40 AM

المشاركة الأصلية كتبت بواسطة MiMo

3)حكاية تسجيل المولود فى الصحه واستخراج شهادة الميلاد
4)لو حد يعرف دكتور اطفال حديثى ولاده فى الهرم او فيصل

أولاً ألف ألف مبروك
ربنا يجيب البيبي ويقوم مامته بالسلامة
هاسالك زميل لسة جايله مولود جديد وساكن في فيصل على دكتور كويس هناك
اما بالنسبة للتسجيل فانا فاكر في بنتي إني كان لازم أجيب ورقة من المستشفى مش فاكر بيسموها ايه عشان تسجل البيبي
ولازم تسجل في مكتب صحة يكون تابع جغرافياً للمنطقة اللي فيها المستشفى
ولازم اللي يسجل يكون الوالد أو الجد للوالد
أن ولا والدته ولا حد من طرفها ينفع يسجل

**polo61** · 26-06-2008 09:31 AM

الف مبروك وربنا يتمم لكم على خير وتقوم المدام بالسلامة

**محمد المشد** · 26-06-2008 12:01 PM

الف مبروك وربنا يتمم لها على خير 000 واعتقد بعد كلام الاخ اسلام شاهين مفيش تعليق كل كلامة 100% سليم

**MMamdouh** · 26-06-2008 12:45 PM

المشاركة الأصلية كتبت بواسطة MiMo

1) اغانى السبوع اجيبها منين ولا انزلها منين

اعمل بحث على جوجل و دور فى النتائج على اغانى عبد المنعم مدبولى و اديها داونلود... انا للاسف محتفظتش باللينك اللى كان فيه الاغانى بس الموضوع سهل و البحث ماخدش منى دقايق

2) حاجات السبوع اعملها فين ولا منين ولا بكام

حاجات السبوع من درب البرابرة ناحية العتبة كدة... بتختار اشكال اللعب و التغليف و بيتم الاتفاق على السعر و الكمية و ميعاد التسليم... احسب عدد المدعويين فى السبوع و اعمل حساباتك على سعر اللعبة الملفوفة (اللعبة + الملبس و الشيكولاتة)

اعمل حسابك فى مانخول عشان البيبى و ابريق

3)حكاية تسجيل المولود فى الصحه واستخراج شهادة الميلاد

المستشفى بتديك اخطار مولود موجة لمكتب الصحة التابع ليه المستشفى اللى المدام ولدت فيها... حتروح مكتب الصحة و معاك الاخطار و بطاقتك + صورة البطاقة و بطاقة المدام + صورة البطاقة + قسيمة الزواج + صورة و تسجل المولود و تدفع 21 جنية

محدش حيرضى يسلمك الشهادة الا لما تطعم المولود ضد الدرن و تعمل اختبار الغدة الدرقية فا اعمل حسابك البيبى يكون معاك ساعة الاستلام... و حيسلموك بطاقة صحية للمولود بيتكتب فيها بياناتة و بيتم متابعة تطعيماتة و صحتة العامة فيها

على فكرة مش شرط تطعم لمولود فى نفس مكتب الصحة اللى سجلتة فيه... انا سجلت ابنى فى مكتب الهرم و طعمتة فى المنيل بس اخدت بيان بالتطعيم منهم و قدمتة لمكتب الهرم عشان يسلمونى شهادة الميلاد

لما تستلم الشهادة اعملك 4 او 5 مستخرجات رسمية من الشهادة... حتنفعك قدام و توفر عليك مشاوير... المستخرج ب 5 جنية

4)لو حد يعرف دكتور اطفال حديثى ولاده فى الهرم او فيصل

الهروم و فيصل لا... ممكن شارع الدقى؟؟

انا بتابع مع الدكتورة معتزة بشير و هى استشارى الاطفال فى القصر العينى و بتشتغل كمان فى مستشفى الندى... هى فى الدور الرابع فى برج ساريدار الطبى بشارع التحرير...مبنى كبير على يمينك اول ما تعدى من تحت كوبرى الدقى فى اتجاة شارع مصر و السودان

وشكرا ليكم
والسلام عليكم ورحمة الله وبركاته

مبروك مقدما وربنا يبارك لك فى المولود الجديد

MMamdouh

**م/محمد صلاح** · 26-06-2008 02:18 PM

بارك الله فيكم جميعا

علا دايما اخت خيره وفقك الله

اسلام باشا شاهين والله واحشنى موووت ربنا يوفقك وترجع لنا بالسلامه بس ماتنساش تجيبلنا الهدايا بتاعتنا

على باشا الف شكر على الرد الجميل

محمد باشا المشد ربنا يبارك فيك والف شكر

محمد باشا ممدوح الف شكر على الرد ياباشا وبارك الله فيك

محمد باشا ابيزا بارك الله فيك

استاذنا بولو 61 الف شكر يا غالى

واخيرا وليس اخرا الف شكر ليكم كلكم على الردود الوافيه وربنا يديم محبتنا واخوتنا ويجعلنا دايما من احسن الى احسن ويكرمنا جميعا بطاعته

**aliabutaleb** · 26-06-2008 02:36 PM

ميمو
انا سألت زميلي دلوقتي وطلع كان بيروح لدكتورة في الدقي شكر فيها جداً
اسمها دكتورة زينب حامد - 29 ش عمر بن الخطاب متفرع من سور نادي الصيد - الدقي

اما في فيصل والهرم فبيتعامل مع مستشفى تبارك شارع فيصل من الجيزة - بعد محطة المساحة بحوالي 5 أو 6 شوارع

وفيه دكتور تاني اسمه دكتور حنا صابر - طريق كفر طهرمس من شارع فيصل بعد محل جملة النمس

الموضوع: اخوانى واخواتى باركولى وساعدونى

LinkBack

أدوات الموضوع

عرض

-

-

-

-

-

المواضيع المتشابهه

باركولى وساعدونى ( لسه شارى لانوس 99 جديد )

باركولى وساعدونى اشتريت النترا أوتوماتيك

باركولى يا اخوانى علي هوندا اكورد 2008

باركولى اخوانى الاعضاء

الكلمات الدلالية لهذا الموضوع

المفضلات

المفضلات

ضوابط المشاركة