الموضوع: كورولا ولا شارك

قوة موتور و سحب :
شارك
ثبات و أمان :
شارك تكسب .. لكن برضه الكورولا ثباتها جميل .. لكن لانسر ي الإصدار الأخير ده تفوقت على نفسها في موضوع الثبات
كماليات و شكل خارجي و تابلوه :
شارك
نعومة و عزل :
كورورلا
توكيل :
كورولا
إعادة بيع :
كورولا
قطع الغيار :
متقاربين


الخلاصة في رأيي الشارك تتفوق على الكورولا في الإصدار ده إلا من نقطة صوت الموتور العالي و الصاج اللي نسبيا ضعيف .. لكن شاسيه الشارك أتقل من شاسيه الكورولا بفرق كبير و ده أمان عالي أوي ..

المشاركة الأصلية كتبت بواسطة Unendlich

ممكن بعد اذنك نعرف مصدر المعلومة الجبارة دي عشان نستفيد كلنا
و الأمان مش بيتقاس بوزن الشاسيه
في tests زي ال EuroNcap مثلا للحاجات دي لو سمعت عنه

شاسيه الشارك هو نفس شاسيه الاوتلاندر وده شاسيه مدعم (reinforced) عند نقط معينه عشان يدى ثبات فى المنحنيات والطرق المعفنه وده ليه عامل كبير فى مستوى الامان

بالنسبه للسحب مش هفتى قوى لانى مسقتش الشارك ال1600, بس عموما على الورق الشارك بتخرج 117 حصان عند 6000 لفه والكورولا بتخرج 122 عند 6000, فالكورولا تكسب فى القدره الحصانيه

بس العزم فى صالح الشارك الاثنين اقصى عزم 154n.m بس الشارك بتخرجو على4000rpm والكورولا بتتاخر قوى على 5400 rpm

المشاركة الأصلية كتبت بواسطة Unendlich

ممكن بعد اذنك نعرف مصدر المعلومة الجبارة دي عشان نستفيد كلنا
و الأمان مش بيتقاس بوزن الشاسيه
في tests زي ال EuroNcap مثلا للحاجات دي لو سمعت عنه

و فيه مناقشه باحترام بتتم لما كل واحد يقول وجهة نظره و يحترم كلام التاني حتى لو مختلف معاه و يرد عليه بأسلوب فيه تقدير و احترام ، مش استهزاء ....

فيه على الصفحة الأولى من قسم المقارنات أكتر من 3 مقارنات تانية داخل فيهم كورولا مع شارك .. ولا موضوع فيهم غير و الكل بيتكلموا إن الشارك أفضل من الكورولا من ناحية التسارع و قوة الموتور .. ياريت تدخل و تسألهم برضه مصدر معلوماتهم منين يمكن يفيدوك أكتر ..

أنا مصدر معلوماتي التجربة .. جربت العربيتين و ركبتهم كتير لإن العربيتين مع 2 من أعز اصحابي و الطبيعي إننا بنجرب عربيات بعض و ده عادي .. و صاحب الكورولا نفسه معترف إن عربيته في السحب أقل من الشارك ، و بيقول إنها أقل من البوما كمان ( لكن أنا بقول إن البوما تعرف تكسرها لحد 100 أما بعد 100 الكورولا هتعدي من البوما على السرعات العالية ) و ده برضه علشان أكون منصف في كلامي ..

دول فيديوهين لشارك 1500 تسارع من 0 - 100 في 9 ثواني .. و الجميل كمان إنه من 0 - 170 في 30 ثانية ، و أنا على الشارك اللي جربتها جبت من 0 - 180 في 32 ثانية بالظبط :
Mitshubishi Lancer 1.5 109 Hp 0-150 - YouTube
Mitshubishi Lancer 1.5 109Hp 0-170 - YouTube

و الكورولا اللي جربتها كنت بجيب بيها من 0 - 100 في 12 ثانية أو 11 و نص تقريبا .. و الفيديوهات بتأكد كلامي برضه ... و أنا جيبت أكتر من فيديو علشان يكون فيه مصداقية أكتر .. و دي والله نفس الأرقام اللي أنا جربتها بنفسي :
‫تسارع كورولا 2012 - 1.6 أوتو‬‎ - YouTube
‫قومة كورولا 1.6‬‎ - YouTube
2010 Corolla 1.6 auto - تسارع كورلا 2010 - YouTube

و سيبك من كل الفيديوهات .. و ادخل على مواقع مشهورة عالمية زي كار كونكشن أو غيره ( بس يكون فيهم كورولا لإن كورولا مش بتنزل في أوروبا بالإسم ولا بالشكل ده ) و شوف تقييم الأداء بتاع كورولا و لانسر .... أكتر موقع أنصف الكورولا اداها 6 من 10 في الأداء .. في حين إن أسوأ موقع في تقييم لانسر كان 7 من 10 في الأداء و في مواقع كتيير كان الطبيعي بتاعها 9 من 10 و 10 من 10 في الأداء .. و اقرا التحليلات بالكامل علشان تفهم وجهة نظري ... و خلي بالك كل ده على الشارك 1500 لإن الـ 1600 لسه ماتعملهاش تست ...
تخيل بقى لو شارك 1600 هتعمل إيه ؟؟
و عموما الهورس باور مش هو كل حاجة في موضوع التسارع ... الإيفوليوشن بهورس باور أقل من النص بالنسبة لعربيات تانية بتكسبها في التسارع و بفرق كبير ... فيه تصميم العربية نفسه و تصميم الشاسيه و قاعدة العجل و آلات الجر و النسب بين التروس و عوامل تانية كتير أحيانا بتكون أهم من الهورس باور .

بالنسبة لموضوع الأمان ده .. فالـ EuroNcap ده اختبار تصادم .. مالوش دعوة بالثبات على السرعات العالية و المنحيات .... و مع ذلك كورولا ماتفوقتش على الشارك فيه ولا حاجة .

أما بالنسبة لموضوع الأمان فشاسيه الشارك بيشيل عربيات تانية بتطلع أكتر من 500 حصان وهي مستريحه .. ولو قريت عنه هتلاقي تقنيات التصنيع فيها تكنولوجيا توزيع الأحمال و بعض الفنيات اللي مش موجوده في شاسيه الكورولا ....... و كفايه أوي إن عفشة الكورولا لحد النهارده تورجن بيم من عصر القوالح ، أما الشارك فمالتي لينك معمول بطريقة ممتازة جدا ..... صدقني فرق كبير في التكنولوجيا خصوصا في موضوع الثبات ده بين الكورولا و الشارك ..

و برضه في المواضيع التانية و هنا في المنتدى نفس الكلام اللي بقوله بيقوله غيري كتير .. ياريت تتكلم معاهم يمكن يقولولك معلومات أفضل .. لإن برضه أنا خربتي معاهم كانت بالتجارب العملية غير طبعا إني بحاول دايما أتعلم إيه الجديد في كل عربية من ناحية التكنولوجيا ...

الكورولا في إصدارات قديمة كانت بتتفوق على لانسر في موضوع الثبات ، ده غير إنها طول العمر متفوقة على لانسر في النعومة و العزل ... لكن في الإصدار الأخير ده ( اللي هو بشهادة الجميع أسوأ إصدار من كورولا ) لانسر تفوقت بفرق كبير كمان تقريبا في كل حاجة إلا برضه نقطة النعومة و العزل .

و في الأول و في الآخر ...... ده رأي شخصي .. ممكن تكون حضرتك شايف غير كده .. و ده مايقللش من احترامي ليك ولا العكس .. حضرتك جرب الشارك الجديدة برضه و قولي رأيك.