لو حد حب يشتري عربيه متهربه وورقها سليم (معلومه للكل)
في الاونه الاخيره انتشر موضوع العربيات المتهربه من ليبيا وغير ليبيا
الناس تشتري العربيه بمبلغ تافه
ويتعملها ورق وملف في المرور وتعلق نمر ورخصه سليمه وكل ورقه في ملفها سليمه 100%
ولكن!!
طبعا الموضوع ده مفيش حد مفكرش فيه
لانه يسيل لعاب اي حد وانا قتلت الموضوع بحثا
ايه يدفعني 200 الف في عربيه لما ممكن اشتريها ب60 ولا 70 الف جنيه
----------------------------------------------------------
كان عندي واحد صاحبي تاجر عربيات من شويه وفصصلي الموضوع
وقولت لازم افيدكم زي ما استفدت
لان اتعملت مواضيع كتير في المنتدي عنالعربيات دي
شوف يا سيدي الفاضل منك له
معاليك حتشتري سوناتا او 525 او حتي 740i
وكله باتمان رخيصه
ورخصه ساريه وسليمه
وكله تمام التمام
فين بقي الخازوق
اقولكم فين الخازوق زي ما اتشرحلي
معاليك حتيجي تجدد بعد 3 سنين مثلا
فحص وبصمات واوراق وكله تمام
بس حتيجي عند جزئيه مراجعه الملف
اين الافراج الجمركي !!!!!!!!!!!!!!!!!
بكل بساطه ملفك كله سليم بس العربيه مفيهاش افراج جمركي
حيروج موظف المرور بكل بساطه برضه مخاطب الجهات والمنافذ المختصه باصدار الافراج الجمركي
يا عالم عربيه شنوري اللي رقم موتورها كذا ورقم الشاسيه كذا حدش فيكم شافها
بكل بساطه حيقولوا مشوفناهاش
وساعتها الموضوع حيتنقل من هيئه الجمارك
لمنافذ الدخول الموجوده (نويبع - السلوم - المطارات )
حدش شاف عربيه شنوري يا ناس
وكله حيقعد يدور عنده
لحد ما حيقول لا دي مش عربيه شنوري
العربيه دي دخلت بالتاريخ الفلاني باسم فلان الفلاني
ومخرجتش من البلد تاني
طيب تمام كده يا جمارك متشكرين منكم
خدوا بقي عنوان شنوري صاحب العربيه
وادوه للمباحث
وكل ده وصاحب العربيه مش حاسس بحاجه لحد دلوقتي
تعالي يا عم شنوري
اشتريت العربيه من مين ياحبيبي
من كريم منير يا باشا
فين العقد يا شنوري اهوه يا باشا
تروح المباحث لكريم
جايب العربيه منين يا كيمو
من فلان وادي عقدها
وتمشي السلسله لحد ما يتجاب اصل واول واحد ضرب ورق العربيه
وفي النهايه
لو ربنا بيحبك العربيه حتتصادر وفلوسك راحت عليك يا شنونو واقعد نقر في الاسفلت زي السنونو
ولو ربنا غضبان عليك حتلبس اسود انت وكل حلقه في سلسله شرا العربيه دي
واكيد لو العربيه داخله متهربه عن طرق غير المنافذ الشرعيه الخازوق حيكون اكبر
----------------------------
يا ريت لو حد عنده اضافه للموضوع يقولها علشان الناس تستفيد
واللي اشتري يروح يراجع ورق عربيته في المرور ويشوف اصلها جاي منين