المشاركة الأصلية كتبت بواسطة dawns_mist
مجرد فرق الثبات و قوة الموتور و الكماليات .. يستحق فرق فلوس كبيييير .. يعني لما نقول إن الكيا سيراتو زيرو البيز لاين 125 ألف ، و البوما سوبر أكشن 125 ألف ... قارن بينهم و بين البيرسونا .. عربيات كلهم فئة واحده .. يعني البيرسونا راس براس مع البوما و السيراتو ... و مع ذلك البيرسونا 95 ألف .. يعني تستحق سعرها و زيادة ( ده رأيي الشخصي )
بالنسبة لاستهلاك البنزين .. ماعتقدش أبدا هيكون فيه فرق كبير بين اللوجان و البيرسونا .. مع العلم إن وزن البيرسونا أتقل بالتالي حتى لو زيادة في الستهلاك بنسبة قليلة مش ملحوظة هتبقى برضه تستحق .
التكييف .. اللوجان لما جربتها كانت كويسه في التكييف .. بس أعتقد البيرسونا أقوى في التكييف.
الصيانة ... البيرسونا صيانتها سهلة جدا لإنها نفس تقسيمة ميتسوبيشي لانسر .. قريبة أوي من البوما في الشغل الميكانيكي .. يعني مثلا عندك السيور بالكامل هي هي سيور لانسر ، و التيل كمان موجود ، و بعض الفلاتر كمان لانسر .. مش معقده في الصيانة خالص .. لكن أكيد فيه بعض قطع الغيار مش بتكون متوفرة في السوق قد كده .. بالتالي النصيحة إنك يكون قريب منك فرع محترم لعز العرب و تتعامل معاه بس في الحاجات النادرة .. غير كده متوفر في القاهرة و في أغلب المحافظات دلوقتي قطع غيار البروتون ... حتى عندنا في طنطا فيه شركة جديدة فتحت متخصصه في قطع غيار بروتون أصلي و تقليد كمان .. يعني مايتخافش منها دلوقتي .... لكن اللوجان برضه توكيل أفضل أكيد .
اعتمادية .... بص الاتنين صناعات محترمة جدا و تقدر تثق فيهم .. علامة رينو علامة محترمة من يومها .. بروتون شركة دلوقتي عالمية و تمتلك شركات كبيرة زي لوتس البريطانية ، و مساهمة مع شركات كبيرة أوي في اوروبا و اليابان .. فدلوقتي بقت إسم تقدر تثق فيه .. صاحبي معاه حين تو 2006 .. و لحد دلوقتي مش بتزعله غير في الخبطات أو الحوادث لا قدر الله .. لكن ماكانتش بتقل منه أو تقرفه أبدا.
* لوجان عربية محترمة جدا و تستاهل كل مليم بتدفعه فيها ... لكن بيرسونا فئة أعلى و تستحق أكتر من ثمنها كمان و تستحق إنك تنتظر عليها 5 شهور .. الفيصل عندك هيبقى موضوع قطع الغيار بس .. لو سألت و لفيت في القاهرة و المنصورة و استريحت و اطمنت للبيرسونا يبقى توكل على الله .. لو قلقان يبقى خليك في اللوجان و برضه عربية محترمة أوي ...