الموضوع: انا وانذار سباى والصني واوتو ايجبت... رحلت العذاب والضنا

حبيت انقل تجربتي كما مبين بالعنوان

ندخل في الموضوع علي طول
بدا المشوار بعد ما فكرت اركب انذار لعربيتي الصني بعد انتشار السرقه.. وربنا يسترها علينا جميعا
نظرا لاني حنبلي شويتين والعربيه من ساعه ماجبتها بعمل كل صياناتها في التوكيل يعني ماتكشفتش علي ميكانيكي ولا كهربائي بره فاتصلت بكل توكيلات نيسان اسالهم علي انواع الانذارات اللي عندهم بس لاسف لقيتهم كلهم صيني ومافيهمش فصل الكونتكت وده كان حاجه اساسيه بالنسبالي

في الاخر كلمت اوتو ايجبت ا/ اسلام قالي برده انه ماعندوش غير الصيني بس هو بيدور علي نوع احسن يجربه الاول وبعدين يبيعه في التوكيل.. المهم قعدت اتابع معاه حوالي شهر بس في الاخر قالي للاسف مش لاقي مورد يجبله انذار محترم فقالي اني ممكن اشتري انذار من السوق واركبه عندهم عادي

بدات ادور في المنتدي عن انواع الانذارات الي الاعضاء جربوها فلقيت في اجماع علي نوع اسمه
SPY 5000m ماكدبتش خبر ورحت اشتاريته من ادريان المهندسين ب 350 جنيه والتركيب عندهم ب 75 جنيه... المهم اشتاريته وحجزت في اوتو ايجبت معاد علشان اركبه.. رحت الصبح وسبت العربيه ورحت الشغل علي الظهر كده كلمني المهندس وقالي الانذار عايز قربه سنتر علشان يشتغل وبالتالي مش هيتركب النهارده

رحت اشتاريت القربه من ادريان ب 40 جنيه وعليها ضمان سنه وحجزت معاد تاني في اوتو ايجبت

رحت الصبح برده وسبت العربيه مع المحترم اسلام غازي مهندس الاستقبال ورحت الشغل
بعد الشغل رحت استلم العربيه بقي والمهندس قالي احنا وصلنا باضبط زي wiring diagram بتاع الانذار علشان كل الامكانيات تشتغل... طبعا كان الاول المهندس قالي ان تكلفه التركيب 165 جنيه ولكن قالي عند الاستلام ان الانذار ده معقد وخد وقت اكبر من المتوقع علشان كده التكلفه بقت 250 جنيه قلت امري لله ورحت دفعت وطلعت معاه بقي وبدات اجرب الانذار..

لقيت ان اولا الانذار مابيفتحش الشنطه..... ومابيفصلش الكونتكت وشويه حاجات تانيه كده
فقلت ل ا/اسلام فندالي الفني الي ركبه فقالي ان الانذار جايه معاه كتاوت صيني علشان فصل الكونتكت بس هو ماركبهاش علشان مش واثق منها وكمان لو حصلها حاجه العربيه مش هتدور الي لما تحل الانذار... رغم اني اكتابت لما سمعت الكلام ده الا اني احترمتهم جدا علي انوا مرضاش يركبهم وقلت اهو ده الفرق بين التوكيا وبره التوكيل

الحاجه التانيه ان الانذار محتاج كتاوت تانيه علشان يفتح الشنطه

المهم قلتلو والعمل ايه...

قالي ممكن اشغل فصل الدواره بس هاتلي كتاوت Bosh بدل من الي جايه مع الانذار ودي هتلاقيها في التوفيقيه في اتنين واخدين توكيل Bosh

المهم ا/اسلام قالي هات الكتاوت واحنا هنركبها من غير اي مصاريف اضافيه
بعد يومين كده كان اول رمضان نزلت التوفيقيه لفيتها محل محل حوالي ساعه اني الاقي كتاوت بوش ..انسي يا عمرو انضف حاجه موجوده التركي وشكرا علي كده

فين وفين لما لقيت واحد بيبيع قطع غيار مرسيدس لقيتها عنده فرحت قوي واشتاريتها ب 25 جنيه واشتاريت واحده كمان تركي علشان الشنطه... المهم الكتاوت محفور عليها بوش ومحفور Made in Germany

حجزت معاد تالت في التوكيل عشان اركبهم بقي وقابلت المهندسه المحترمه امينه هيكل فهمت مني القصه وكمان قلتلها تعمل صيانه 120 الف.... وسبت العربيه ورحت الشغل

بعد الشغل رحت استلم العربيه لقينها خلصت وقعدت اجرب الانذار بقي لقيته شغال زي الفل الكونتكت بيفصل والشنطه بتفتح وكل الحركات شغاله... خدت نفس عمييييييق وقلت اخيرا وخدت العربيه واتحركت... بضرب بعيني يمين كده في العربيه لقيت الكتاوت البوش اللي اشتارتها موجوده علي الكونسول... طبعا اسبهليت ومافهمتش حاجه... رحت راجع مرشيدير علي التوكيل تاني وسالت المهندسه فقالتلي مش عارفه.. والفني مشي خلاص رمضان بقي كل سنه وانتو طيبين... طلبت مني اكلمها تاني يوم الصبح علشان تشوف ايه الي حصل

المهم كلمتها تاني يوم فقالتلي ان الكتاوت البوش الي انا جبتها مضروبه... صيني يعني
ولقوا ان الكتاوت الي جايه مع الانذار انضف منها بكتيييير فركبوها... بس نصحتني اني اجيب واحده غيرها اصلي احسن.....

طبعا اسبهليت اكتر دي محفور عليها BOSH Made in Germany
للدرجادي الغش... وبعدين منين قبل كده قلتولي ان الكتاوت الي مع الانذار وحشه ومارضتوش تركبوها ودلوقتي ركبتوها....... مافهمتش

قعت قلقان من الكتاوت الي ركبه دي.. ورحت مكلم ادريان المهندسييين وكلمت الفني الي بيركب الانذار ده هناك وسالته انت بتركب الكتاوت دي ولا بتغيرها.. قالي بنركبها عادي ومافيهاش مشكله ومافيش عليها تحميل

ودي نهايه القصه مش عارف هل اسيبها وخلاص ولا ادور علي الاصلي بس يا تري هلاقيها فين وهعرفها ازاي في ظل الغش المستفحل الي احنا فيه

معلش طولت عليكما تقبلوا تحياتي ورمضان كريم