الموضوع: أكسنت rb و لا كيا ريو الجديدة

الأكسينت أفضل في السحب نسبيا ..
الريو أنعم و أكتر راحة بكتييييير ... الأكسينت ناشفة جدا
الأكسينت منتشرة أكتر و قطع غيارها منتشرة جدا ... لكن عموما الريو كمان شوية هتنتشر برضه و سعر إعادة البيع و قطع الغيار كله هيتظبط .. كل الكوري كده يا باشا ماتقلقش
الريو كماليات أكتر و تابلوه أشيك في رأيي و خامات أفضل في رأيي برضه و توكيل أفضل ..

المشاركة الأصلية كتبت بواسطة amagroup

انا اعرف ان الاكسنت ناعمة جدا فمن حضرتك نستفيد هل انت ركبت الاثنين

المعروف والمشهور ان الكيا انشف ياريت تفهمنا علما ان معايا اكسنت ار بي

أنا سوقت الأكسينتات بجميع إصداراتها من ساعة ما هيونداي قالت يلا يا أكسينت ..
و برضه سوقت كل الموديلات اللي في فئتها و غيرها أكيد ..
و بقولك عن تجربة الآر بي ناشفة زي المستشفى .. و عموما ده رأيي الشخصي .. هي أرحم شوية والله من الفيرنا ( ربنا يستر و ماتقوليش الفيرنا ناعمة ) .. لكن بالنسبة للصني مثلا اللي بيتقال عليها ناشفة تعتبر الأكسينت ناشفة أكتر ، و بالنسبة للريو الجديدة و القديمة الأكسينت أنشف ، و بالنسبة للبوما الأكسينت أكيد أنشف مع إن البوما برضه مش ناعمة للدرجة دي ، و بالنسبة للإلنترا 2008 تعتبر الأكسينت آر بي كنبة بلدي من كتر ماهي ناشفة ...... أنا عمري ما حد قالي كلمة إن الآر بي ناعمة أبدا !!!!!! و أقصد بكلمة ناشفة يعني لما تاخد نؤره أو مطب على السريع أو تنتش فجأة أو تفرمل فجأة أو ملف مع رجرجه على الطريق أو طريق مش مرصوف كويس .

و في الأول و في الآخر الموضوع ده نسبي و يفرق من واحد للتاني ، لكن أنا أكيد جربت الآر بي دي منتشرة زي الرز في كل مكان و لا أي حد قالي عليها ناعمه أبدا بجد أنا مستغرب و عن تجربتي العربية ناشفة كتير كمان مش ناشفة بس ... فيه موضوع تاني مقارنة برضه أنا قولت فيه نفس الكلام ده و كل الناس موافقاني و بيقولوا عن تجربة ناشفة برضه مش أنا لوحدي والله .. و في النهاية حتى لو حضرتك مش مقتنع دي وجهات نظر و أنا بحترم رأي حضرتك في النهاية .

و للعلم أنا مهندس ميكانيكا ، و موضوع العربيات ده عندي هواية ، و مع إني شغال في مجال الأوراق المالية أصلا لكني واخد كلية هندسة قسم قوى ميكانيكية من كتر حبي في مجال السيارات كهواية و دخلت توكيلات كتير كمهندس مش عميل و جربت عربيات كتير جدا جدا ، و قسم المقارنات فيه مشاركات كتير ليا .. فأنا والله بحاول على قد ماقدر أكون حيادي .. أصلا الكيا و الهيونداي الاتنين كوري و أنا مش هجبي على حد فيهم و أنا بطبعي مش عاطفي ولا أمتلك ولا واحده فيهم ولا عمري هشتري حاجة فيهم فأنا دايما بقول رأي على قد ماقدر منطقي و حيادي و ماقصدش أتحيز أبدا .. و اعذرني لو كنت طولت في الرد .